Санариптик телерадиоберүүгө өтүү боюнча программанын чегинде пландалган бардык иш-чаралар аткарылды

Кыргыз Республикасынын Маданият, маалымат жана туризм министрлиги Кыргыз Республикасында санариптик телерадиоберүүгө өтүү боюнча программанын чегиндеги 2014-жылга карата пландалган бардык иш-чараларды аткарды. Бул тууралуу бүгүн, 4-февралда аталган министрликтен билдиришти. 

Маалымат саясаты жана маалыматтык коопсуздук маселелери бүтүндөй отчёттук мезгил ичинде министрликтин көңүл чордонунда болуп келген. Анын негизги багыттарынын бири – өлкөдөгү телерадиоберүүнү санариптик форматка өткөрүү. 2014-жылы министрлик Кыргыз Республикасында санариптик берүүгө өтүү программасы боюнча аталган жылга карата пландалган негизги маселелердин баарын жүзөгө ашыра алды. Жер үстү аркылуу эфирдик санариптик берүүнүн социалдык пакети түзүлгөн. Социалдык пакетти түзүүдөн мурда министрлик тарабынан жер үстү аркылуу эфирдик санариптик берүүлөрдүн телеканал жана радиоканалдардын социалдык пакетин түзүүнүн эрежеси жөнүндө жобону беките турган токтом долбоору иштелип чыгып, бардык министрлик жана ведомстволор менен макулдашылган. Ошондой эле шаар жана облустардын кинотеатрларында көркөм тасма көрсөтүүдөн мурда түшүндүрүүчү видеотүрмөктөрдү көрсөтүп туруу өтүнүчү менен Кинематография департаментине кат жөнөтүлгөн. 

Азыркы учурда “Сорос-Кыргызстан” фондунун колдоосу алдына калкка санариптик телерадиоберүүгө өтүүнүн этаптары тууралуу маалымат берип туруу боюнча улуттук кампанияны иштеп чыгуу жарыяланган. Министрликтин маалымат чөйрөсүндө иш алып баруусуна таасир этүүчү механизмдин пайда болгондугу жакшы мүмкүнчүлүктөрдү түзүүдө. Башкача айтканда, өткөн жылы Маалымат жана массалык коммуникациялар департаменти түзүлүп, анда иштеген кызматкерлерге бул тармактагы бардык иштер жүктөлгөнү тууралуу жазылат маалыматта.