Индира Жолдубаева "кримтөбөл" Азиз Батукаев боюнча ишти кайрадан карап чыгууга убада берди

"Кримтөбөл" Азиз Батукаев боюнча иш кайрадан каралат. Муну башкы прокурорлукка талапкер Индира Жолдубаева Жогорку Кеңештин Мыйзамдуулук, укук тартиби жана кылмыштуулук менен күрөшүү боюнча комитетинин 27-январдагы жыйынында айтты.

Жыйын жүрүшүндө талапкер эл өкүлдөрүнүн суроолоруна жооп берип жатып “Батукаев боюнча маалыматтар жетиштүү жыйналган, мен иликтеп чыгышым керек, жаңы жагдайлар болсо, кайрадан карайм”,- деди Жолдубаева.

Комитет Жолдубаеванын башкы прокурорлукка талапкерлигин карап жатат. Аны депутаттарга президенттин аппарат башчысы Данияр Нарымбаев тааныштырды. 

Эске салсак, "мыйзамдагы ууру", 48 жаштагы Азиз Батукаевди 2013-жылдын 9-апрелинде Нарындагы №4-абактан кандын рак илдетине чалдыккандыгы тууралуу медициналык корутундуга таянып бошотушкан. Ошол эле күнү ал туугандары менен Грозныйга учуп кеткен.