2011-жылдын 16-октябрында “Тумар” радиосунда үн режиссёр болуп иштеген Жаныбек Айдаралиевди белгисиз бирөө сабап кеткени тууралуу жазганбыз. Жаныбек ошол күндөн бери өзүнө келбей, жандандыруу бөлүмүндө өлүм менен таймашып, жашоо үчүн күрөшүп жаткан. Ал өзүнө келбеген күндө да, жүрөгү согуп, жашоо белгисин берип турган эле. Бирок жаш жүрөк чарчап, ажалга моюн сунду.
9-ноябрь күнү кечке маал анын каза тапканы тууралуу “Тумардын” жетекчиси Алексей Сидоров билдирди. Жаныбектин сөөгү ал туулуп-өскөн Нарын жергесине алынып кетти.
“Супер-Инфонун”, “Тумар” радиосунун, “Пирамида” телеканалынын жалпы жамааты Жаныбектин жакындарына, жубайы Айжан Кулибаевага (ди-джей Алина Баженова) терең кайгыруу менен көңүл айтат. Жаныбек, жаркылдаган жигит элең, жаткан жериң жайлуу, топурагың торко болсун.