Эсиңизде болсо, Нарын шаарындагы Кыргыз-Түрк лицейинин бүтүрүүчүсү Калысбек Абыкешов АКШда өткөн химия боюнча Эл аралык Олимпиадада 3-орунду алып келгендиги жөнүндө жазганбыз. Убакыт таап, Калысбек менен маек курдук. Калысбек 1994-жылы 6-февралда Панфилов районунун Кайыңды айылында туулган.

– Калыс, жеңишиң кут болсун!
– Рахмат.

– Олимпиадага канча мамлекеттен окуучулар катышты?
– Дүйнөнүн 72 өл­кө­сүнөн катышты. Ар бирибиз өз билим дең­гээ­либизди теориялык жана практикалык турларда көрсөттүк. Практикалык турда жалпысынан 40 балл алыш керек эле, мен 34 балл топтодум. Ал эми теориядан 60 болуш керек эле, андан 38 балл топтодум. Мындай көрсөткүчкө өнүккөн өлкөлөрдөн келген окуучулар жеткен жок.

– Барып келгениңе ким колдоо көргөздү?
– «Себат» билим берүү мекемесинин каржылоосу менен барып келдик.

– Келгенден кийин жогорку жактан куттуктоо, балким, жолугушуулар болгондур?
– Жок, эч нерсе болбоду. Бизге окшогон жаштарга колдоо көр­гөзүшсө, илим жаатында мыктылар чыкмак. Азыр көбүнчө спортко көп көңүл бурулуп, билим, илимге такыр эле көңүл бурулбай калгандай.

– Кайсы ЖОЖго тапшыр­дың?
– Түркиядагы ЖОЖго тапшыргам, бирок ал жактын шарттары бар экен. Азырынча чече элекмин, балким, бул жакта калышым мүм­күн. Кайсы бир ЖОЖ “бизге окууга кел” десе, ойлонуп көрөм.

– Калысбек, келечекте дагы көп жеңишти багындыр.