2014-жылы жаратылышты коргоо боюнча мыйзамдарды бузуудан мамлекетке 11 миллион сомдук зыян келтирилген

Кыргызстанда 2014-жылы жаратылышты коргоо жаатындагы мыйзамдарды бузуу боюнча 622 фактынын бети ачылып, мамлекетке келтирилген зыяндын суммасы 11 миллион 532 миң сомду түзгөн. Маалыматты 20-январда Айлана-чөйрөнү коргоо жана токой чарба мамлекеттик агенттигинде өткөн жыйында аталган мекеменин статс-катчысы Бактияр Абдиев билдирди.

"Мунун ичинен 410 факт - дарактарды мыйзамсыз кыюу, келтирилген зыян - 8 миллион 864 280 сом. Жаратылышты коргоодогу мыйзамдардын бузулушу боюнча укук коргоо органдарына 76 материал жиберилди, чыгымдын суммасы - 7 миллион 673 620 сом. Мунун ичинен 6400 сомдук 6 материал каралды. Калган 70 иш учурда соттук тартипте каралууда",- деп билдирди. 

Жыйынга катышкан биринчи вице-премьер-министр Тайырбек Сарпашев токой чарба тармагы боюнча укуктук-нормативдик актылардын эскирип бүткөнүн, аларды жаңылоо керектигин белгиледи. 2014-жылы өлкөдө токой фондуна караштуу 384 178 гектар жерди ижарага берүү боюнча 21 239 келишим түзүлгөнү, мунун эсебинен 31 миллион 48 миң сом киреше түшкөнү айтылды.