Башталышы – 19:00 (50 мүнөт кечикти)
Билет баасы – 250-800 сом
Алпаруучулар – Улан Барпиев, Санжар Мыкыев
Көрүүчүлөр – Спорт Ордосунун 100 пайызы (17-октябрь күнү)
Эң мыкты номер – Мирбектин аткаруусундагы «Ильяздын ыры»

Кыргызчылык салтты бузбай, Мирбек Атабековдун концерти бир саат кечигип көшөгөсүн ачты. Кирерим менен көзүмө урунганы, залдын бир жагында Мирбектин, экинчи жакта ырчы жигиттин кара көзү Мээримдин жарнамадагы сүрөтү илиниптир. Ал эми сахнанын жасалгасында кеп жок.
Концерттин күнөөкөрү Мирбек көп күттүрбөй «мен силерди сагындым» деп чыга келип, ырларын жандуу аткара баштады. Аны жандап бийлеген «Версус», «Стар Дэнс» топтору сахнага, ырга ого бетер көрк кошту.
Коноктордон Гүлнур Сатылганова, Абидин Темиров, Арсен, Омар, Назгүл Токтакунова, Бек Исраилов келди.
Алпаруучулардын «бул таластык жигит, жакшылап кол чаппасаңар таарынып Таласка кетип калат» деген чакыруусу астында Арсен англис тилинде ырдап-бийлеп кирди. Аны угуп отуруп бир саамга, жаштар айткандай, «кабакка» барып келгендей эле болдум. Баамымда, көпчүлүгү ырдын сөзүнө түшүнбөй эле отуруп калды көрүнөт.
Бир маалда Мирбек «бул кыздын үнү абдан жакшы, укмуш ырдайт» деп Назгүл Токтакунованы чакырып, экөө дуэт ырдашты. Укмуш деген ырчы кызынын үнү Мирбектин жанында жакшы чыкпай, кысылып-буулуп, айткан комплиментине татыган жок.
Алпаруучулар боюнча айта кетпесем да болбос. Бирин экинчиси «кызга окшошсуң» десе, экинчиси «сен балага жакынсың» деп бири-бирине тийишип, элди жандандырып жатышты. Бирок бир нерсе мага эле эмес, көпчүлүккө да жакпай калды. Бизде адат бар эмеспи, «ай, жигиттер, барсыңарбы-ы?», «кызда-ар, кана-аа?!» демейинче унчукпай отура бермей. Ошентип күүлөнтүп отуруп Улан «эмне Мирлан Баековдун концертине келгендей болуп отурасыңар?» десе, Санжар кошумчалай «бул деген Мирбек Атабековдун концерти-ии» деп кыйкырып жиберсе болобу! Мына сага! Жигиттер бул сөздү атайын айтыштыбы же импровизация болуп кеттиби, белгисиз. Муну Мирлан Баеков укса капа болмок. Анын да өзүнө тиешелүү күйөрмандары, Мирбектей эле таңшыган таланты бар... Анан да концертке көз боёочулардын келгени өзгөчөлүк жаратты.
Ии, баса, унутуп кала жаздапмын, көрүүчүлөрдү Гүлжигит Калыков менен Даниелдин сахналаш агасын куттуктап концертине келбегени кызыктырды.
Баары бир ырчылардын жандуу аткарган ырларын, алардын ырчылык дареметинин өскөнүн көрүп, өзүмчө сүйүнүп алып жолума түштүм.

Толик сынчы
star@super.kg