Депутат Урмат Аманбаева мандатынан ажыратылды

Жогорку Кеңештеги "Республика" фракциясынын депутаты Урмат Аманбаева мөөнөтүнөн мурда мандатынан ажыратылды. Мындай чечим бүгүн, 23-январда Борбордук шайлоо комиссиясынын жыйынында кабыл алынганын БШКнын төрагасынын орун басары Гүлнара Журабаева SUPER.KG порталына билдирди. "Урмат Аманбаеваны мандаттан ажыратууга комиссиянын 10 мүчөсү "макул", бирөөсү "каршы" деп добуш берди",- деди Журабаева.

Аманбаеванын КРнын Конституциясын жана “Жогорку Кеңештин депутаттарынын статусу жөнүндө” мыйзамды одоно бузуу менен депутаттын ыйгарым укуктарына туура келбеген иштер менен алектенгени үчүн мандаттан ажыратуу сунушун буга чейин Башкы прокуратура сунуш кылган эле.

Эскерте кетсек, Урмат Аманбаевага Башкы прокуратура тарабынан кылмыш иши ачылган. "Коррупция" беренеси менен айыпталып жаткан депутат мамлекетке 17 миллион 263 500 сом зыян келтиргени айтылууда. Депутат Ош облусундагы Кургак учук менен күрөшүү борборунун башкы эсепчиси болуп турганда мыйзамсыз иштерди жасаганы маалымдалган. Бирок депутат өзүнө козголгон кылмыш ишин негизсиз деп эсептейт жана тагылып жаткан айыптарга макул эмес.