“Орусия сыяктуу команданы утканыбыз кубандырат” дейт Кыргызстан жаштар курамасынын машыктыруучусу

"Шериктештик Кубогунда" Орусияны утуп алган Кыргызстандын 21 жашка чейинки курамасынын башкы машыктыруучусу Мирлан Эшенов бул жеңиш тууралуу ой бөлүштү. “Өзүңүздөр көргөндөй, оюн өтө оор болду. Орусия сыяктуу кураманы утуу кубандырат! Орусиянын курамында башкы курамдын айрым оюнчулары жок экенин байкадык. Биздин команда өз тарыхында биринчи ирет тайпадан чыкты. Мен өзүлөрүн толук арнаган футболчуларга ыраазымын”,- деп билдирген М.Эшенов мелдештин расмий сайтынын өкүлдөрүнө.  

Кошумчалай кетсек, Кыргызстан курамасы “В” тайпасында алгачкы 2 турда Молдова жана Латвия курамалары менен тең эсепте ойной алган. Акыркы турда алар үй ээси Орусияны утуп, тайпадан биринчи болуп чыга алышты. Ал эми Латвияны утуп, Молдова менен тең ойногон Орусия жаштар курамасы карамагындагы 4 упай менен тайпадан экинчи болуп чыкты.