– Учурда 16 жаштамын. Бир үйдө агам, сиңдим, атам жана мен болуп чогуу турабыз. Апам 3-класста окуп жатканымда эле өзүнө өзү бычак сайып каза болуп калган. Бул окуяга күбө болуп калгангабы, ушул кезге чейин апамдын мындай жорукка барышына атамды күнөөлөп келем. Анткени ошол кезде атам ичкиликке берилип, апама көп запкы көрсөтчү эле. Каргашалуу күнү да атам адатынча ичип келип, апама кол көтөргөн. Апамдын шолоктоп ыйлап жатканы алигиче көз алдыма тартылат. Бир убакта атам «ме, анда өлүп ал» деп апамды көздөй бычакты ыргытты. Апам ушуну эле күтүп турганбы, бычакты дароо алды да, жүрөк тушуна матыра сайды... Диркиреп аккан кандан корктумбу, апамдын жанына бара албай четте «апакелеп» чыркырадым. Ошентип, ыйлаганыма, дарыгерлердин күрөшкөнүнө карабай апабыз бизди таштап, кайтпас сапарга кете берди. Ооба, мунун баарына атам гана күнөөлүү. Чынын айтсам, аны көргүм да жок. Кээде үйдөн кетип калайын дейм. Бирок агам менен сиңдимден алыс болууну каалабайм. Алар каргашалуу окуяны өз көзү менен көрбөгөндүктөнбү, атама болгон мамилелери жакшы. Арадан бир топ жыл өттү. Бирок мен дагы да болсо атамды кечире албай келем. Аны ушунчалык жек көрөм. Ар бир айткан сөзү кыжырымды келтирет. Өмүр бою минтип жашагым келбейт. Эмне кылам?

Айнура, Кара-Көл шаары

Суроого «Триумф-Инфо» психологиялык окуу борборунун психологу Нурзада Маямерова жооп берет:
– Ажал айтып келбейт. Эгер адамдын ичер суусу түгөнгөн болсо, ал кандай болсо да каза болот. Демек, апаңдын жашоосу ошол күнгө чейин гана болгон. Атаң бул жерде ага себепчи гана. Кандай кылган күндө да апаң кайра кайтып келбесин билесиң да. «Атаңды өлтүргөнгө энеңди алып бер» деген сөз бар. Кек, таарыныч, ыза менен адам жаркын келечек кура албайт. Качан гана жан дүйнөң рахат алып, жаман ойлордон алыстаганда гана жакшы иштер жасаларын унутпа. Атаңдын ордуна өзүңдү коюп, ал да силерди көргөн сайын жаман абалда калып жатканын эсте. Жаман ата болсо, балдарын таштап басып кетип деле калмак. Сенин атаң андайлардын катарында эмес экен. Акылдуу болуп, атаңды кечирип кой. Бул эң биринчи өзүң үчүн, келечегиң үчүн керек. Эгер кечирүү мүмкүн эмес деп ойлосоң, психологго кайрылып, адистин жардамы менен бул ойдон кайтышың зарыл.

Жашоодо ар кандай учурлар болот. Кимдир бирөө сүйгөнүнөн айрылып жанын кыйгысы келсе, айрымдар «кимди тандоо керек?», «эмне кылам?» деген дилеммага такалат. Мына ошондой түйүндүү суроолордун жообун тапкыңыз келсе, биздин гезитке кайрылыңыз. «Психологдун кеңеши» рубрикабыз сиздер менен бирге иш алып бармакчы.

Суроолорду (0312) 32-33-28 номери аркылуу берсеңиз болот.

Салтанат Мукасова
kenesh@super.kg