Кримавторитет Камчы Көлбаев ысык Дубайдан Бишкектин СИЗОсуна алынып келинди, президент Алмазбек Атамбаев кыргыз-германиялык алакага жаңы дем берүү үчүн Берлинге барды, Бишкек шаардык кеңешке депутат болчулар ачыкталып, Беларустун башчысы Александр Лукашенко ошол өлкөдөн баш паанек тапкан Курманбек Бакиевдин пенсиясын Кыргызстандан сурады... Бул аптанын саясат айдыңындагы баяны кыскача ушундай...

КӨЛБАЕВ ЧЫНДАП ЭЛЕ БИШКЕККЕ КЕЛДИ!
Буга чейинки сандарыбызды барактап көрсөңүз, Айсулуу Дүйшөнкулова аттуу чуулгандуу аялдын «жакында төңкөрүш болот, анда ок атылат» деген сөзүн жарыялаган элек. Кийин ал сөзүн төгүндөп, кептин баарын оюнан токуганын айтып чыкса да, «Камчы Көлбаев Бишкекке 11-ноябрда учуп келет» деп айтканы бир ай өтпөй чынга айланды. Дал келүүбү? Айсулуу айымдын чындап эле кримчөйрө менен байланышы барбы?
Курманбек Бакиевдин учурунда крим- дүйнөнү чеңгелдеп турган Камчы Көлбаев минтип 8-декабрда кишенделип алынып келинип, УМККнын СИЗОсунда 1 ай кармалмай болду. Ага карата коюлган айыптар өзүнчө бир куржун. Анда адам уурдоодон тартып кылмыштуу топ түзүү менен бийлик өкүлдөрүнө зордук көрсөтүүгө чейинки Кылмыш кодексинин беренелери каралган.
Дагы бир кызыктуу учур: былтыркы жылы дал ушул күндөрү ЖКнын спикери болуп турган Ахматбек Келдибековдун Камчы Көлбаев менен «капысынан» бир жерде эс алып калуусу ачыкка чыгып, бул чуу ага спикердин креслосунун баасына турган болчу. Атайын кызматта бул эки персонага байланыштуу көп кызыктуу маалыматтар бар экени айтпаса да түшүнүктүү. Андыктан «Ата Журттун» лидерлеринин бири Ахматбек Келдибеков СИЗОдо отурбаса да, жылуу кабинетте титиреп араң отурса керек... Апрель окуясынан кийин бийликке келгендер биринчи орунга коррупцияга жана кылмыштуу дүйнөгө каршы күрөштү коюшарын убада кылышкан эле. Эки багытта тең активдүү иш алпарылууда.

ӨЛКӨ БАШЧЫНЫН НЕМИСЧЕ ЭРКИН СҮЙЛӨӨРҮН БИЛЧҮ БЕЛЕҢИЗ?
Президент Алмазбек Атамбаев Батыш Европага болгон биринчи сапарын Германиядан баштап, 10-12-декабрь күндөрү өткөн визиттин алкагында сөз козгоор учурлар өтө көп болду. Өткөн аптада жакынкы 5 жылга каралган өлкөнү өнүктүрүү стратегиясын жар салган Алмазбек мырза анда белгиленген тапшырмаларды жүзөгө ашыруу үчүн өнүккөн мамлекеттердин бири, Европалык биримдикти бучкактап кармап, насыяны кеңири тараткан Германияны бекеринен тандабаса керек.
Жолугушууларда өлкө башчы немис тилинде да сүйлөп жатты. Окуучулук курагында немис тилин үйрөнгөн ажо маектеринде күн сайын эртең менен англис тилинен да сабак аларын айткан эле.
Президент Германияга болгон сапардын жыйынтыгын чыгарып жатып бир катар макулдашууларга кол коюлганын маалымдады. Анын ичинде 8,5 миллион евролук карыздын конверсиясы (эски карызды жаңы активге же карызды мүлккө алмаштыруу), Кыргызстанга 26 миллион евро грант бөлүү тууралуу документ бар. Ал эми Германиянын канцлери Ангела Меркелдин айтымында, жакында Кыргызстанга атайын эксперттер тобу келип, кызматташуунун тармактарын иликтеп кетишет. Эмки санда бул сапар тууралуу кеңири токтолуп өтөбүз.

БИШКЕК ШААРДЫК КЕҢЕШИНЕ КИМДЕР КЕЛИШТИ?
Бишкектин аймактык шайлоо комиссиясы шаардык кеңештин шайлоо жыйынтыгын аныктады. Бишкек шаардык кеңешинин шайлоосунун айынан коалиция ыдырап кетүү коркунучуна кабылып, 14 шайлоо комиссиясынын тилкесинде добуштар кайра эсептелип чыккан. Ошентип, 7 пайыздык барьерден өткөн партиялардын ортосунда депутаттык мандаттар төмөндөгүчө бөлүндү: КСДП – 21, «Республика» – 11, «Ата Мекен» – 7, «Замандаш-Современник» – 6. Тизме боюнча КСДП менен «Замандаш-Современник» өзгөртүү киргизген жок. Компроматтар согушунун катышуучулары болгон «Республика» Руслан Казакбаевди, «Ата Мекен» Жоомарт Сапарбаевди шаардык кеңештин депутаттыгына ыраа көрбөдү.

«БАКИЕВ АЧКАЛЫКТАН ӨЛҮП КАЛБАЙТ»
Беларустун президенти Александр Лукашенко Минск шаарында КМШ жана Балтика өлкөлөрү, Грузиянын башкы редакторлор клубу менен жолугушту. Анда журналисттер Курманбек Бакиевдин тагдырына кызыгышып суроо узатышканда Лукашенко: «Бакиевдин маселеси кыргыз-беларусь мамилесинин ортосунда бүгүн көйгөй эмес. Силерге Бакиев керекпи? Эмне үчүн? Адам жашады, кетти, ар кандай боло берет. Андан көрө ага эмне себептен пенсия которулбай жатканын айткылачы? Пенсияны чегеришиптир, бирок жөнөтпөй жатышат. Албетте, Бакиев ачкалыктан өлүп калбайт. Ага жол бербейбиз. Бирок пенсияны которуу керек»,- деди.
Беларустун башчысы биздин мыйзамдан кабары жок окшойт, анткени президенттиктен куулган кыргыз ажолору пенсиядан кур жалак калышат. Анын үстүнө Бакиев бийлигинин соңку жылдарын эстесек, өлкө коррупцияга белчесинен батып, өлкө казынасына түшө турган каражаттар Бакиевдердин үй-бүлөсүнүн чөнтөгүнө түшүп калган. Лукашенко Бакиевди өтө эле байкуш жана жакыр кейипте көрсөттү. Бирок ал элдин кыжырдануусун ого бетер күчөттү.