“Дарыгерлердин шалаакылыгынан улам балабыздын абалы оорлошуп кеткен” дешет туура эмес дарыланган жигиттин жакындары

"Дарыгерлердин шалаакылыгынан улам балабыздын абалы оорлошуп кеткен". Бул тууралуу бүгүн, 30-январда SUPER.KG порталына "кызамык" деген диагноз менен туура эмес дарыланган 21 жаштагы Садыбакас уулу Рыскелдинин агасы Асылбек Нурманбетов билдирди.

“6-январь күнү Рыскелди сасык тумоо болуп, дарыканадан “Терафлю” аталышындагы дарыны алган. Үйгө келип ал бир бөлүгүн ичип, кийинчерээк дагы бирөөсүн ичкен экен. Көп өтпөй анын денесинде кызыл бүдүрчөлөр пайда болуп, көзү кызарып, дене табы көтөрүлүп кеткен. Баланы көргөнгө келген "Тез жардам" кызматы Рыскелдини Шаардык инфекциялык ооруканага жеткирип койгон. Ал жактан дарыгерлер эч кандай анализ албастан, текшербестен, “кызамык” диагнозун коюп, дарылап башташкан. Ошентип, дарыгерлер Рыскелдини оорубаган оорусунан айыктырмак болуп, эки күн туура эмес дарылашкан. Балабыздын абалы начарлап, териси күйгөндөй болуп, жаман абалга жеткен. Эки күндөн кийин ал "аллергия" деген диагноз менен токсикология бөлүмүнө которулган”,- дейт А.Нурманбетов.  

Маалыматка ылайык, Рыскелди 8-январдан бери №4-шаардык оорукананын күйүк бөлүмүндө дарыланууда. Азыркы тапта ага "Лайелл синдрому" (оор түрдөгү аллергиялык дерматит) деген диагноз коюлган. Рыскелдинин абалы аз-аздан жакшырууда, бирок ага бир катар дары каражаттары жана кан керек.

“Рыскелдинин абалы кичине жакшырып келатат, бирок өз калыбына келүү үчүн убакыт талап кылынат. Ал эми балабызды туура эмес дарылаган дарыгерлерди сотко берүү тууралуу азырынча ойлоно элекпиз. Жалгыз тилегибиз Рыскелдинин тезирээк сакайып кетиши болуп, күнү-түнү анын жанынан чыкпай жатабыз”,- дейт А.Нурманбетов.