Келин болуп ак жоолук салынуу ар бир кыздын кыялы эмеспи. Бирок ал кыялдын артында мүшкүлү көп турмуш турат. Шоу-бизнес чөйрөсүндө жүргөн мырзалардын оорун колдон, жеңилин жерден алып жүргөн жубайлары менен тааныштырабыз.

Ди-джей Расул Мырзатегиндин жубайы Махабат: «РАСУЛДУН АРТЫНАН ЭЛЕ ЖЫЙНАП ЖҮРӨМ»

Аты-жөнү – Махабат Жумабек кызы
Туулган жери – Нарын шаары
Туулган жылы – 9-июнь, 1989-жыл
Баш кошкон датасы – 24-сентябрь, 2012-жыл

– Махабат, Расул экөөңөр кесиптеш элеңер, «служебный роман» кантип башталып кетти?
– Башында ал мага мурунку сүйлөшкөн кызынын сүрөтүн көрсөтүп, мага сөз айткан жигиттерди ага айтып, жакшы сырдашчубуз. Жумуштан үйгө барганда да сөзүбүз бүтпөй интернеттен сүйлөшөр элек. Анан киного бара баштадык, 30-август – Айт күнү чогуу айттап, ал мени үйгө узатып койду. Көрсө, билбей эле ошол күнү экөөбүз сүйлөшүп баштаптырбыз.

– Сүйүү бар жерде таарынычтар да болсо керек...
– Болуп калат, бирок олуттуу эмес, майда-барат нерселерге эле таарыныша кетебиз. Менин бир жаман сапатым бар, күнөө менденби-жокпу баш оорутпай, тылтыйып сүйлөбөй жүрө берем. Ал сапатымды Расул да билип калган, өзү сөзсүз биринчи аракет кылат. Мага эң башкысы биринчи кадам кылып койсо эле бат жазылып кетем.

– Келин болуп келген күндө кандай кызыктар болду?
– Той менен болуп 3 түн жакшы уктабай жүрдүм. Көшөгөдө отурганда мени менен келген жеңелеримди коноктоп жатышкан. Уйкум келип, үргүлөп «уят, карманайын» десем да болбой башым шылк этип улам уктап кетем. Элдер эшикке бийлеп кеткенде Расул улам келип «уят эмеспи, тур» деп кетет. Ошол күн өзгөчө эсте калды.

– Жолдошуңдун сага жакпаган кайсы сапаты бар?
– Бойдок кезинде күндө кийимдери үтүктөлүп, тыкан болуп жүрчү. Азыр болсо үйгө кирди дегиче кийимдерин чечип таштап коёт. Анын артынан мен жыйнап жүрөм.

«Тамашоучу» Мурат Жалиевдин жубайы Айжамал: «ТАНДЫРГА НАН ЖАБА АЛБАЙ КЫЙНАЛГАМ»

Аты-жөнү – Айжамал Шакирдин кызы
Туулган жери – Алай району, Гүлчө айылы
Туулган жылы – 20-октябрь, 1991-жыл
Баш кошкон датасы – 12-май, 2011-жыл
Малика аттуу таттуу кызы бар

– Айжамал, келиндик доор кандай өтүүдө?
– Жакшы, рахмат. Азыр баарын эле өздөштүрүп калдым. Башында кыйынчылыктар бир аз болду. Өзүм Гүлчө шаарында өскөндүктөн, бир жолу да тандырга нан жаап көргөн эмес элем. Биринчи жолу нан жапканда Мурат экөөбүз элден жашырынып, нанды өзү тандырга жабыштырып берген. Бети-колумдан халатыма чейин көө болуп алгам. Ошол күндөрдү азыр эстесем күлкүм келе берет.

– Куудул жигит сүйүүсүн кантип билдирди эле?
– 2011-жылы 14-февралда Нурлан Насип Ошко концерт коюп келип, ошол жакка чакырган. Андан чыгып "мага көзүң жагып калды" деп сүйүү сөздөрүн айтып, биринчи жолу сезимдерин билдирген.

– Мурат каардуу көрүнөт. Жини чукул болсо керек?
– Жини бат келет, бат жазылат. Ал кезде мен унчукпай кутулуп кетем. Эгер мен таарынсам, ал ар нерсени айтып күлдүрүп жатып баарын унуттуруп салат.

– Кайсы сапаты көп жакпайт?
– Кежирлиги бар, өзүнүкүн такыр бербейт. Айтканын кылдырмайынча тынчыбайт.

– Мурат кандай ата болду?
– Кызымды төрөгөндө "сен мага баа жеткис кымбат белек тартууладың" деп кубанткан. Менден өткөн баласаак, кайда барса да бат-баттан "кызым кандай?" деп чалып сурап турмай адаты бар.

Актёр Эркин Эгембердиевдин жубайы Диана: «МЕНИ КОРОЗ ДЕП АЙТ ДЕЙТ»

Аты-жөнү – Диана Чотиева
Туулган жери – Бишкек шаары
Туулган жылы – 12-декабрь, 1987-жыл
Баш кошкон датасы – 15-сентябрь, 2012-жыл

– Диана, Эркин экөөң кантип таанышып калдыңар?
– Мен бир сынакка катышып калдым. Ал жакта актёрдук чеберчилик талап кылынгандыктан, өкүл атабыз Камчы Сарыбаев аркылуу Эркин менен таанышкам.

– Унутулгус бактылуу күндөр башыңардан көп өткөндүр...
– Сынагыбыз 7 айга созулуп, Көлдө да жүрүп калдык. Эркин атайын жумушунан суранып мага келчү. Анан да жаңы мамилебиз курулуп баштаганда такыр сөзүбүз бүтчү эмес. Экөөбүз тең үйгө баргыбыз келбей, эртең мененки 8дерге чейин сейилдеп жүрө берчүбүз.

– Эркинге эркелеп, мүнөзүңдү да көрсөтүп койсоң керек?
– Анын достору аябай курч сөздөр менен тамашалашат. Кээде сөздөрү катуу тийип, таарынып калам. Негизи, аялзаты назик жан эмеспизби, анан да жаңы үйлөнүп жатсак, эркелеп алайын да.

– Бири-бириңерди кантип эркелетесиңер?
– Мен аны "жөжөм", "кичинекейим" десем, ал "эмнеге жөжө дейсиң? Мени короз деп айт" деп калат.

Ди-джей Аскат Алдашевдин жубайы Альбина: «АСКАТ МЕНИ ТАШТАП КЕТСЕ КЕРЕК ДЕЧҮМҮН»

Аты-жөнү – Альбина Касеева
Туулган жери – Тоң районунун Бөкөнбаев айылы
Туулган жылы – 12-январь, 1988-жыл
Баш кошкон датасы – 24-декабрь, 2011-жыл

– Альбина, сени Аскат менен кайсы тагдыр тааныштырды?
– Интернеттен таанышып, биринчи жолукканда көп жаккан эмес. Шоу-бизнестегилер аябай шуулдаган болушат, бул да мени бир күнү таштап кетсе керек деп жүрдүм. Бирок убакыт өтүп, бири-бирибизге көнүп, жадакалса аны кызгана да баштабадымбы.

– Кимиңер таарынчааксыңар?
– Аскат көп таарынат. Кызганчаактыгынан болсо керек, телефонумду текшерет. Бир жакка чыксам "кайда барып келдиң?", боёнсом "эмнеге боёндуң?" дей берет.

– Башка бүлөгө көнүп кетиш кыйын болгондур?
– Тойго чейин эле кайындарым менен таанышкандыктан, сүрдөгөн жокмун. Бирок жаңы келген үйгө көнө албай, 2-3 айча эч кимге көрсөтпөй ыйлап жүрдүм.

– Бири-бириңерди кантип эркелетесиңер?
– Кыз-жигит болуп сүйлөшүп жүргөн кезде эле Аскат мени "томпок" деп эркелетчү. Өзүм да ага көнүп калгам. Азыр кээде Альбина десе катуу тийип, "мени томпок дебедиң" деп таарынып калам.

Гүлжамал Бөрүкулова
star@super.kg