[Барс]

КИРДЕТПЕ КЫРГЫЗ КООМУН!. .
(Быйылкы талапкерлерге кеңешим)

Шакыйы бар жан сымак,
Шайлоого убарасың.
Убада кош-кош берип,
Жалганга сугарасың.

Жолду оңдоп бересиң э...
“Жок...” - дебей, чоң бересиң!
Айлык аз билесиң э...
Аның аз, ... сом бересиң.

Эстейсиң былтыр быйыл,
Кимдерге жууганыңды.
Эстейсиң канча экенин,
Эзелки тууганыңды.

Эстейсиң кайсы жылы,
Кимге не кошконуңду.
Эсептеп чыгасың бүт,
Куда сөөк, досторуңду.

Бул ырды окуп жатып,
Карадың капчыгыңды.
Чын эле аксыңбы, же...
Чычайбай айт чыныңды.

Эгер, сен, ушул болсоң,
Кимге таң бары-жогуң?!
Ойлонгун адам болсоң,
Элиңдин убал, сообун!
Кечикпей тизмеден чык,
Кирдетпей кыргыз коомун!

[Барс]

МАЙЛИБИ?
(Он жети жаштагы кызга жигиттин ыры)

Эмдейт деп сүйүү жаратты,
Эки күн ичтим шарапты.
Эсимди алган мастыкты,
Эки ооз сөзүң таратты.

“ Чыркыра – дедим – шолокто,
Чын сүйүү болот жомокто!.. ”
Айттырбай ушул арманды,
А шондо айтсаң болот го!

Кыз деген наздуу сылык бу,
Кылыпсың анда кылыкты.
Бүгүнкү айткан бул сөзүң,
Бүт денемди жылытты.

Таштайлы жаман адатты,
Баштайлы жаңы баракты.
Ичиркенткен сөз менен,
Ичирбе эми шарапты!

Жаңырган жылдын жай күнү,
Жашыңдын толот ай, күнү.
Баарысын тойго чакырып,
Баш кошкон ойго, майлиби?!
24. 10. 2021-жыл.

[Барс]

ЖАҢЫ ТАЛАПКЕРГЕ ДАГЫ БИР КЕҢЕШ

Айтканыңдын акыр жагы кандай болот акыл ченеп билбей туруп,
Алп калпыңды жатасың эй, кимге сунуп?..
Алдын ала айтаар сөзгө парасат сал, калбайбы арасат ал, эсиңе тут,
Аның эртең кетпес үчүн дилде унут!?

Антыктан, сен, жалпы журтка жага турган, жарыкка алып бара турган,
Алгы жагы жаш муунга кала турган,
Оюңду айт: жалганы жок, арманы жок, пикири жок жалаа курган,
Обонду кой кур кыйыкырык, ара туулган!

Айтайынбы: адамдар көп ичи жылан, өңү тууган,
Аларыңдын баарысынан эбак эле көңүл сууган.

[Барс]

БУЛАКТАГЫ ОТ


Эсиңдеби жолуккан кез булактагы,
Экөөбүзгө көз, сөзүбүз унап калды...
Утуру эле өбүшкөнгө тоскоол болду эй,
Улактардын аскадан таш кулатканы...


Булакты көр жайгашканын аска жаны!
Улакты көр жок сыяктуу башка жайы.
Жерге киргир, мени кара, кыз бет тоссо,
Жер силксе да, өбүшүүнү баштабайбы!


Жо-ок антпедим, эки жакка элеңдедим,
Аскадагы улак өңдүү сереңдедим.
Анан кайра түзөлдүң да, кош айтыштың...
“Келесиң э?”, “Ооба, эртең келем... “ – дедиң.


Ошол бойдон ал булакка келген жоксуң!
Булак турат, жанында мен күйгөн отмун!


ЧАКЫРЫК


Байгеге коштум далай күлүктөрдү,
Байге алып көбү актады үмүттөрдү.
Кээ бири аксап калып жарым жолдо,
Кээлери жеңиш менен күлүп келди.


Бүгүн да коштум күлүк аламанга,
Барсын дейм ташыркабай жалаң алга.
Парасыз алып калса баш байгени,
Пайда эмес ойлонгула жалаң мага.


Кынтыксыз болсун десең ушул жарыш,
Кыйкыр, сүрө издебей тууган, тааныш.

[Барс]

* * *
Жүрө-жүрө табылдың издегеним,
Жүрөгүңө жазылган тизмеде ким?
Жалбыртатты, ышкымды козгоп салды:
“Жалгыз гана оюмда Сиз...” – дегениң!

Ыраазымын түз айткан түздүгүңө,
Ырахатка бөлөдүң күз күнүндө.
Эми мынча болгон соң, ананайын,
Эриниңди тосуп кой үстөгүнө!

[Барс]

ЧЫРЛАМЕНТТЕГИ ТАЛКУУ


Бийлик: " Бирге дагы бирди кошсок, эки болот."

Оппозиция: " О жо-жок, бир жарымга жарымды кошсок гана экиге толот!"


Супероппозиция: " Эй нонок, жарымга бир жарымды кошсоң анан эсеп оңолот!"


Ультрасупероппозиция: " Эй сабаты жок, акылы чолок!
Бир бүтүн ондон бирге, нөл бүтүн ондон тогуз кошулганда гана экиге оңдолот..."


...Убакыт болсо адатынча алдыга токтобой желет...
Ушундан улам “ЭТЕГИБИЗ ЭКИ БОЛБОЙ” келет!

Билдирүүнү түзөткөн: Барс: 26 Июль 2023 - 11:35

[Барс]

СҮЙҮНҮЧ


Кан керек бейм кыргызга,
Каның соруп, кактоочу!
Ошондо да көбөёт,
Обу жоктон жактоочу!


Жакшы жагын мисалдап,
Жаңы ханды жактап көр.
“Жанагылар” жабыла:
“Жагымпоз, - дейт – пахтакор! ”


Жакшысын айт бийликтин,
“Жугундукор” – дешет эй!
А өздөрү, кысталак,
А... к...сын койбой жешет эй!


Адам ыйык эч болбойт,
Ар идолго сыйынба!
Акыл сөзүң аңдап айт,
Ар бир пикет, жыйында!


Тантышат кээ чоңдоруң,
Даярдансын үйүнөн.
Ушуларды окутпай,
Калганыма сүйүнөм!


10. 02. 2022-жыл.

Билдирүүнү түзөткөн: Барс: 10 Февраль 2022 - 20:28

[Барс]

* * *
Айлык жолдо арыбастан тынбай чуркаар,
Арык жылкы арасында тулпары бар.
Карга сымал кык чокулап күн өткөрбөс,
Канаттуулар арасында шумкары бар.


Айкөл эмес бардык эле амалы бар,
Акылы кем арасында жаманы бар.
Анчейин бир жандай көрбө кедей болсо,
Алардын да арасында Адамы бар!

Аксы. Иринжит. 29. 04. 2023.

[Барс]

* * *

Карылыкка болбоюн деп өтө катаал,
Коюп алдым кыска мурут, чокчо сакал!..
Жактырганың чын көңүлдөн куттук айт да,
Жактырбасаң шылдың кылып күл да, чакал!

Прикрепленные изображения

• 

Билдирүүнү түзөткөн: Барс: 29 Июль 2023 - 10:10

[Барс]

ЖООП КАТ КҮТҮП ЖАТЫРЫМ...

Айтпагам “А” деп атымы,
Алдыңбы берген катымы?
Жалбырттап жазган ырымын,
Жакпады бекен татымы?

“Жүрөктө сен – деп – жакыным”,
Жүрөмүн эңсеп акыры-ын...
Жоругуң курсун, күн өттү
жообуң жок, күтүп жатырым.

Күттүрүп жообуң качырдың,
Күйүттү абдан ашырдың.
“Сүйөмүн! .. “ – десең, ачык жаз,
Сүйбөсөң жазба... ачыгын.

Акыркы үмүт соолбосун,
Ак сүйүү болсун жолдошуң.
Азгырып кетчү өзүңдү,
Азыткың жанда болбосун!

Мыжыкпай жүрөк толтосун,
Мага бер, секет, оң жообуң.
Маарытар катты жазаарда,
Сени
Махабат пири колдосун!
Аксы.
09. 08. 2023.

Билдирүүнү түзөткөн: Барс: 21 Август 2023 - 13:52

[Барс]

КЫШТЫН КЫСКА ТҮНҮ...

Агамдын минип быштысын,
Айлыңа барсам кышкысын.
Кериле тосуп, суйкайып,
Келтирдиң акын ышкысын.

Оозумду ачсам шыр ыргак,
Оюма келет ырым бат.
Сууна кошуп чайыңдын,
Сундуңбу эргүү ырымдап?

Күкүктөп толгон кесеге,
Күлгүндөй курак кез эле.
Күттүрбөй көпкө, жарыктык
кышкы күн, батты тез эле.

Бай бермек белек жыргалды,
Билген соң кийин сыздаарды...
...Демейде узун кышкы түн,
Дал ушул түнү кыскарды.

Жолотпой жанга муз-карды,
Жоготтук ал түн ызгаарды...

[Барс]

АДАМДАРГА КАЙРЫЛУУ

Адам пенде дайым эле аппак туулуп,
Анан дайым периштедей аппак туруп,
Анан неге кандайдыр бир жагдайларда,
Азизилге айланышат кубулушуп?..

Бул бир жумбак алмустактан берки собол:
Болсун адам мейли сылык, же бир чогоол.
Бирин-бири жек көрүшүп, өлтүрүшөт,
Билбейм ким ал: “Башкаларга – деген – жоо бол!”

Бул өмүрдүн жалгыз жолу берилерин,
Болсо да ак, сары, кара терилериң.
Айбандарча акылыңа келбейсиң эх,
Акмактык го адамдыкты жээригениң.

Бул жашоодо кээ бириң бай, бириң бомуш,
Бириңде бар, бириңде жок ата конуш.
Андан көрө жардамдаш да тең жашоого,
Абдан эле керек бекен кандуу согуш!

Ичи тардык, көрө албастык куйрук улаш,
Илгеритен куткарбастай ушул жылас.
Өмүрүңдө жердин шарын бүт алсаң да,
Өлгөнүң соң жер табылат эки кулач.

Азаптарга малынбасын Адам башы,
Ар бириңер сактагыла, Адамзатты!

Билдирүүнү түзөткөн: Барс: 18 Ноябрь 2024 - 11:58

[Барс]

ЭСКЕРТҮҮ
Азырынча кадырлуусуң – мүмкүнчүлүк бар!
Айланаңда шаан-шөкөттөр, майрам, салтанат.
Жардамыңды күткөндөр көп, баарысы үчүн,
Жанжагыңа жакындашуу кайдан, жалтанат.
Бир-биринен өткөрүшө жарышкансышып,
Макташканда, даңкташканда тилден бал тамат.

А азырчы, алсыз болдуң, кана ошолор?
Арсыз сыйын кетишиптир кайра талкалап...

Азырынча кадырлуусуң – колуңдан келет,
Аалам уучтап тургансыйсың. .. улуксунасың.
Анан эле алдан тайсаң, жашың улгайса,
Ал сыйлардын бири да жок – унутуласың.
Эч болбосо жылуу жазган салам келбестен,
Эзет арман! Мына ошондо улутунасың. ..

Тарыхтагы улуктардын тагдырын окуп,
Так билсең да, анан неге улуксунасың? !