Макияж бул – косметикалык каражаттардын жардамы менен бетти боёо. Макияж эринди, көздөрдү, каш-кирпикти баса белгилөө жана беттеги айрым кемчиликтерди жашыруу максатында жасалат. Бирок туура эмес жасап алсаңыз, тескери жыйынтыкка кабылуу коркунучу бар. Андыктан сырларын билүү маанилүү.

КӨЗ

• Көздү боёгондо бир нече өңдү айкалыштырып колдонгон туура. Адатта, көздүн ички тарабы ачык түс менен боёлуп, ал бара-бара күңүрт түс менен алмашат да, сырткы бөлүгү күрөң же кара боёк менен боёлот.
• Түстөрдү айкалыштыруудан мурда көздүн, чачтын жана теринин өңүн эске алуу керек. Мисалы, боёк көздүн өңүнө окшош же ага жакын болгону жакшы. Теринин өңүнө түспөлдөш болбосо деле болот.

Эскертүү! Көздү боёордун жана сызык чиердин алдында эч кандай крем сыйпабаш керек. Антпесе былжырап, агып калышы ыктымал.

КАШ
Формага келтирүү
Төмөнкү ыкманы колдонуп негизги үч чекитти аныктап алуу зарыл (сүрөттө):

1. Каштын башталышы
2. Эң жогорку чекити
3. Учунун бүткөн жери

Андан кийин ал чекиттерди болжол менен бириктирип, ашыкчасын терип салыңыз. Эгер кашыңыз суюк болсо, аны боёгонго туура келет. Ал үчүн каштын өңүндөй калем же атайын каш боёк менен каштын формасын кайталаган ичке сызык чийиңиз. Ал сызыкты акырындап жоонойтуп, формасы боюнча боёңуз.

МУРУН
Формасын жакшыртуу үчүн...

• Чоң (таноосу барбайган) мурунду ичке көрсөтүү үчүн каштын ички бурчунан мурунду капталдатып күңүрт түстөгү тоналдык кремди сүйкөйбүз. Башкача айтканда, мурундун үстүнө күңүрт тоналдык крем сүйкөлбөй, мурун капталдарына гана узунунан сүйкөлөт. Ал эми мурундун үстүнө ачык түстөгү тоналдык крем жабылат.
• Кырдач мурундуулар жогорудагы процессти тескерисинче жасаганы туура. Күңүрт крем менен мурундун үстүн, ал эми эки капталын ачык крем менен сүртүү керек.
• Узун мурунду кыска көрсөтүш үчүн учуна, эки капталына күңүрт кремди сүртүү керек.

ЭРИН
Эрин боёордо эске ал

• Помада сүйкөөнүн астында эринге тоналдык крем, анан упа сүртүлөт. Бул помаданын эринде бекем кармалышы үчүн жасалат. Оозду боёгондон кийин кагазды же салфетканы өөп коюңуз. Анан экинчи сыйра койсоңуз болот.
• Эринди баса белгилөө үчүн атайын карандаштын жардамы менен контур чийилет. Бул аны калыңыраак кылып көрсөтөт жана ооз боёктун акпашын шарттайт. Андан тышкары формасын оңдоодо көмөктөшөт.

Эриндин формаларын оңдоo

КИРПИК
Кирпик боёонун эрежелери:

• Кирпикти түбүнөн баштап учуна чейин зигзаг түрүндө боёш керек.
• Эки же үч кат боёлгону жакшы. Бирок бир кат толук кургагандан кийин гана экинчи сыйра боёлушу кажет.
• Тушь кургагандан кийин аны атайын щётка менен тарап койсоңуз, жабышкандары ажырап көрктүү болот.

Салтанат Мукасова
kenesh@super.kg