[Барс]

ОЙЛОН ДА, ТАЛДА!..
Жылкыңды сойдуң, а жалы – чарым,
Жыластын ою – тойгузуш карын.
Картасы майсыз, чучугу “жансыз”,
Каңырык түтөп, турасың алсыз!

Эсил жан өттү , көмгөнүң шөкөт,
Эсиңди көзөп, уу сөздөр өтөт:
- Атасын ардак көмгөн жок уулу...
- Анысы неси, капырай, көтөк!..”

Дешет да сага, жугунду куят,
Демиге угуп, дейсиң да: “Уят!..)
Өзөгүң өрттөйт, а бирок айтчы,
Өлгөн жан кайдан аныңды туят?!

Турмушуң кантет, эртеңиң ойло,
Түк айтпайм кара сойгун, же сойбо.
Алам деп мөрөй ысырап кылып,
Азалуу күндү айлантпа тойго!..

Өмүрдө аны жеткиргин сыйга!
Өткөн жан сезбейт: ыйлаба, ыйла,
Кошогун кошсун, өкүрсүн мейли,
Кодулап аны жаман деп тыйба!

Мисалды айттым келтирип жалга...
Миң жолу муну такта да, талда!
Молдокең: “Сен!..” – деп, шаманың: “Сен!..” – деп,
Моюнуң толгоп, талоонго алба!
САЛТтын да, ДИНдин ортосун карма!
19. 05. 2022-жыл.

Билдирүүнү түзөткөн: Барс: 21 Май 2022 - 16:05

[Барс]

КЫРГЫЗЧА ДИЕТА
(тамаша-чыны аралаш)

“Эртең мененки тамакты эч кимге бербе,
Түшкү тамагыңды досуң менен бөлүш,
Кечки тамагыңды душманыңа бер, жебе...” –
Деген сөздү бир жерден окуп калдым.
Ушунун маңызын абдан талдоого алдым.
Тил алчаак жан эмесминби, чиркин,
Эртең мененки тамакты эч кимге бербей,
Калтырбадым,
идишин көңтөрө ашап салдым.

Түшкү тамакка бардым,
Бөлүшөйүн десем бир да дос көрүнбөйт!
Анан не кылмакмын,
Калса убал болот деп,
Биринчисин да, экинчисин да жымырды кардым.

Кечки тамакта конокто болдум,
(Карасаң оң болгонун жолдун!  )

Дасторкон үстүндө: кесилген карта, чучук,
бүкүлү бышкан тоок жана
салаттардын түрүн айтпай-ак коёюн эми...
Алардан “ооз тийип” жатканыбызда
оболу куурдак келди,
Анан шорпо менен самса жээлди.
Аз өтпөй эле бирден майлуу жилик тартылды,
Аны мүлжүп бүтүп бүтпөй,
беш бармагын берди...
“Бул отургандардын баары туугандар, достор го?!” – дедим.
Душман мында жок болсо, ким бермек элем,
Баарысын эле өзүм жедим!
P.S.
Жагымдуу сөз бар эмеспи элде:
“ Жакшы тамак калганча,
жарылсын карын!”
А баса,
дасторкондо артып калганды,
аларды калтырбай калтага салганды...
у. с. ж.б. ларды,
Айтып отуруштун кажети жоктур э, баарын?!

Билдирүүнү түзөткөн: Барс: 21 Май 2022 - 16:12

[Барс]

Сатиралык саптар...

КОШУМЧА СУРОО

- Уурулук жаманбы?
- Жаман!..
Ушинтип жооп берери чын
баш көтөрүп, басып жүргөн бардык тирүү адам.
Эл байлыгын эсепсиз тоноп жаткандар,
Эченин уурдап, четке каткандар,
Кашкая билинсе эле кылыктары,
Калкынан безип качкандар,
Же “кусуп”,
Же “куса албай” камактын даамын таткандар,
Ошого карабай,
алардан сабак албай,
дагы деле улантып, кемиргендер,
эл ичинде билинбей семиргендер,
Кимдер?
Адамдар эмес, алар анан
баягы эле макулук келемиштер менен чычкандарбы жалаң?!
03. 06. 2022-жыл.
.
АЙТКЫЛАЧЫ, ТУУГАНДАР!

Бул опасыз күндөрдөгү биздеги чоң жаңылык:
кошоматчылыктын усулу жаңырып
баратканы анык.
Кыргыз жергесинин пахта айдалбаган жеринен деле,
пахта койгучтардын, т.а. “пактачылардын”
жаңы тобу чыкты чамынып.
Ишенбесеңер уккула сөздөрүн
чоң башчыга айтып жаткандарын жагынып:
- Биз Сизге берилген ишеничтүү,
акыйкатты айтчу кишибиз!
Ачыгын айтсак: быйылкы мыкты ишиңизден да,
элибиздин бактысы деп билебиз
эмдиги жылы аткара турган ишиңиз!

- Билбей жүрөсүз да өзүңүздү өзүңүз:
Кечээ өткөн чогулушта керемет мазмундуу айтканыңызга караганда,
акылмандуулуктун, дааналыктын нак үлгүсү болот,
келерки айларда өтүүчү чогулуштарда айтуучу сөзүңүз!
- Сиз бул жарыкка бир жаралып калган жалгыз жансыз,

Сизди көрүп, бул укмушка баарыбыз таңбыз...
Бизди башкаруу Сизге түбөлүк насип этсе экен,
жашообуз тык токтойт ансыз!”

Ойлоп алып: “Мен булардан кантип кем калам?..”
Ошол замат бирөөсү айтты ошол чоңду жандаган:
- Жер жүзүндөгү адам сөрөй макулуктарга таң калам!
Аларды бир күндө акылына келтирип, теске салмакмын,
бийлигим болсо, жетсе чамам.
Акыйкат сөздүн ачыгын айтсам:
Дүйнөнү башкарышы зарыл эртеңден баштап
Сиздей улук Адам!

“Пара бер!
Пара берүүгө чамаң жок болсо, кошоматты кош колдоп,
бара бер!” – дешчү экен илгеркилер какшыктап.
Ошол сөздү девиз тутуп,
жыйнаган абийирибизди, ар-намысыбызды кашыктап,
ушинтип чачып салып жатабыз чакалап,
кош колдоп: “Ураа!” – лап да, “ха-ха!..” – лап,
Мындан башка дагы не десек болот,
айткылачы туугандар,
Бул ырга керекпи, же дагы бир ашык сап?!.

[Барс]

КИМГЕ БАР АЙТЧЫ КЕРЕГИ?

Арзыганың кирбесе,
Түштүн кимге кереги?
Сергектикти бербесе,
Үштүн кимге кереги?

Кебепке эт болбосо,
Шиштин кимге кереги?
Чайнап тамак жебесең,
Тиштин кимге кереги?

Ичкен сайын кустурган,
Аштын кимге кереги:
Калдайган чоң, иштебес
Баштын кимге кереги?

Дос-тууганга чимирген,
Каштын кимге кереги?
Жалпы элге пайдасыз,
Жаштын кимге кереги?

Бака гана чардаган,
Саздын кимге кереги?
Байчекексиз, көктөмсүз,
Жаздын кимге кереги?

Бир жылдызча нуру жок,
Айдын кимге кереги?
Жайлоосу жок, аптапсыз,
Жайдын кимге кереги?

Эгини жок, багы жок,
Түздүн кимге кереги?
Түшүмү мол болбогон
Күздүн кимге кереги?

Борбор шаарды каптаган
Ыштын кимге кереги?
Кара суук, кары жок,
Кыштын кимге кереги?

Суу акпастан, чөп чыкпас,
Сайдын кимге кереги?
Бечарага пайдасыз,
Байдын кимге кереги?

Эмгек кылбай төгүлгөн,
Тердин кимге кереги?
Үйдө баатыр жоодо жок,
“Шердин” кимге кереги?

Айыбы жок төгүлгөн,
Кандын кимге кереги?..
Калкка камкор болбогон
Хандын кимге кереги?

Мааниси жок жадатма
Сөздүн кимге кереги?
Жакшы жагың көралбас
Өздүн кимге кереги?

Үйлөгөндө жарылган
Шардын кимге кереги?
Жаныңа ынак болбогон
Жардын кимге кереги?

Чаңкаганда табылбас
Сууңдун кимге кереги?
Баштаган ишиң улантпас
Уулдун кимге кереги?

Сергитпесе ысыкта
Сыздын кимге кереги?
Абийири жок, уятсыз
Кыздын кимге кереги?

Буудай орок маалында,
Жаандын кимге кереги?
Пара берсе, сатылган
Наамдын кимге кереги?

Акылы пас, соройгон
Бойдун кимге кереги?
Сар-санаадан башка жок,
Ойдун кимге кереги?

Ынтымакты ириткен,
Чырдын кимге кереги?
Окурманды эргитпес,
Ырдын кимге кереги?

Жазып жатып бул ырды,
Өзүмө собол беремин:
“Акын мырза, Айтмырза,
А сенин барбы керегиң?!. ”

Билдирүүнү түзөткөн: Барс: 28 Июнь 2022 - 13:09

[Барс]

Ширелүү аялы бар, шириндикти сүйгөн жигиттин ыры
( азил)

Кант эриндүү кыз издедим. Жолуктум...
Кантсе дагы үйлөнөм деп оолуктум.
Көйгөйлөрдүн баарын жеңип, акыры
Көп узабай ошол болду колуктум.
Тамшанамын ошондогу күндөргө,
Таалай-бактын идишине толупмун.
Таттуулукту жакшы көргөн жан элем,
Тыным албай нават тилин сорупмун.
Баштап алган ал өнөрдү улантып,
Больницага түшкөн күнү соолуктум!
Катындын да көп татуусу жаман бейм –
“Кант диабет” деген менен оорупмун...

Таштайт окшойм таттуу сорчу жорукту!

[Барс]

С. ЕСЕНИНДИ ЭСКЕРҮҮДӨН СУРОО

“Азгырылып мурункулар биз окшоп
алданбаган! ..” – жаңылышат десе ким.
Көркү менен, ыры менен жагымдуу,
Көп сулуунун таап жүргөн “эсебин”,
Армян кызды перс кызы деп жаңылып,
Ага көп ыр арнаптыр го Есенин?!

Жакыныраак барбай жатып бир аз да,
Жашагансып Перс калаасы Ширазда.
“Секеттерди өбүш жагын төшүнөн,
Саади акындан алам – дептир – мураска”.
Акындарга баары бирби кайсыл жер,
Адашышат окшойт сүйүү гүл ачса?!.

Айымдарды тартып алган шак эле,
Акыныңдын артыкчылык жагы эле.
Баш-аягы отуз ашык сулуудан,
Баш урбаптыр ага жалгыз Шагане!
Алигече акыл айран, табышмак,
Алы жетпей калды экен ага не?!