МИТИНГЧИЛЕРДИ КАРМОО КАЙРАДАН БАШТАЛДЫ
Бишкекте жол кире акысы кымбаттаганына студенттер бир топ нааразычылыгын билдирип, жыйынтык чыкпаган соң “Эркин эл” кыймылы мэриянын алдында митинг өткөргөн болчу. “Эркин эл” кыймылынын төрагасы билдиргендей, митингдин жүрүшүндө 2 активистти милиция кызматкерлери кармап кетишкен. “Милиция бизге "жолду тосуп алдыңар" деген айып коюп жатышат. Бирок биз жөн гана мэрия тарапты көздөй баратканбыз”,- деп кыймылдын төрагасы Мавлян Аскарбеков 24-майда журналисттерге кабарлаган болчу.
Митингдер менен Акаев кулатылган, Бакиев митинг менен келип, митинг менен куулду. Азыркы бийлик да эл түп көтөрүлүп чыккан митингдин арты менен келген. Бийлик бат эле өткөнүн унутуп кеттиби? Эл митингге айла кеткенде чыгарын азыркылар жакшы билишпейби?

СӨЗ ЭРКИНДИГИ КЫСМАККА АЛЫНДЫБЫ?
31-май күнү “Майдан.kg” гезитинин башкы редактору, "Ата Журт" партиясынын басма сөз катчысы Нургазы Анаркулов оперчилер тарабынан кармалды. ИИМдин берген маалыматына ылайык, борбор шаардын тургунунан акча өндүрүп алуу максатында аталган басылманын кызматкери тарабынан шантаж жасалып, талап кылган 11 миң сомду берүү учурунда милиция кызматкерлери Анаркуловду колго түшүрүшкөн.
"Балким, ошондой болгондур" деген менен, оппозициялык басылманын башчысы кармалып жатканынан улам бүдөмүк ойлор жаралбай койбойт. "Атайын ушундай оюн уюштурушуп, карматып жиберишпедиби?" деп... Буга чейинки бийликтер да оппозициялык маанайдагы басылмаларды ар кандай айып тага коюп, тизеге чаап келишпеди беле? "11 миң сом талап кылды" деп кармалган башкы редактордун иши башка кеп, ал эми миллиондорду сугунуп коюп, мандатына же депутаттардын актап жибергенине жашынып отургандарды кантебиз анда? Коррупция менен адилеттүү күрөшүү ушулбу?
Деги дежавю эместир. 7-апрелден бери оппозиция-позиция дебей жалпыга маалымдоо каражаттары эркиндикке чыгып калышты эле. Минтип эски бийликтин жышааны жыттанып, митингчилер менен журналисттерди кармоо, камоо башталса, мурунку режимдеги күндөр көзгө айласыздан элестей баштайт экен.