Ош шаарынын мэри Жапалак аймактык башкармалыгынын тургундары менен жолугушуу өткөрдү

Өткөн 2014-жылы Ош шаарында өндүрүлгөн айыл чарба продукциясы 2 миллиард 769,4 миллион сомду түзгөн. Бул көрсөткүч 2013-жылга салыштырмалуу 208 миллион сомго көп дегенди билдирет. Муну Ош шаарынын мэри Айтмамат Кадырбаев Жапалак аймактык башкармалыгынын жашоочулары менен жолугушуу учурунда билдирди.

Мэриядан билдиришкендей, бүгүнкү күндө 2014-жылдын бардык көрсөткүчтөрү боюнча биринчи орунда Ош шаары келатат. Өткөн жылы шаар ичинде 3 ири өндүрүүчү ишкана ачылган: кир жуучу машина чыгарган завод, курулуш иштерине керектелүүчү материалдарды чыгаруучу ишкана жана гипсокартон чыгарган ишкана. Бул ишканалардын ачылышы менен 850 адам жумуш оруну менен камсыздалган.

“Жапалак аймактык башкармалыгында өткөн жылдын 4 ай аралыгында 120 балага ылайыкталган жаңы бала бакча ишке берилди. Азыркы тапта 90 балага ылайыкталган бала бакчалар Гүлбар-Төлөйкөн айылында жана Амир-Темир кичи районунда да курулууда. Ал эми Озгур айылында Б.Алыкулов атындагы №33-мектептин 230 окуучуга ылайыкталган жаңы корпусу салынып, ишке берилди”,- деди А.Кадырбаев.

Мэрдин айтымына караганда, Жапалак айылында 120дан ашуун электр тирегичтер орнотулган. Ошондой эле электр түйүндөрүнө күч келтирбөө максатында эски көмөк чордондор кубаттуулугу жогорку көмөк чордондорго алмаштырылган.