Валерий Диль Сары-Жаз дарыясынын аймагын иштете турган корпорация түзүү боюнча иштер аткарылбай жаткандыктан, министрлерди сынга алды

Вице-премьер-министр Валерий Диль Ысык-Көл облусундагы Сары-Жаз дарыясынын аймагын иштете турган ири улуттук корпорация түзүү боюнча 21-январда Өкмөт үйүндө жыйын өткөрдү.

Жыйында вице-премьер-министр аталган долбоор боюнча тиешелүү министрликтер жана ведомстволор эч кандай иш-чара аткарбагандыгын айтып, министрлерди сынга алды.

“Юридикалык статусу, уюштуруу иш-чаралары жана мамлекеттик активдер иштелип чыкпаптыр. Бул белгиленген тартип төмөн деңгээлде аткарылганын айтып турат”,- деди Диль.

Жыйынтыгында Сары-Жаз аймагын иштете турган ири улуттук корпорация түзүү боюнча тиешелүү жетекчилерге тапшырма берилди. 

Сары-Жаз аймагын өздөштүрүү боюнча Ысык-Көлдөгү Сары-Жаз дарыясынын аймагын иштете турган ири улуттук корпорация түзүлөт. Бул энергетикалык жана өндүрүш зоналарынын ачылышы Ысык-Көл облусунда жана Каракол шаарында жашагандар үчүн кошумча жумуш орундарын түзмөкчү.

Буга чейин аталган аймакка инвестиция салуу ниетин Орусия жана Кытай билдирген болчу.