Кыргызымдын сыймыктанчу жигиттери ар тармактан санай келсең, Кудайга шүгүр, көп эле чыгат. Кыздар, кыялыңыздагы мырза төмөнкүлөрдүн катарында болуп жүрбөсүн? Байкап көрүңүз, өтө эле жагып баратса, телефон номерлерин беришибиз мүмкүн:)

САПАР ЭРКЕБАЕВ

Туулган жылы – 1982-жыл, 21-декабрь
Кичи мекени – Ош облусунун Кара-Суу районуна караштуу Баш-Булак айылы
Бою – 175 см
Салмагы – 80 кг
Фобиясы – Суу
Хоббиси – Уктоо
Жактырган жаныбары – Ит
Материалдык байлыгы – Айткысы келбейт
Кандай кыздар жагат – Шыңга бойлуу, толук эмес, жөнөкөй кыргыз кыздары

Бойдок ырчы жигиттердин катарында Сапар Эркебаев да бар. Учурда жүрөгү бош, көптөн бери кыялындагы кызды жолуктура албай келе жаткан мырза «мага жөнөкөй кыргыз кызы эле болсо болду» дейт. А калыңды болсо, кызга жараша төлөйт экен. Эгер сиз армандуу ырларды угуудан тажабай, ырчы мырзага өз колуңуз менен чай берип жанында жүргүңүз келсе, анда ашыгыңыз!

ЭРКИН РЫСКУЛБЕКОВ

Туулган жылы – 1988-жыл, 4-февраль
Билими – Кыргыз-Түрк «Манас» университетинин коомчулук менен байланыш жана жарнама бөлүмүн бүтүргөн
Учурда – КТРКнын Жаштар редакциясында баяндамачы, телеалпаруучу
Үй-бүлөдө – 5 бир туугандын кичүүсү. Эрке. Дагы эле апасынын коюнуна жатып алат
Кыздардан – Шайыр, бою узун кыздар жагат. Татынакай, бирок бою кыска кыз көрүп калса, «эх, бийигирээк така кийип алганда» деп коёт
Байлыгы – Блокноту жана калеми
Калың – Эжесине 1000 доллар эле алып келип коюшкан. Аялы эжесинен кымбатыраак болот

Телеалпаруучу Эркинге кызыккан кыздар, апасын жана өзүн сыйлап койсоңор эле, башканын баарына көз жумуп коёт экен. Эсиңизде болсун, «эркектер ашказаны менен» деп коёт го, сиз Эркинге балык кууруп же быштак жасап берсеңиз, жаңыласыз. Анткени ал балык менен быштакты сүйбөйт. «Жашоого көз карашым конкреттүү болуп калганда, 27 жашымда үйлөнөм» дейт журналист жигит. Эң негизгиси, боюңуз узун болсо, Эркинди иштеген жеринен же Пишпек кичирайонунан издеңиз.

СТАЛБЕК ДАРКАНБАЕВ

Туулган жылы – 1987-жыл, 24-март
Жылдыз белгиси – Кой
Кичи мекени – Нарын
Бою – 173 см
Салмагы – 71 кг
Материалдык байлыгы – Сыр тутат
Кыздардагы баалаган сапаты – Ыймандуулук, сулуулук
Спорттук даражасы – Кикбокс боюнча Эл аралык класстагы спорт чебери
Кыялындагы унаа – Мерседес

Бош убактысынын баары спорт менен өткөн, бир аз бош убакыт табыла калса, атайын курстарга шашкан спортчу жигитибиз Сталбек идеалдуу күйөө болчудай. Себеби ал убактысынын ар бир мүнөтүн пайдалуу өткөргөнгө аракет кылат. Ашканада тамактын түрүн жасай алат, өзгөчө эттен жасалган тамакты сүйүп жейт. «Ыймандуу, тартиптүү, ийкем, өзүнө каранган, татынакай кыздар менин кыялымда» дейт спорт чебери. Сталбекти атайын өтүүчү спорттук мелдештерден, машыгуулардан барып сынап, байкаштырып көрбөйсүңөрбү, кыздар?!

НУРБЕК САВИТАХУНОВ

Туулган жылы – 1985-жыл, 29-декабрь
Туулган жери – Фрунзе шаары
Бою – 185 см
Салмагы – 80 кг
Хоббиси – Музыка угуу, баскетбол ойноо
Билими – Борбордук Азиядагы Америкалык университеттин саясат таануу адистиги
Жашоодо корккону – Жан дүйнөнүн боштугунан, бир орунда токтоп калгандан
Акыркы окуган китеби – Дэвид Иглмен, «Инкогнито»
Кумири – Дэйв Мэтьюс
Билген тилдери – Англис, испан, орус тилдеринде эркин сүйлөйт
Учурда – «Yellow Blue Bus» тобунун мүчөсү, актёр, ырчы

Жеке жашоосун талкууга салгысы келбеген ырчы мырза учурда бопбойдок. Айтымында, Нурбекке келбеттүү, кымча бел, жылмайганда жүзүнөн нур төгүлүп, жүрөктөрдү туйлатып ийген кыздар жагат. Чет өлкөдө жашап калган ырчы жигиттин Кыргызстанда канча болору белгисиз, балким, сиз жубайы болуп калсаңыз, чет өлкөдө жашоо бактысы буюрат. Анан да борбор калаабызды «малышка» деп эркелеткен бул ырчы, албетте, сизди андан бетер эркелетеринде шек жок.

АКЫЛБЕК ИРСАЛИЕВ

Туулган жылы – 1986-жыл, 27-июль
Туулган жери – Ысык-Көл облусу, Жети-Өгүз району, Ак-Дөбө айылы
Үй-бүлөдө – 5 бир туугандын үчүнчүсү
Учурда – «Миң кыял FM» радиосунун ди-джейи
Кыздардан – Сулуу, кара көз, кара каштуу, узун чачтуу кыздар жагат. Өтө ачык кийинген кыздар жакпайт. «Тили узундардан Кудай сактаса экен» деп тиленет
Байлыгы – Угармандар берген белектери
Өнөрү – Устачылык. Камчы өрөт, жыгачтан терезе, эшиктерди жасай алат
Калың – Таластык кызга үйлөнөйүн десе, калың көп бериш керек экен. «Бере берсемби же башкасын караштырсамбы?..» деп ойлонуп жатат
Ичимдик – Эсин жоготуп көчөдө калган учурлар катталган эмес

Жаныңызда кооз сүйлөгөн романтик бала отурганын элестетиңиз. Анан да куурулган картошканы жакшы көрсө, үй жумуштарын катыра жасаса, андан сонун эмеспи. Ди-джей Акыл өзү көп сүйлөгөндүктөн, аз сүйлөгөн кыздарга көбүрөөк имерилет экен. Жашаган жери Турусбеков менен Токтогул көчөлөрүнүн кесилишинде же түптүз эле өзү иштеген радиого бара бериңиз.

ЭМИЛ НАДЫРБАЕВ

Туулган жылы – 1986-жыл, 18-январь
Кичи мекени – Ош облусу, Кара-Кулжа району, Чалма айылы
Бою – 175 см
Салмагы – 103 кг
Материалдык байлыгы – Үйү, квартирасы, унаасы бар
Хоббиси – Машыгуу жана киного тартылуу
Айдаган унаасы – Гольф-4
Өзүнө жаккан сапаттары – Боорукерлиги, ак көңүлдүгү
Жакшы көргөн жаныбары – Ат
Учурда – Бодибилдинг менен машыгат. 25-майда болуп өткөн бодибилдинг боюнча КРнын 21-ачык чемпиондугунда 3-орунду камсыз кылды

Кең далылуу Эмилдин кыялындагы кыз ыймандуу, акылдуу, тартиптүү, иш билги, көп сүйлөбөгөн сулуу экен. Калыңды болсо шартка жараша берет же ошол каражатты кайын журту менен кеңешип, керектүү нерсеге жумшасам деп ойлойт. Чымыр денелүү бул мырза кыздарды колунан эле байкап коёт. Эгер сиз дайыма колуңузга кам көрүп, маникюр жасап, тырмагыңызды таза алып жүргөн айым болсоңуз, анда спортчунун табитиндемин дей бериңиз. Эт менен картошканы кызарта кууруп бергенден тажабаган кыздар Эмилге жубай болушу мүмкүн.

АЗАМАТ АРЫКОВ

Туулган жылы – 1985-жыл,18-март
Туулган жери – Нарын
Бою – 175 см
Салмагы – 85 кг
Материалдык байлыгы – «Azman» студиясы, Субару Форестер үлгүсүндөгү темир тулпары
Өзүнө жакпаган сапаты – Жалкоолугу
Хоббиси – Тамак жасоо
Жактырган жаныбары – Ат жана ит
Кичинесинде актёр болом деп кыялданчу, максатына жетти

«Аят» тасмасынан кийин кыздардын жүрөгүнөн терең орун ала баштаган актёр жигит Азаматтын учурда башы бош. Калың маселесинен сөз кылсак, «шартка жараша, канча көп берсең, ошончо жакшы» дейт. Тамак жасагандан кадимкидей ырахат алган мырзага ашканада тамакка керектүүлөрдү аарчып, даярдап гана берсеңиз, калганын өзү жасап, шилекейди чубурткан даам даярдап берет. Кыргыздын кымча бел сулуулары, Азамат тарбия көргөн, маданияттуу, орундуу сүйлөгөн, билимдүү, шариятты түшүнө билген айымдар жагарын айтат. Андыктан актёр жигит көңүлүңүзгө туура келсе, «шансыңыз» бар.

Назгүл Исакова,
Перизат Музуратбекова
star@super.kg