Бишкектеги соода борборлорунун биринде жезден жасалган чынжырды алтын деп саткан сатуучулар кармалышты

Бишкек шаарында алдамчылык фактысына шектелген жарандар кармалышты. Бул тууралуу бүгүн, 28-январда Бишкек ШИИББинен билдиришти. Маалыматка ылайык, милицияга арыз менен 2 жаран кайрылган. Анда 30 жаштагы Ш.Г. аттуу айым "Беш-Сары" соода борборунан 25 жаштагы белгисиз жарандар анын ишенимине кирүү менен сары жезден жасалган моюнга таккан чынжырды алтын деп сатып жиберишкенин айткан. Ушундай эле арыз менен 34 жаштагы С.Т. аттуу жаран кайрылган. Ал да ошол эле соода борборунан анын ишенимине кирген 2 сатуучу жезден жасалган чынжырды 25 200 сомго сатышканын айткан. Бул арыздардын негизинде кылмышка шектүү катары Жалал-Абад облусунун 26 жаштагы М.Б. жана Чүй облусунун 36 жаштагы Т.А. аттуу тургундары кармалышты. Учурда бул иш боюнча тергөө амалдары жүрүүдө.