Бишкекте Түрк дүйнөсүнүн инженерлер жана архитекторлор союзу Насирдин Исановдун эстелигин тургузат

Кыргызстандын Түркиядагы элчиси Ибрагим Жунусов Түрк дүйнөсүнүн инженерлер жана архитекторлор союзу Ильяз Демиржи менен жолукту. Бул тууралуу бүгүн, 19-январда КРнын Тышкы иштер министрлигинен билдиришти.

Маалым болгондой, жолугушууда И.Демиржи Түрк дүйнөсүнүн инженерлер жана архитекторлор союзунун ишмердүүлүгүнө кыскача токтолуп, 2014-жылдын сентябрь айында Бишкекте Түрк дүйнөсүнүн инженерлер жана архитекторлор курултайы бийик деңгээлде өткөрүлгөнүн баса белгиледи.

Мындан тышкары И.Демиржи Түрк дүйнөсүнүн инженерлер жана архитекторлор союзу 2015-жылды Насирдин Исановдун жылы деп жарыялаганын жана анын эстелиги Бишкекте тургузуларын маалымдады.

И.Жунусов өз кезегинде түрк тараптын активдүү кызматташып, шаар курулушуна жардам берип жаткандарына жана Кыргызстандын алгачкы премьер-министри жана мамлекеттик ишмеринин эмгегин баалап, 2015-жылды Н.Исановдун жылы деп жарыялаганына ыраазычылыгын билдирди.

Насирдин Исанов 1943-жылы Ош облусуна караштуу Ноокат районунун Көк-Бел айылында туулган. Ал КРнын туңгуч премьер-министри, СССРдин Инженерлер союзунун академиги болгон. Мамлекеттик ишмер 1991-жылы 29-ноябрда Бишкекте көз жумган.