20-октябрда КТРКда дебат үчүнчү ирет болуп өттү. Иш жүзүндө бул программага элдин көпчүлүгүнүн купулу толбой, талапкерлер талашып-тартышуунун ордуна, негизинен, алып баруучулар менен кайым айтышып, убакытты өткөрүшүүдө.

Дебаттын алгачкы үч күн аралыгында эң көп кызыгууну Байболов,
Мадумаров жана Ташиев жарата алды.

БАШЫНДАГЫ ТӨӨНҮ ЭМЕС, ӨЗГӨНҮН ЧӨБҮН КӨРҮП...
17-октябрда дебатка Адахан Мадумаров, Марат Иманкулов жана Сооронбай Дыйканов катышып, бул күн “Бүтүн Кыргызстандын” лидеринин “журналисттердин тилин жулуп эмес, кесиш керек” деген сөзү менен эсте калды. Программанын жүрүшүн талкууга алган интернет чөйрөнүн активдүү колдонуучулары алып баруучулар Кубат Оторбаев менен Динара Сүйүмалиеванын бейтараптуу эмес позицияны кармап, көбүрөөк мурунку бийликтин өкүлдөрүнө чабуул жасагандарын айтышууда.
Анча таанымал эмес Дыйканов дебаттын эсеби менен өзүн пиарлоого жетишсе, УКМКнын башчысынын экс-орун басары Иманкулов убактысынын көбүн актанууга коротту. Мадумаров “шайлоо кампаниясын Жаныш Бакиев каржылап жатабы?” деген суроону четке кагып, “ал өзү качып жүрөт экен, андан көрө жардам берип койбойсуңарбы?” деди. “Ушул эле сыяктуу кепти Ташиев таратыптыр” деген кепке “Ташиев аны түшүндө көрсө керек” дебеспи...

“СИЗИҢ-БИЗИҢ”, “ИНИМ-АЖЫ АКЕ” БОЛУШТУ
Дебатка экинчи күнү талапкерлер Камчыбек Ташиев, Турсунбай Бакир уулу жана Алмаз Каримов чыгып, кыргызчылыкты эске алган Бакир уулу “иним” деп кайрылса, Камчыбек мырза “ажы аке” деген сый көрсөтүүдөн өтө алышпады.
“Ата Журттун” лидери "былтыркы жылы Москвадагы сауналардын биринде Келдибеков, Ташиев, Түлеев жана Айдар Акаев жолуккан” деген сөздөргө карата “Нариман мончонун буусуна көпкө отуруп калса керек, көзүнө бирдемелер көрүнүп...” деп жооп берди. Ташиев керек болсо мындай суроолордон улам алып баруучуга "этият болуңуз" деп эскертти. Бакир уулу “халифат курбайм” деп кайталап жатып, алты ирет намаз окуй турганын жар салды. Жалпыга бейтааныш Каримов дале таанылбаган бойдон кала берди.

ТАК ТАЛАШУУДАН ЧЫККАН ИЮНЬ ОКУЯСЫ
19-октябрдагы дебатка Кубатбек Байболов, Кубанычбек Исабеков жана Анарбек Калматов катышып, жогорку эки күнгө салыштырмалуу дебат аты-затына көбүрөөк жарашты. Же түрдүү күчтөрдүн өкүлү чогулгандыктанбы, талапкерлер бири-бирине бурчка такаган суроо беришти.
Байболов: “Июнь коогалаңы так талашуудан келип чыккан. Эгерде үч күн эрте өзгөчө кырдаал киргизилгенде, мындай жоготуу болмок эмес”,- деди. Андан тышкары экс-башкы прокурор катары жоопкерчилик менен бул калабага чет жерликтер да катышканын билдирди. Исабеков “Кумтөрдүн” чуусу жана “Ак жол” партиясындагы ишмердүүлүгү менен чектелди. Ал эми Калматов кезинде Максим Бакиевге жер тилкесин карматпай койгонун мактанууга үлгүрүп, учурда абалы оор “Ар-намыста” атмосфера эң жакшы деп жооп берди.