Чүй облусунда Сириядагы согушка тартылгандардын арасында 18 жана 17 жаштагы эже-сиңдилер да бар

Чүй облусунда 11 адам Сириядагы согушка тартылган. Алардын арасында 18 жана 17 жаштагы эже-сиңдилер да бар. Бул тууралуу Кант шаарында болгон форумдун жүрүшүндө ички иштер министри Мелис Турганбаев билдирди.

“Коомдогу көйгөйлөрдүн дагы бири - бул диний азгырыктарга кабылып, жарандарыбыздын Сирия өлкөсүнө кетип жаткандыгы. Ислам дининен толук түшүнүгү жок же болбосо көр оокаттын айынан кетип жатышкандыгы кейиштүү. Алардын арасында эки жаш кыз да бар. Бул үй-бүлөнү алып карасак, жашоо шарты жалпысынан орто, интернет-сайттары аркылуу бейтааныш адамдар менен таанышып, натыйжада Сирияга кетишкен. Керек болсо кетип жатканда ата-энелерине да айтышкан эмес. Мындай жагымсыз жагдай ата-энелердин балдарга болгон таасири төмөн экендигинен кабар берет”,- деди Мелис Турганбаев.