«Жакында президенттик шайлоо болсо, кимисине добуш берет элеңиз?» деген сурамжылоонун кезектеги жыйынтыгын тааныштырабыз. www.super.kg расмий сайты менен катар Ош жана Бишкектеги сурамжылоолордун жыйынтыгы боюнча ажо болчулардын мүмкүнчүлүктөрүн карап чыктык.

WWW.SUPER.KG сайтынын сурамжылоосу (5%дан көп добуш алгандар):
Алмазбек Атамбаев (16,3 %), Өмүрбек Текебаев (16%), Адахан Мадумаров (15,5%), баарына каршы (9,5%), Камчыбек Ташиев (8%), булардан башкасына (7,4%), Мелис Мырзакматов (5,2%).

“Дизель” форумунун сурамжылоосу (5%дан көп добуш алгандар):
Баарына каршы (19,6%), Нариман Түлеев (13,8%), Феликс Кулов (11,5%), Алмазбек Атамбаев (8,7%), Темир Сариев (6,4%), Өмүрбек Текебаев (5,8%), Өмүрбек Суваналиев (5,2%).

“Акипресс” сайтынын сурамжылоосу (5%дан көп добуш алгандар):
Алмазбек Атамбаев (18,7%), баарына каршы (14%), Өмүрбек Текебаев (8,4%), Адахан Мадумаров (8%), Марат Султанов (6,4%), Темир Сариев (5,7%), Камчыбек Ташиев (5,5%).

Популярдуу деп аталган сайттардын жыйынтыгын талдап көргөндө, жалпысынан “АКИpress” менен www.super.kg сайтындагы сурамжылоолордун жыйынтыгы окшош чыкты. Андагы ысымдар дээрлик жанаша жүргөндүгү даана көрүнөт. Ал эми орус тилдүү колдонуучулары басымдуу болгон “Дизель” сайтынын жыйынтыгы кыйла айырмаланып турат.
Баса белгилөөчү жагдай, www.super.kg сайтынын колдонуучулары басымдуу кыргыз тилдүү болушса, ал эми “АКИpress” менен «Дизель» сайттары, негизинен, орус жана кыргыз тилдүү колдонуучулардан турат.

Ош шаары боюнча (5%дан көп добуш алгандар):
Адахан Мадумаров (43,5%), Камчыбек Ташиев (29,5), Мелис Мырзакматов (14%), Акматбек Келдибеков (10%).
Сурамжылоону жүргүзгөн Уулбү Каныбекованын айтымында, 40-45 жаштан жогору шаардык тургундар, негизинен, Адахан Мадумаровду тандашкан. Алар муну “бул киши азыр кызматсыз” деген сыяктуу сөздөр менен түшүндүрүшкөн. Ал эми 20-35 жаштын өкүлдөрү жалпысынан Камчыбек Ташиев менен Мелис Мырзакматовго добуш беришерин айтышкан. Сурамжылоого жалпысынан 200 киши катышкан.

Бишкек шаары боюнча (5%дан көп добуш алгандар):
Алмазбек Атамбаев (20,5%), Өмүрбек Текебаев (20%), Адахан Мадумаров (12,5%), Өмүрбек Бабанов (10%), баарына каршы (8%), Темир Сариев (6,5%), Феликс Кулов (6%), Камчыбек Ташиев (5%).
Ал эми Бишкек шаары боюнча абал бир топ башкача. Анда 40-60 жаш курактагы жооп берген эркектер басымдуу түрдө Алмазбек Атамбаев менен Өмүрбек Текебаевди тандашты. 25-35 жаштагы эркектер көбүнесе Адахан Мадумаров менен Камчыбек Ташиевге добуш беришкен. Cалыштырмалуу жаш саясатчы болгон Өмүрбек Бабановго, негизинен, аялдар өз колдоосун билдиришти. Сурамжылоого жалпысынан 200 киши катышкан.

СОҢКУ СӨЗ ОРДУНА
Беш түрдүү булак боюнча сурамжылоонун орточо жыйынтыгына ылайык, Кыргызстандын беш саясатчысы президент болушу мүмкүн деген тизмеде алдыга чыкты (6-орунда Ф.Куловдон анчалык аз эмес артта Н.Түлеев турат). Интернет чөйрөсүнүн колдонуучулары сурамжылоого жандуу катышкандарга караганда, «баарына каршы» деген жоопту көбүрөөк узатышкан. Демек, бул топтун өкүлдөрү кырдаалдын өзгөрүшүнө карай өз тандоосун шайлоого чейин өзгөртүшү да ыктымал.
Ош шаарындагы сурамжылоонун катышуучулары, негизинен, А.Мадумаров, К.Ташиев жана М.Мырзакматов менен чектелүүнү туура көрүштү. Ал эми Бишкекте катышкандардын жооптору көп кырдуу чыкты.
Президенттикке аттанчу талапкерлердин арызы БШКга берилип бүтө электигин эске алсак, анда сурамжылоолордун сезону али алдыда экендигин айта өтөлү.

Эльвира Караева
koom@super.kg