Таласта Кызыл китепке кирген жоруну атканы үчүн аңчыга 25 миң сом айып пул салынды

Таласта Кызыл китепке кирген жоруну атканы үчүн аңчыга 25 миң сом айып пул салынды. Бул тууралуу бүгүн, 4-февралда Айлана-чөйрөнү коргоо жана токой чарбасы боюнча агенттиги билдирди.

Маалыматка караганда, бул окуя өткөн жылдын 15-декабрында болгон. Анда Талас районундагы Арал айылынын аңчылары ууга чыгышып, бир канча карышкыр, чөөнү жок кылышкан. Ошону менен бирге эле жоруну да атып алышкан. 

Көк жору - Кыргызстандын Кызыл китебине киргизилген канаттуу. Ал бийик тоолордо кездешкен куштардын катарына кирет, ошондуктан анын саны так эмес. Ал республиканын түштүк тарабында көп кездешет. Кыргызстанда көк жорунун популяциясынын жаштык структурасы боюнча жүргүзүлгөн байкоолорго караганда, жетилген жорулар жыл сайын эле көбөйүүгө катышышпайт. Жоруларды көбөйтүү максатында канаттуу бар жерлерди коргоого алуу, байкоо жүргүзүүнү уюштуруу, аларды жасалма жол менен тамактандыруу каралган.