Шоумен, тамада, журналист Бакыт Букаевди өзү жашаган батирде белгисиз адамдар катуу кыйнап өлтүрүшкөнү кыргыз коомчулугун селт эттирген эле. 24-ноябрь күнү анын өлүмүнө шектүү адам кармалды.

ЖАРДАМ БЕРИЛСЕ, БАЛКИМ, ТИРҮҮ КАЛМАК
Эске салсак, үстүбүздөгү жылдын 13-ноябрында өзү жашаган батирден киши колдуу болгон Бакыт Букаевдин денеси табылган. Соттук-медициналык экспертиза Бакыт Букаев кансырап каза болгонун аныктады. «Бычак өтө маанилүү органдарга тийбегендиктен, ага эртерээк жардам көрсөтүлсө, балким, тирүү калмак» деген божомолдор бар.
Бул факт боюнча Ленин РИИБинин тергөө бөлүмү тарабынан Кылмыш жана жаза кодексинин 97-беренесинин 2-бөлүмүнүн 6-пункту (өзгөчө мыкаачылык менен киши өлтүрүү) боюнча кылмыш иши козголгон. Өтө оор кылмыштардын катарына киргендиктен, 16-ноябрда аталган кылмыш иши Бишкек ШИИББинин тергөө бөлүмүнө өткөрүлүп, тажрыйбалуу милиция кызматкерлеринен оперативдүү тергөө тобу түзүлүп, иликтөө иштери жүрүп жаткан. Маркумдун буюмдары жоголгондуктан, алгач «кылмыш тоноодон улам болушу мүмкүн» деген, кийинчерээк «кылмышкер өзүнүн эле айланасындагылардан болушу ыктымал» деген версиялар айтылган.

«ЖҮЗҮМДҮ ТААНЫГАН ҮЧҮН ӨЛТҮРДҮМ»
24-ноябрь күнү Бакыт Букаевдин өлүмүнө шектелип Өзбекстандын Андижан облусундагы Жалал-Кудук районунда 1986-жылы туулган Уланбек Худайбердиев аттуу жаран кармалды. Анын берген көрсөтмөсүнө караганда, окуя төмөнкүчө болгон.
– Орусиядан депортация болуп Бишкекке келип, ар кайсы күнүмдүк жумуштарда иштеп, суткага берилүүчү мейманканаларда жашап жүргөм. Бир ирет эмгек биржасында кардар күтүп турсам, Мирлан деген киши келген. Ал койлорун бактырганга чабан издеп жүрүп, бир койчуну таап кетти. Ошол күнү кечинде Батыш автобекети тарапта Рустам деген бала экөөбүз арак ичип отуруп, ал жерден Мирланды көрүп калдык. Ал койчусун үйүнө салганы автобекетке келген экен. Бизди көрүп «Силер эмне кылып жүрөсүңөр?» деп сурап калды. Биз жатарга жерибиз жоктугун айттык. Мирлан бирөөгө телефон чалып, анан бизди бир үйдүн алдына алып барды. Бир убакта кара пальто, кара шляпа кийген киши келип, Мирлан менен учурашып калды, көрсө, ал Бакыт деген киши экен.
Кийин ал кишинин үйүнө дагы бардык. Шеригим сыртта калып, үйгө мен жалгыз кирдим. Ошол убак кечки саат 10дор чамасы эле. Бакыт экөөбүз тамак жеп, арак ичип отурганбыз, бир маалда уруша кеттик. Ашканага тамеки чеккени кирсем, ал жакта 2 бычак туруптур. Бирин алып ал кишинин көкүрөгүнө 2 ирет сайганда бычак сынып кетти. Жаагына чапсам жыгылып калды эле, муунтуп эсин оодардым. Курум менен бутун, чүпүрөк таап келип колун байладым. Анан кайрадан ашканага барып экинчи бычакты алып келдим да, моюн тарапка сайгыладым. Мен бычак менен сайгылап жатканда оозумда тамеки бар эле, ошонун чоктору төшүнө түшүп кеткен окшойт, күйүп калыптыр. Менин да колум кесилип кетип, кан токтобой агып жатты. Ваннага кирип жуунуп чыктым да, эшикти ачып сыртта калган шеригимди киргиздим.
Экөөбүз үйдү тинтип акча таппай койдук, болгону 400 сомго жетпеген акча бар экен. Ошол акчаны, андан сырткары кийимдерин, ноутбук, уюлдук телефон жана муздаткычта турган коньяк менен шарапты алып, өзүнүн ачкычы менен эле үйдүн эшигин бекитип чыгып кеттик. Ал жерден таксиге отуруп шаардын Чыгыш-5 кичи районуна барып түшүп калдык да, башка такси менен «Ош базарына» келдик...
Мен аны жүзүмдү тааныганы үчүн өлтүрдүм.

«КАРМАЛГАН АДАМ ЭЛГЕ ТААНЫМАЛ КӨПТӨГӨН АДАМДАР МЕНЕН ТААНЫШ БОЛГОН»
Бишкек ШИИББинин маалымат кызматынын жетекчиси БАКЫТ СЕЙИТОВ төмөнкүлөрдү билдирди:
– Бакыт Букаевдин өтө мыкаачылык менен өлтүрүлүшү боюнча маркумдун жакындары, достору жана шоу-бизнестеги айрым адамдар да суралышты. Алардын ичинен эң жакшы жардам бергени ырчы Айчүрөк Иманалиева болду. Ал Бакыт Букаев тууралуу абдан көп маалыматтарды билет экен, ошолорду биз менен бөлүшүп, чоң жардам берди. Иликтөө иштеринин жүрүшүндө бул кылмышка шектүүлөр аныкталып, бүгүнкү күндө алардын бири – Уланбек Худайбердиев аттуу жаран кармалып, кылмышын толугу менен моюнуна алды.
Ал Өзбекстанда туулуп, 5 жашында үй-бүлөсү менен Ош шаарына көчүп келип жашап калышкан экен. 2009-жылы Орусияга иштегени кетип, ал жакта мекендештерибизди тоноп, ал кылмышы үчүн 1,5 жыл абакта отурган. Чыкканда эч кандай документи жок болгондуктан, депортацияга кабылган. Кыргызстанга келип, Бишкекте ар кандай күнүмдүк иштерди кылып, арзан жеке мейманканаларда жашап күн өткөрүп жүргөн.
Кылмышка шектүүнүн айтымында, окуя 12-ноябрда кечки саат 10 менен 11дин ортосунда болгон. Бул экспертизанын аныктамасына да дал келет. Кылмыш кылгандан кийин булар ар кайсы жерде жашырынып жүрүшкөн. Башка жакка качып кетүүгө акчасы, документтери болгон эмес. Уланбек Худайбердиевдин шеригинин да аты-жөнү аныкталган, учурда аны издөө иштери жүрүп жатат.
Бүгүнкү күндө Уланбек Худайбердиевдин көрсөтмөлөрү бир топ суроолорду жаратууда. Бул суроолордун үстүнөн тергөө тобу иштеп жатат. Тергөөнүн жүрүшүндө маркумду тааныган көп адамдарды көрсөтмө берүү үчүн чакырганбыз. Тилекке каршы, айрымдары билген маалыматтарын жашырып коюшканы белгилүү боло баштады. Ал эми Уланбек Худайбердиев алардын көбү менен тааныш экен. Жакын арада алардын ким экендигин айтабыз, алар да элге таанымал адамдар.
Бирок дагы деле тактала турган жагдайлар көп. Мисалы, Мирлан деген ким, ал эмне үчүн көчөдө эле жүргөн адамды атактуу шоумен менен тааныштырган? Маркумдун тааныштары эмнени, эмне үчүн жашырышкан? Ушул жана башка көптөгөн суроолорго жооп табылганда бул темага дагы кайрылмакчыбыз.

Нурбек Абдыкадыров
koom@super.kg