Көлөмүң болуп кичине,
Көзүмдүн батсаң ичине.
Көргөзбөй алып жүрмөкмүн,
Көңүлү бузук кишиге.
Карааның болуп кичине,
Каректин батсаң ичине,
Каратпайт элем өзүңдү,
Карашы бузук кишиге.

Карасаң башка кишиге,
Кан толо түшөт ичиме.
Эриксе жүрөк булкунуп,
Ээ боло албайм күчүмө.
Жанаша калсаң кичине,
Жалдырап карайм жүзүңө,
Балакет кылбасаң экен,
Башканын кирип түшүнө.

Бийлетип ой-санаамды,
Биликтей күйүп-жанамбы?
Элестеп жүрүп өзүңдү,
Эс жинди болуп каламбы?
Кыйсыпыр кылдың санаамды,
Кыргыздан сендей табамбы?
Сыртыңдан жүрүп кызганып,
Сыркоолуу болуп каламбы?

Көлөмүң болуп кичине,
Көзүмдүн батсаң ичине.
Көргөзбөй алып жүрмөкмүн.
Көңүлү бузук кишиге.
Айтканга күйүп айла жок,
Ашыктык оту кайда жок.
Мени сүй, эгер ишенсең,
Мен сүйгөн менен пайда жок.

Кайырма:
Ай жылдарга сайып саймасын,
Ачкан мага турмуш пардасын.
Сүйүү, сынак, күлкү жыттанган,
Студенттик күндөр кайдасың?

Бүркүт сымал кагып канатты,
Бизге коюп катуу талапты.
Мен сагындым абдан берилип,
Мугалимдер өткөн сабакты.

Кайырма:
Ай жылдарга сайып саймасын,
Ачкан мага турмуш пардасын.
Сүйүү, сынак, күлкү жыттанган,
Студенттик күндөр кайдасың?

Билим издеп келип алыстан,
Бактым менен беш жыл жарышкам.
Далай кызды сүйгөм ошондо,
Дептер берип, китеп алышкан.

Кайырма:

Өзгөрүлүп жылдар жаңырды,
Өмүр сүрдүм кызык, жалындуу.
Сонундар көп, бирок баарынан,
Студенттик жашоо жагымдуу.
Студенттик күндөр жагымдуу.

Мөлтүрөгөн тунук булак шылдырап,
Назик желге жазгы жамгыр тыбырап.
Махабаттын өлбөс күүсүн терметип,
Тээ алыстан торгой үнү угулат, угулат.

Кайырма:
Эй, кыздар, эй, кыздар, эй, кыздар,
Келбейлиби бак аралап бир басып,
Көңүлдөгү айтылбаган сырларды,
Чечпейлиби бирге олтуруп, сырдашып.
Эй, кыздар, эй, кыздар, эй, кыздар,
Жүрбөйлүбү айлуу түндө бир басып.
Жымыңдашкан жылдыздардын алдында,
Кол кармашып сүйүү ырын,
Кол кармашып жаштык ырын,
Шаттык ырын ырдашып.

Кеч да кирди, көктө жылдыз жымыңдап,
Ай баратат сүйүү ырына ыр улап.
Ээнсиреген бак дарактар арасы,
Кыз-жигиттер келсе экен деп шыбырайт.

Кайырма:

Кыргызымда бата бар,
Бата берген аталар.
Бата алган эр жигит,
Элин коргоп жоо сайса,
Шер жигит деп даңк алар.

Элин коргоп жоо сайган,
Манас алган ак бата.
Кыргызымдан бата алган,
Чыңгыз чыкты даңктана.
Наристе үнү жаңырып,
Адам келсе арага,
Жакшы тилек, жакшы үмүт,
Ага арналган ак бата,
Бата, бата, ак бата,
Элим берер ак бата.

Жамгырдан жер көгөргөндөй,
Батадан эл көгөрдү.
Бата алган кыз-келин,
Көшөгөсү көгөрүп,
Эр азамат төрөлдү.

Элим-журтум, уккула,
Кыргызымда той мына.
Улак тартмай, ат чапмай,
Эр жигиттер чыккыла.

Кошой атам кел мага,
Колдоо батаң бер мага.
Бакай атам кел мага,
Небереге той бердик,
Ак батаңды бер мага.
Элге карап кол жаят,
Той өткөргөн чоң ата.

Эмгек кылсам элиме,
Мээнет кылып жериме.
Элим берсе ак бата,
Эмгектенсең эр жигит, шер жигит,
Дем кошулар демиңе.

Эл-жер үчүн жан берген,
Чолпонбайга, Дүйшөнкулга ак бата.
Айланайын ак бата,
Кыргызымдын батасы,
Чыңгызымдын атагы,
Манас атам, кел мага,
Күч-кубатты бер мага.
Бакай атам, кел мага,
Ак сакалың жайкалтып,
Ак батаңды бер мага,
Бата, бата, ак бата,
Элим берер ак бата
Ак бата.

Айылыңа капыстан барып калдым,
Көрөр замат көңүлгө жагып калдың.
Ырдап жатсам гүл сунуп чыгып келдиң,
Ошол бойдон каректе калып калдың.

Кайырма:
Кылыктанып кылчайып күлүп койдуң,
Сүйөрүңдү көзүңдөн билип койдум.
"Сезбей кетти сүйүүмдү" дебесин деп,
Мен да сени жалт карап күлүп койдум.

Ошол түнү уктабай ойгоо жаттым,
Ооналактап тынымсыз ойго баттым.
Көптөн бери жүрөгүм эңсеп жүргөн,
Ак сүйүүмдү акыры Оштон таптым.

Кайырма:

Кыялымда дайыма жанымдасың,
Өмүр бою издесем табылбасым.
Ортобузда чын эле сүйүү болсо,
Кадырыңа жетейин, карындашым.

Кайырма:

Бир досум бар кыздарга такыр барбаган,
Билим десе күн-түнү окуп талбаган.
Ошол досум үйлөнүп тойго чакырды,
Капа болот эртелеп жетип барбасам.

Кайырма:
Оштук досум үйлөнүп тоюна бардым,
Ашык болдум балдызынын көрүп чырайын.
Ал куркур да сүйлөбөй жанды кыйнады,
Эмне кылайын айтчы туугандар же ала качайын.

Күрүч-күрүч артына күрмөк суу ичтим,
Башы жакшы башталды буюрса иштин.
Тоодой көргөн досумдун сулуу балдызы,
Тоңуп калган жүрөктү кантип жибиттиң.

Кайырма:

Оштук кыздар чынында сулуу келишет,
Кыйындыкты сабырдуулук менен жеңишет.
Бажа болсом досума бажырайган ээй,
Куп жарашып баарысы туура келишет.

Кайырма:

«Аке» деген сөзүңдөн ананайын,
Акең болуу менин да самаганым.
Ушул бойдон түбөлүк калсаң экен,
Урмат-сыйды тартуулап,
Урмат-сыйды тартуулап мага ар дайым.

Кайырма:

Э-э-й, түштүк кызы,
Карындашым, садага,
Карындашым, садага,
Садагасы...

Канча өзүмдү сабырлуу кармабайын,
Алып эле баратат арбаганың.
Наристем, оо, назыңдан кагылайын,
Наристем, оо, назыңдан айланайын.

Кайырма:

Азырынча мен акең болуп койсом,
Анча-мынча бирөөдөн коруп койсом.
Айып этпе, карындаш, анан, анан, ай
“Аке” деген оозуңдан соруп койсом.