"Кызымды зордуктаган зөөкүрлөр соттон акталып кетишти” дейт 14 жаштагы зордукталган кыздын энеси

Бүгүн, 5-февралда маалымат жыйынында жабырлануучу кыздын энеси Гүлзада Токтогазиева "7-класста окуган кызымды зордуктаган 2 жаран дале эркиндикте жүрөт" деп билдирди.

“Кызым Самараны былтыр 16-июль күнү кайним менен ажырашып кеткен Кымбат аттуу абысыным алдоо жолу менен бир үйгө алып барып, 2 таанышына зордуктатып койгон. Токтогул райондук соту абысынымды камакка алып, ал эми тиги 2 жаранды актап, бошотуп жиберди. Кызымды зордуктагандардын бири менин күйөөмдөн 2 жаш улуу, 40 жаштагы Азамат Токтошов болсо, экинчиси 26 жаштагы Максат Жумакалиев боштондукта жүрөт”,- дейт ал.

Анын айтымында, айыпталуучу тараптын жактоочусу анын кайнежеси менен бирге аларды алдап, коркутуу жолу менен белгисиз бир кагаздарга кол койдуртуп алган. Кийин сотто ал кагаздар тосмо арыз экени аныкталган.