26-27-майда Бишкектеги «Дордой» спорт комплексинде гезитибиздин 10 жылдыгына карата футбол өткөрүп, байгеге тай сайып той бердик. Бишкектин булуң-бурчунан келген 14 команда баш байге үчүн кара терге түштү. Той демекчи, айыгышкан күрөштөр менен кошо ырчы-бийчилерден чакан шоу программа да орун алды. Ал тойдо биз да болдук. 2 күн бою таң аткандан күн батканга чейин созулган майрамда тарыхта боло элек окуялардан кеп салалы...

ФУТБОЛДУК МЕЛДЕШ ДЕП УШУНУ АЙТ
10 жылдык тарыхы бар «Супер-Инфо» гезити күйөрмандарын жыл ичинде 2 ирет чогултарын билесиз. Бири кышта өтчү суперконцерт болсо, бири мына бул футболдук таймаш. Май айы келип, «Супер-Инфонун» футболдук кубогу ойнотулуучу мезгил да келди. Быйыл гезитибиздин 10 жылдык мааракеси болгондуктан, футболдук мелдеш чоң мааниге ээ эле. Андыктан байге да өзгөчө болуп, баш байгеге тай сайылса, 2-орунга кой, үчүнчү орунга козу берүү каралган. Биздин жобобуз боюнча, командалар 2 топко бөлүнүп чүчүкулак тартышмак. 14 команданын 8ин 3 мобилдик оператор («Билайн», «Мегаком», «О!»), 3 суусундук чыгаруучу ишкана: «Аю», «Кока-Кола», «Шоро» жана «Дасмия» рестораны менен «Жогорку Кеңеш» командалары түзсө, калган 6 команда шоу өкүлдөрү, чыгармачыл чөйрө: «Тамашоу», «Театр», «Ырчылар» командалары, ММК өкүлдөрү: КТРК, «Супер-Инфо» жана гезитибиздин расмий сайты Super.kg`нин колдонуучуларынан куралган командалар экинчи топто болушту. Оюндар олимпиадалык негизде өтүп, «ыргымай» принциби колдонулду. Чейрек финалда 8 команда болуш керек болчу. Бул үчүн атайын жобо иштеп чыгып, жарым чейрек финалда эң минималдуу эсеп менен утулган бир команда чейрек финалдын жолдомосун алмак. Салтанат, салтка айлангандай, командаларды майданга чакыруу менен башталып, ар бири өзүнө таандык музыкалык чыгармалар менен чыга келишти.

«Театр» – Африк Симондун аткаруусундагы «Hafanana» чыгармасы менен.
«Билайн» – «Билайн» компаниясынын гимни.
«Дасмия» – УЕФАнын Чемпиондор Лигасынын расмий гимни.
«Мегаком» – «Мегаком» компаниясынын расмий обону.
Super.kg – «Danza kuduro» ыры.
«Шоро» – «Шоро» компаниясынын расмий гимни.
«Аю» – Шакиранын аткаруусундагы «Вака-вака» ыры.
«О!» – «О!» компаниясынын расмий обону.
«Кока-Кола» – «ЮАР-2010го» карата чыгарылган «Wavin flag» чыгармасы.
«Ырчылар & Бийчилер» – «Ai Se Eu Te Pego» чыгармасы.
«Супер-Инфо» – «Супер-Инфо» гезитинин расмий гимни.
«КТРК» – Улуу көч күүсү.
«Тамашоу» – «Тамашоу» Лигасынын расмий гимни.
«Жогорку Кеңеш» – «Гүлдө, Кыргызстан» ыры.

Андан соң элдин түздөнүүсү менен обого гезитибиздин расмий гимни жаңыртылды. Бул жолу аны Урмат Усенов, Добр, Сайкал Садыбакасова жана Чолпонай аткарып бериши. Анан гезитибиздин башкы редактору Шаиста Шатмановага сөз берилип, салтанат расмий түрдө ачык деп жарыяланды. Эжекебиз өз сөзүндө алгач бардык командаларга ийгилик каалап: «Супер-Инфо» бир нече жылдан бери негизги окурмандары болгон жаштарды жаман адаттардан арылууга, спортту сүйүүгө жана жакшылыктарга үндөп келет. Бул максатта суперфутбол уюшулуп жатат. Бул жолкусу өзгөчө, анткени бизге 10 жыл толду»,- деген кебин айтты. Алпаруучулук милдетти колго алган Бакыт Байсариев менен Назира Айтбекова андан ары чүчүкулакка орун беришти. Чүчүкулак тартууга «Супер сулуу-2011» сынагынын жеңүүчүсү Айсулуу Өмүралиева чакырылган эле. Кыргыздан чыккан айтылуу футболчу Эмил Кенжесариевдин карындашы Айсулуу атаандаштарды төмөнкүдөй кездештирди:
«Жогорку Кеңеш» – «Дасмия»
«О!» – «Билайн»
«Аю» – «Шоро»
«Мегаком» – «Кока-Кола»
«Ырчылар & Бийчилер» – «Супер-Инфо»
«Тамашоу» – КТРК
«Театр» – Super.kg

УЙКУНУ АЧКАН БЕТТЕШТЕР, ЖАНДУУ БАЯНДОО ЖАНА ЫР-БИЙЛЕР
26-27-май күндөрү «Дордой» спорт комплексине биз менен гезиттин 10 жылдыгын белгилөөгө эл агылды. Эртең мененки саат 9:30да башталганына карабай, беттештер көптөгөн күйөрмандардын курчоосунда башталды. Күн кечтегенге чейин аталган спорт комплексине каттагандардын аягы суюлган жок. «Супер-Инфо» үчүн 2 күндүк эс алуу күнүн курман кылган күйөрмандар кызыктуу оюндар жана жандуу баяндоолор менен майдан четинде уйкуларын умачтай ачып, атүгүл кумарга да кирип жатышты. Күндүн ысык аптабына карабай отургандары буга далил. Ырчылардан Нурлан Насип, Данияр Эрматов, Аскат Мусабеков, Дайыр Исмадияров, Урмат Усенов, Бактыгүл Бадыева, Чолпонай, Добр,Гүлзада, Кайыргүл обон созду. Анан да Хамза Латиповдун «Футбол» аттуу чыгармасы кечеге өзгөчө көрк кошту. Шоунун ортосунда «Береке» бий ансамблинин кыздары да келип, өзгөчө бий тартуулап кетишти. Өз кезегинде, убада кылынгандай, бекер балмуздак, поп-корн жана суусундуктар таратылды. «Суперфутбол-2012нин» тушоосун «Жогорку Кеңеш» менен «Дасмия» командаларынын оюну кести. Ар бир оюндан куйкум таап, көрк кошкон «тамашоучулар» Зияш менен Самат баяндоочулук «рулда» отурушту. Алар курч мүнөздө өтүп жаткан беттештерге кабак түйө үңүлгөн элди эрксизден жылмайтып жатышты. Ал эми экинчи күнү бул орунду КТРКнын спорттук баяндамачысы Кубан Атабеков колго алып, мыкты баяндап берди.

БЫЙЫЛ ПЕНАЛЬТИЛЕРДИН ЖЫЛЫ
Эрежеде жазылгандай, ар бир оюн 20 мүнөттөн 2 бөлүккө бөлүнгөн. УЕФАнын Чемпиондор Лигасынын быйылкы сезонунда популярдуулугун арттырган пенальтилер сериясы биздин мелдеште да көп командаларды куткарып калды. Айрым командалар тартынбай эле коргонууга жатып алып, оюндун негизги бөлүгүн тең ойноо менен пенальтиге укук алып жатышты.

1-КҮН. 26-МАЙ. ЖАРЫМ ЧЕЙРЕК ФИНАЛ.

«Жогорку Кеңеш» - «Дасмия» – 0:3
Депутаттар менен официанттардын бир талаада футбол ойногонун көрдүңүз беле? «Жогорку Кеңеш» командасын, мурда айтылгандай, Камчыбек Ташиев эмес, Эмгек, ишке орноштуруу жана миграция боюнча экс-министр, ЖКда бөлүм башчы Алмаз Абытов баштап чыкты. Эл өкүлдөрү Садыр Жапаров жана Дастан Жумабеков (экөө тең «Ата Журт» партиясынан депутат) болуп канчалык аракеттенбесин, баяндоочулар айтмакчы, официанттарды ута алышкан жок. «Ата журтчуларды» өзгөчө белгилеп кетпесек болбос. Намыс үчүн эт-бетинен кетишерин футбол талаасында кырчындай жаш официанттар менен жарыша чуркап жан үрөгөн Садыр Жапаров да, дарбаза кайтарган Дастан Жумабеков да далилдешти. Мелдеш өткөрүп жатканыбызды лидерлеринен тарта колдоп, майданда 2 депутаты ойноп кетти. Ал эми жылдагыдай эле «Ата Мекен» партиясынын мүчөсү Жоомарт Сапарбаев келем деп, бирок сөзүнө турган жок. Оюнга кайтсак, күнүмдүк жашоодо депутаттарды тейлеген официанттар майданда аларга футболдук меню боюнча башкача тейлөө көргөзүштү. Суюк тамактын ордуна биринчисине алыстан киргизилген гол, экинчисине болсо жекеме-жекеден гол «апкелип» беришти. Ал эми десертке айып соккусунан киргизилген гол болду.

«0!» - «Билайн» – 2 :3
Экинчи жарым чейрек финалда өлкөдөгү 2 ири мобилдик компаниянын таймашы курч мүнөздө өтүп, кара-сарылар жеңип чыкты. «Тамашоучулар» айтмакчы, эки уюлдук оператордо тең маал-маалы менен "сбой" болуп турса да, жеңишке карай «Билайндын» "бирдиги" көп болуп чыктыбы, акыркы мүнөттөрдө гол киргизип жеңишти илип кетишти.

«Аю» - «Шоро» – 0:0 (пенальтиден 4:2)
Чейрек финалдын 3-жолдомосу үчүн кийинки оюнга ичимдик жана суусундук чыгаруучу компаниялардын командалары чыкты. 20 жылдыгын белгилөө алдында турган «Шоро» компаниясы атаандашына караганда бир аз тажрыйбалуураак болсо да (суперфутболго былтыр да катышкан), негизги убакытта жеңишти өз жагына оодара алган жок. Пенальтилер сериясында бакыт кушу «Аюга» жылмайды.

«Мегаком» - «Кока-Кола» – 4:0
«Кока-Кола» учурдагы чемпион «Мегаком» менен ойноору белгилүү болгондо эле жеңишти колдон чыгарып койгондой кейип калышкан. Ал жөн жерден болбогонун биз майданда көрө алдык. Өз дарбазасына 4 гол өткөрүп алганына карабай, «колачылар» бир гол киргизүүнүн аракетин катуу көрүштү. Бирок алар «мегакомчулардын» темирдей коргонуусун тешип өтө алышпады.

«Ырчылар & Бийчилер» - «Супер-Инфо» – 2:0
Жыл сайын жеңилүүдөн башы чыкпай келген «Ырчылар» командасы быйыл өздөрүнүн мыкты сапаттарын көргөзүп, көпчүлүктү таң калтырышты. Буга курамына бийчилерден да кошуп алганы таасирин тийгизди десек жаңылышпайбыз. Мелдештин кожоюндарынын дарбазасына ар бир таймда бирден кооз гол киргизип, 2:0 эсебинде утуп алышты. Өз кезегинде «суперчилер» «былтыр «Гермес-профиге» 8:0 эсебинде утулганбыз, буюрса, жылыш бар» деп келечекке оптимисттик ойлорун билдиришти.

«Тамашоу» - КТРК – 2:2 (пенальтиден 3:5)
Бул оюнду, футбол тили менен айтканда, күндүн «камбэги» («come back» – «кайтып келүү») десек жарашат. «Тамашоучулар» 2:0 эсебинде алдыга чыкканы менен, эсепти теңетип жиберишти. Пенальтилер сериясында КТРК ийгиликтүү болуп чыгып, 5:3 эсебинде утуп кетти. Ошондо адатта жүздөрүнөн күлкү кетпеген «тамашоучуларды» сырттан көрсөңүз бооруңуз эзилбей эле, оорумак. Бирок жашоо сюрприздерге толтура демекчи, суперфутболдун эрежесинде каралган бактылуу команда жолдомосу дал «Тамашоуга» буюрду. Анткени алар жарым чейрек финалда жеңилбеген 2 команданын бири болуп («Шоро» «Аю» менен 0:0 ойноп, пенальтиден утулган), 2 гол киргизгендиги үчүн үстөмдүккө ээ болушту.

«Театр» - super.kg – 0:1
«Суперфутбол-2011дин» вице-чемпиондору Super.kg бул оюнда фаворит болчу. Алардын чоң эсептеги жеңишин божомолдогон күйөрмандардын ою туура чыга берген жок. Ойдо бышып жаткан чоң эсеп ишке ашпай, суперфорумчулар минималдуу эсеп менен гана жеңишке жетишишти. «Театр» курама командасынын бир жакадан баш, бир жеңден кол чыгарган биримдиктүү оюну мактоого арзырлык болду. Курсак байлаган куракка барып калган актёрлор Super.kg'нин жаш жигиттерине каршы мыкты оюн көрсөтүштү.