Аталышы – «Мен күздү күтөм»
Өткөн орду – Спорт Ордосу
Башталышы – 19:00 (1 саат кечикти)
Көрүүчүлөр – Залдын 80 пайызы
Мыкты номерлер – Нурлан Насиптин «Менин да сүйүүм ушундай» ыры
Алпаруучулар – Нурзат Токтосунова, Темирлан
Билет баасы – 300-500 сом

Залдын көбүн Динара Акулованын замандаштары ээлешти көрүнөт. Ырчы жарк этип чыга келгенде эле жанымда отурган ини-карындаштарым «Ии, ошону ырдачы, туура кыласың» деп күрү-күү болуп жатышты. Акулованы биринчилерден болуп кызы Малика куттуктады. Апасынын репертуарын дал апасындай ырдап да, укмуш бийлеп да жатты. Ошондон улам баралына келгенде Малика апасынын ордун басмак түгүл, ашчудай деп койдум.
Алпаруучулук чылбырды Нурзат Токтосунова менен Темирлан аттуу жигит аркалашты. Нурзат эми дасыккан алпаруучу эмеспи, атына доо кетирген жок. Ал эми берки жигиттин чоң сахнага чыкпаганы билинип турду. Балким, тойлордо тамадалык кылат чыгар деген ой келди.
Корейлердин «Гангнам стайлы» дагы деле модада экен. «Учур» театрынын актёрлору Бактыгүл Асанова менен Адыл Болорбеков ал ырды «Күндө той» деп атап ырдап чыгышты. Кемпир-чалдын образын берип, ырдап-бийлеген эски көрүнүштү жөн эле коюшса болмок. Кала берсе, бир эле эмес, кайра-кайра чыгып тажатып жиберишти.
Бир маалда карындашым «кытайлык кыргыздардан «Күтүү» деген чыгарманы алып келдим эле. Бул жерде отурган кытайлык кыргыздарга арнайм» десе эле пультта отурган жигит башка ырды берип салбаспы. «Сто-оп!» деп катуу айтканда тык токтогону менен, ал ырды таба албай бир топко убара тартты. Акыры таба албасын билгенде гана алпаруучу Темирлан сахнада көпкө туруп калган Динара эжесин сахна артына узатып койду.
Онлайн деп жар салган ырчы кайсы бир интернет-телевидениеден концертти түз алып бериптир. Конок катары келген Нурлан Насип Динара эжесин жана өзүн туулган күнү менен куттуктап, «Менин да сүйүүм ушундай» деген ырын ырдады. Ошондо, ой-бой, залда отургандар ырчыны аябай колдоп салышты. Андан сырткары туулган күн ээсин Өктөм Сапар уулу, Омар, Арсен, «Нон-Стоп» дуэти, Данияр Эрматов куттуктап келишти.

Толик сынчы
star@super.kg