Эсиңиздерде болсо, гезитибиздин №458-санында “Корея! Азгырыкпы же жыргал турмуштун дарбазасыбы?” деген аталышта Кореяга кеткен кыздардын турмушу тууралуу макала жарыяланып, кызуу талкуу жараткан. Айрым замандаштар жумурткадан кыр издегенге маш эмеспи. Жакында эле редакциябызга Альвина Өмүрзакова деген кыз келип, өзүнүн жагдайы тууралуу айтып берди.
Аталган макаладагы өз турмуш жайын айтып берген Айпери деген кызды Альвина менен алмаштырып, “сен экенсиң” деген сөздөр менен кайрылып жатышыптыр. Анда Айпери аттуу каарманыбыз ал жактан бактысын таппай, жолу болбой келгени тууралуу жазылган эле. Мындай окуялар, окшоштуктар көп болгондуктан, Кореяга барып келген кыздардын баарынан шектене бергенибиз туура эмес болор деген ниетте биз бул тууралуу жазууну туура көрдүк.
Макаладагы кызга окшоштуруп жатышкан Альвина Өмүрзакова өзүндөгү ыңгайсыздыкты түшүн­дүрүп берди. Өз кезегинде биз окурмандарыбызга ал макаладагы жарык көргөн кыз ал эмес экенин, Каракол шаарынын тургуну болгон Альвина аттуу кызга тиешеси жок экенин дагы бир жолу тактап, баса белгилеп айтып кетмекчибиз. Туура, көпчүлүк мекендештер сыяктуу Альвина да Кореяга барып иштеп, жашап жатат. Учурда учурашууга Кыргызстанга келген.
Альвина өз сөзүндө: “Ал жакта деле турмуш да. Мамилелери келишпей калгандары бар. Келишип, кыргыз жигиттеринен таппаган сыйды, сүйүүнү ошол жактан тапкандары да жок эмес. Корейлер жупуну, түшүнүктүү, элпек келишет. Бирок кыргыз кыздары кээде өз чегин билбей кеткенде акырын колунан жетелеп чыгарып койгон учурлар да кездешет”,- дейт.
Не демекчибиз, кайда болсо да, кыргыздын кыздары өз бактыларын таап жашап кетишин гана каалайбыз.

Нуржамал Жийдебаева
koom@super.kg