Өлкө президенти Алмазбек Атамбаев энергетика тармагында дале ширшовдук схема, тактап айтканда, ири коррупциялык аракеттер иштеп жатканын айтып келет. Коррупцияга каршы күрөшүү тапшырмасын тиешелүү органдардын, өкмөттүн алдына койгон. Ошого карабай энергетика министри Осмонбек Артыкбаев бул аптада: «Электр энергиясынын тарифтик баасы азыркыдай 70 тыйын эмес, 1 сом 20 тыйын болсо жакшы болмок. Ошондо гана бардык маселелерди чече алмакпыз. Азыр бааны кандай жолдор менен көтөрүүнү ойлонуп жатабыз. Жогорку Кеңеш макулдугун берсе, Монополияга каршы күрөшүү мамлекеттик агенттиги менен макулдашып, бааларды көтөрөбүз. Ушу тапта бул тармакка 16,5 миллиард сомдон ашуун каражат жетпейт жана муну жабууга бюджеттен акча артпайт. Эгер тарифтерди бүгүн көтөрбөсөк, эртең энергетикалык систем кыйрап, эл кыштын күнү тоңуп калса эмне болот?»- деп суроо салды.
Осмонбек Артыкбаев бул кызматка ушундай маселени чечүү үчүн жөнөтүлгөн эмеспи? Көмүскөгө кетип жаткан каражатты кайтаруу, канча жылдап жүз миңдеген сомдорду төлөбөй жүргөн чоңдорду таап чыгуу, төлөтүү, электр энергиясын таратып сатуу боюнча энерготөбөлдөрдүн туугандарынын, жакындарынын жеке ишканаларында болуп жаткан коррупциялык иштерди токтотуу. Министр мырза ушул иштердин өтөсүнө чыкса, 16,5 миллиард сом эмес, энергетика тармагында мындан да көп киреше табылмак. Өкмөт ар дайымкысындай оңоюна качырып, жакыр элдин эсебинен дагы акча чогултуп, кайра эле ошол сол чөнтөктөрдү байытууну көздөп жатат.
Сыягы, азыркы өкмөттөгүлөр Алмазбек Атамбаевдин жана да бир топ саясатчы, коомдук ишмерлердин энергетика тармагындагы коррупциялык схемалар тууралуу айткандарын буга чейин угуп көрүшпөгөн окшойт. Балким, 2010-жылы 7-апрелде элдин эмне үчүн "Ала-Тоо" аянтына көтөрүлүп чыгып, эмнеликтен 87 адамдын өмүрү кыйылганын, андан берки үч жыл аралыгында Апрель окуясында алган жаракаттарынын айынан дагы 18 адам көз жумганын билишпейт көрүнөт. 
Кезинде бакиевдик бийлик энергетикалык тармакты сактап калуунун жалгыз чарасы ушул деп тарифтерди көтөрүп, элди ишендирүүгө аракет жасаган. Жакыр элдин жон терисин сыйрып, бир ууч чиновниктер дагы байлык топтоону көздөшкөн эле. Анын жыйынтыгы кандай болгону баарыбызга белгилүү. Эл көтөрүлүп, ал бийликти кубалап салган. 87жаран бакиевдик бийликтин мындай адилетсиздиктери үчүн көз жумуп кете берген.
Эгемендүү Кыргызстанга коррупция деген түшүнүк тааныш боло баштагандан бери дал ушул энергетика тармагынын аты аталып келет, коррупцияга белчесинен баткан, чоңдор болуп көрбөгөндөй байлык жасаган тармак катары. Алсак, мурунку бийлик тушунда Энергетика министрлигин 2 жыл (2007-2009-жылдары) жетектеген Сапарбек Балкыбеков Апрель революциясынан соң качып кетип, көп узабай эле Ирландиядан арал сатып алганы белгилүү. Кыргызстандагы министрдин айлыгына абдан сарамжалдуу жашасаң 2-3 жылда квартира сатып алышың мүмкүн. Европадан арал сатып алуу түшкө да кирбес окуя.

Гүлмайрам Сабырбекова
politika@super.kg