Президенттикке ат салышууга ниетин билдиргендердин саны 40тан ашып барат. Каттоо мөөнөтү аяктаарына саналуу күндөр калганда алардын арасында “оор салмактагылардын” ысымдары атала баштады. Жекшембиде “Ата Мекен” съездин өткөрүп, президенттикке лидери, ЖК депутаты Өмүрбек Текебаевди көрсөтүштү.
“Алдыдагы шайлоого биз сөзсүз катышышыбыз керек. Биз анда жеңишке жетүүгө милдеттүүбүз! Бул – биздин парз. Ишенимдүүлүк менен чечкиндүүлүккө убакыт келип жетти!”- деген башкы “ата мекенчи” калкты жаңы заманга багыттап, Кыргызстандын саясий аренасына жаңы саясий системаны, саясий элитаны алып келерин убада кылды.
«Эркин Кыргызстан» партиясынан Турсунбай Бакир уулу, «Мекен ынтымагы» партиясынан Темирбек Асанбеков да жарышка ат салышышат. Ошондой эле Жогорку Кеңештин депутаты Марат Султанов да өз талапкерлигин койгон. Ал эми “Эгемен Кыргызстан” партиясынан ажолукка талапкерлигин койгон Бектур Асанов “Ата Мекенди” колдоорун айтып, БШКдан арызын кайтарып алды.