“Ааламга кеткен жол айылдан башталат” деген жакшы сөз бар. Ийгиликке жетиш үчүн адам ар кандай кыйынчылыктарды басып өтөт эмеспи. "Кыргызстанда, деги эле аттуу-баштуу саясатчылар алгач эмне иш менен алектенишкен?" деген суроого жооп издеп көрдүк.

• Депутаттардын катарын толуктаган “ар-намысчы” Анарбек Калматов азыркы Аксы районуна караштуу Ульянов атындагы колхоздо эмгектенген.
• Колхоздо иштегендердин катарын "Республика" фракциясынын депутаты Алтынбек Сулайманов да толуктайт. Ал алгачкы эмгек жолун "Ленинизм" колхозунун жумушчусу болуп баштаган.
• ЖКнын депутаты Марат Султанов "студенттик күндөрүмдө темир жол куруучу болуп иштегем" деп бизге куруп берген маектердин биринде жооп берген болчу.
• Вице-премьер-министр Камила Талиева: "Жалал-Абад Мамлекеттик университетинде лаборант болуп эмгек жолумду баштайм",- деди.
• Өзбекстандын президенти Ислам Каримов алгач "Ташсельмаш" заводунда мастердин жардамчысы болуп иштеген.
• Жогорку Кеңештин дагы бир депутаты Садыр Жапаров студент кезинде СССРдин Мамлекеттик коопсуздук комитетинде штаттан тышкаркы кызматкер болуп иштегенин айтып берди.
• Ички иштер министринин орун басары Курсан Асанов мектепти аяктаганда дарбыз эгип, дыйканчылык кылган.
• Экономика жана монополияга каршы саясат министри Темир Сариев өзүнүн резюмесине “алгачкы кызмат ордум – борбордук универмагда катардагы кызматкер” деп көрсөтөт.
• Учурдагы өкмөт башчы Жантөрө Сатыбалдиев биринчи Алай райондук Жол куруу башкармалыгында мастер болуп иштеген.

Айдай Асанбекова
politika@super.kg