Мукам үнү менен далайларды жашытып, айрымдарын кубантып келаткан ырчы Роза Шакирова быйыл «Жылдын супер ырчы айымы» наамына талапкерлердин бири. Ырчы үй-бүлө менен чыгармачылыгын ийгиликтүү алып баратканын билебиз. Бүгүнкү маекте Роза Шакирова балалыгы, чыгармачылыгы жана сахнадагы кесиптеш-атаандаштарына болгон мамилеси тууралуу кеп салып берди.

– Роза, учурда super.kg сайтында «Жылдын супер ырчы айымы» наамына кызуу добуш берүү жүрүп жатат, рейтингиңизди карап жатасызбы?
– Ушул интернетке такыр жокмун, өзүм катталган эмесмин, колдонуунун жол-жобосун да билбейм. Сиңдим айтып калат, канчанчы орунда келатканымды. Эми буйруганы да, элдин тандоосу кандай болсо, ошого моюн сунабыз. Жеңгенге да, жеңилгенге да даярмын дегендей (күлүп).

– Сиз менен чогуу ат салышып жаткан атаандаштарыңызга көз карашыңыз кандай?
– Карасам баары ушул жылы жакшы иштешиптир. Айжамалдын эки жаңы ырын тынбай угуп жүрдүм, Юлиянын «Аппак сүйүүсү» сонун жазылыптыр, Фарида да быйыл жакшы ыр, клиптери менен кубантты, Чолпонай өзүн мыкты актриса катары көрсөттү. Мен добушумду Айнура Салахидиновага бермекмин, ал чынында эле жакшы иштеди, анан декабрдын аягында көз жарат, сыйлыкты алса, кошумча дем, күч-кубат болмок.

– Бир наамга көрсөтүлгөн ырчы айымдардан сизди эмне айырмалап турат?
– Үнүм болуш керек, ээ? Анан келбетим, «фигуралуулугум» менен айырмаланбасам (күлүп)...

– Кыргызда көпчүлүгү арык болгондон көрө болтоюп жүргөндү жактырышат. Сизде кандай?
– Кичинемде атам мени «сулуу кызым» деп эркелетчү, ошого ишенип алыптырмын да (күлүп). Өзүм толуктугумду кемчилик катары көрүп, көп жерден куру жалак калгам. Сулуулар сынагына катышканда көйнөгүм батпай калчу, же сулуу, арык кыздарды көргөндө өзүм эле уялып барбай койчумун. Азыр жиним келет, ошол убакты кайтарып берсе, ошол сулууларды басып-басып салмакмын (күлүп).

– Арык чырай кыздарды көргөндө кызыгасызбы же аялдык атаандаштык сезими козголобу?
– Мурун сулуу кыздарды көргөндө аябай жаман көрчүмүн, «фуу» деп. Азыр чырайлуу кыз көрсөм «ии, ушул кыз кыргыздын татынакай жигитине турмушка чыкса экен» дечү болдум.

– Музыкага болгон шыгыңыз качан ойгонгон?
– Апамдар айтып калышат, 2 жашымда, үйгө конок келсе, дасторкондо тургандардын баарын кошуп ырдачу экенмин, «кашыгы, вилкасы, табагы» деп. Анан да эсимде, дарыгер болууга аябай кызыгып жүргөм. Бакаларды кармап келип союп, ичине таштарды толтуруп кайра тигип койчумун. Ал кезде темир шприцтер болчу эле, тоокторду кармап алып ошолорго сайчумун. Байкуш тооктор 5 метр баскандан кийин өлүп калышчу. Азыр ырас эле ырчылыкты тандаптырмын деп ойлойм, дарыгер болсом баарын кууратмак экенмин.

– Бетке айткан мүнөзүңүз бала кезде бар беле?
– Билбейм, күйөөгө чыкканга чейин аябай урушчаак, атырылып беттен алган кыз болчумун. «Чачыңды карага боёбойсуңбу?» десе, «Сен кимсиң, мага антип айткыдай?!» деп деле асыла берчүмүн. Күйөөм менен таанышканда эртеси эле чачымды карага боёдум го чуркап барып, катуу сүйсөң ошо экен да (күлүп). Мейли, мен мурун бирөөнү жамандагандырмын, ушак ташыгандырмын, бирок турмушка чыккандан кийин 180 градуска өзгөрдүм. Азыр ал учурду жылмаюу менен гана эстеп коём.

– Мүнөзүңүздө таарынчаактык сапат барбы? Дегенибиз, ди-джей Акыл Ирсалиев, «Кеңеш» тобу тойлорунда сизди таарынтып алдык деп бушайман болуп жүргөндөрүн байкап калдым эле...
– «Кеңеш» тобу той берип жатышканда барып, кошумчабызды берип эле кеткенбиз, менин андан кийинки сааттарга тойго заказдарым бар болчу. Ал эми Акылдыкында ызалангам. Тамада сөзүнөн жаңылып алды. Эркек болсом ошол жерден урмакмын, чын айтайын. Анан иниме телефон чалып «келип кал» дедим. Ал да дароо эле жетип келди. Кафеге кирсем тамада кечирим сурап баштады. «Сен кимсиң?!» деп көкүрөктөн кармап түртүп жибердим. Ага наалып жатам, наалып жатам, айтор, инимдин тамадага боору ооруп кетти окшойт, бизди арачалап койду.

– Ачууңуз чукул экен да, жолдошуңузга кандай учурда жиниңиз келет?
– Жолдошума жинденбегенге аракет кылам. Бирок шаштыра бергени жакпайт да, «Бүттүңбү, келип калдыңбы?» деп чала берет. Анын жини келсе бир күн кечке сүйлөбөй коём, анткени сүйлөп койсоң жини кайра козголуп кетиши мүмкүн. Эртеси тамак-аш, кийимдерин даярдап, шыпылдап калмайым бар. Бирок жинин «жаным, кечирип койчу эми» деп эле жазып алам.

– Уулуңуз Руслан атасына жакынбы же сизгеби?
– Атасы менен жүргөндө кечке мен жөнүндө сүйлөй берет экен. Мени менен жүрүп, атасы жумуштан келгенде «Мен мушкер болом. Атамдын курсагы ач, кана тамак?» деп мени кекетип кирет. Бирок эркек бала баары бир атасына жакын болот экен. Күйөөм экөөбүз аны байкабай эле урушуп калсак, «апа, ата, урушпагылачы» деп жалдырап жиберет. Дароо дым болобуз.

– Үй-бүлөдө ким көбүрөөк табат, сизби же жолдошуңузбу?
– Мен күзүндө жакшы табам, жолдошумдун иши кышында жакшы болот. Жазында, жайында тапкан акчабызды чачып жүрө беребиз (күлүп). Негизи, «акча табабыз» деп өтө эле жулуна бербейбиз, үстүбүздө үйүбүз, курсагыбыз ток болсо болду.

– Жолдошуңуз «дагы аял алам» десе эмне кылат элеңиз?
– Бирөөнү чындап сүйүп, ал үчүн жашоосун өзгөрткөнгө даяр болсо, мен макул болмокмун. «Ага канча жолу барсаң, бизге да ошончо жолу кел» деп талап коймокмун. Кеткиси келген эркек баары бир кетип калат, тескерисинче, жолун ачып койсоң кетпей калышы мүмкүн. Кээ бир аялдар чыдабай, ойго келбеген нерселерди жасап жатышпайбы. Бирок супсулуу болуп боёнуп турсаң да, ал башканы сүйүп жатса не кыласың?..

– Ал эми өзүнүн кызы менен тең селкилерге үйлөнүп жаткан мырзаларга кандай карайсыз?
– Билесиңби, турмушта ар кандай кырдаалдар кездешет. Балким, ал жаш кызга анын колдоосу керек болгондур. Балким, ортолорунда чын эле сүйүү бар чыгар... Мен жакында эле бир жерден окудум, «улуу кишилер жаш кыздарга жаштыктын энергиясын алыш үчүн үйлөнүшөт экен» деп. Экөөнүн жаш айырмасы өтө чоң болгону жаман көрүнүш, бир чети. «Улуу кишилерге тийбегиле» деп жаш кыздарды тыя албайт экенбиз да, ар бирин өз ыйманына койгонубуз жакшы.

– Депрессиядан кантип чыгасыз?
– Маанайым чөгүп турганын күйөөм байкап калса, баламды ээрчитип алып дароо шишкебек жегени жөнөйбүз.

– Маегиңизге рахмат. Супер концертте сизге ийгилик каалайбыз!

Лунара Бекиева
star@super.kg