Ош шаарында 2014-жылы кызматкерлердин орточо эмгек акысы 888 сомго өскөн

Ошто 2014-жылы кызматкерлердин орточо эмгек акысы 888 сомго өскөн. Бул тууралуу бүгүн, 29-январда Ош шаарынын биринчи вице-мэри Замирбек Аскаров билдирди.

Маалыматка ылайык, өткөн жылы курулуштун дүң продукциясынын көлөмү 2759,9 миллион сомду түздү (2013-жылы 2439,7 миллион сом), башкача айтканда, 2013-жылга салыштырмалуу 111,6 пайызга же 320,2 миллион сомго көбөйгөн.

“Рыноктук төлөмдөрдүн көлөмү 39,6 миллиард сомду түзүп (2013-жылы 34,3 миллиард сом), 2013-жылга салыштырмалуу 5,0 пайызга же 5,3 миллиард сомго өскөн. Анын ичинен соода, унаа жана турмуш-тиричиликте керектелүүчү буюм-теримдерди сатуу, оңдоо 4,9 пайызга же 4,3 миллиард сомго өсүп, 33 миллиард сомду (2013-жылы 28,7 миллиард сом) түздү. Чекене товар жүгүртүү 25,3 миллиард сомду (2013-жылы 19,8 миллиард сом) түзүп, өткөн жылдын тийиштүү мезгилине карата 16,2 пайыз же 5,5 миллиард сомго өскөн”,- дейт З.Аскаров.  

Кызматкерлердин орточо эмгек акысы 2014-жылдын январь-ноябрь айларына карата 10 727 сомду түзүп (2013-жылы 9839 сом) же 888 сомго өскөн.