Бакиевдин тактан кетишине жарыкты тез-тез өчүрүү, анысы аз келгенсип баасын эки эсе көтөрүп салгандыгы бирден-бир себеп болгон. Бийлик алмашты. Бирок жарыктын көйгөйү чечилген жок.

“БААНЫ КӨТӨРӨЛҮ”
Жарыктын көйгөйү жанга батты. Кайрадан министрлик "креслого" келген Энергетика жана өнөр жай министри Аскарбек Шадиев элдин башына түшкөн кыйынчылык үчүн кечирим сурап, артынан эле электр энергиясына бааны көтөрүүнү сунуштады. Анын негизинде көп жылдан бери үзүлүп, оңдоло берип, азыр араң эле турган жабдуулар алмаштырылмакчы. Бирок баа аз-аздан бир канча жылдын ичинде көтөрүлүшү керек экенин айтат министр.
"Республика" партиясынын парламенттик шайлоо алдындагы "фишкасы" "электр энергиясын өз баасында" элге берүү болгон эле. Албетте, өз баасы дегенде эл арзандатуу деп түшүнүп, бул партияга добуш берген. “Жарыктын наркы көтөрүлсө, анда убада кайда кетет?” деген суроо туулат.

ТҮНДҮК ЖАРЫКСЫЗ КАЛАБЫ?
Борбор Азиянын энергетикалык алкагынан Казакстандын чыгуу аракети Кыргызстанга чоң коркунуч жаратууда. Эгерде боордоштор мындай кадамга барышса, анда Кыргызстандын түндүгү жарыксыз калат. Анткени Токтогул ГЭСинде өндүрүлгөн электр энергиясы Казакстан жана Өзбекстандын зымдары аркылуу өлкөнүн түндүгүнө келет. Аскарбек Шадиев учурда бул маселе боюнча кошуналар менен сүйлөшүүлөр жүрүп жатканын жана маселенин оң жагына чечилиши күтүлүп жатканын айтты.

“МААЛ-МААЛЫ МЕНЕН ӨЧҮРҮҮ БАШТАЛАТ” ДЕШЕТ
Көйгөйдү чечүү үчүн эми Энергетика министрлиги электр энергиясын эң көп колдонулган таңга маал жана кечки сааттарда маал-маалы менен өчүрүүнү сунуштайт. Бул планды жакын арада өкмөткө киргизмекчи болушууда. Ошондой эле ишканаларга лимит коюлуп, өлкөдөгү электр энергиясын таратуучу негизги компаниялар лимиттен аша чапкандардын жарыгын өчүрөт. Бул чектөөгө сауналар, автоунаа жуучу жайлар, кафе-ресторандар жана башкалар кабылмакчы. Министрлик мындай чектөө “Датка-Кемин” подстанциясы курулганга дейре созулушу мүмкүн экенин билдирет.