Чолпонай үчүн Жылан жылы ийгиликтерге бай болду. Алардын көрүнүктүүлөрүн айтсак, «Супер-Инфонун» тандоосу боюнча «2013-жылдын супер ырчы айымы» наамын алды. Андан соң алгачкы жеке концертин берди. Ошол эле күнү мурдагы «Кылым» тобунун ырчысы, үн жаздыруучу «Экарекордс» студиясынын негиздөөчүсү катары таанылган, ырчы айымдын продюсери Эрнест Үмөталиев романтикалык кече уюштуруп, бриллиант көздүү шакек салып, колун сурады. Эки жаштын сүйүү баяны, жашоосу, чыгармачылыгы тууралуу маек төмөндө.

– Эрнест, Чолпонай, алгач силерди куттуктап өтөйүн. Бул алдын ала пландалган иш беле?
Эрнест: – Колун сураарымды Чолпонай билген эмес. Мен өзүм эле пландап койгом.

– Чолпонай, ушундай болорун күттүң беле?
– Жок, күткөн эмесмин. Концерттен кийин борбордогу караокелердин бирине барып жакын досторубуз менен отуралы, ырдайлы деп эле пландаганбыз. Барсак эле ал жакта да өзгөчө жасалга, полго роза гүлдөр төшөлүп, шамдар күйүп турат. Анан Эрнест колума шакек салып, баш кошууга макулдугумду сурады. Күтүлбөгөн окуя катуу толкундантты.

– Эрнест, ата-энеңе да билдирген эмессиңби?
– Ушундай планым бар экенин ата-энем билишкен. Алар концерттен чыгып түз эле үйгө кетишкен. Ата-энем дайыма «сен кандай иш баштаба, эмне ойлобо, биз сен жактабыз, дайыма колдообузду аябайбыз» деп турушат. Апам Чолпонайды кичине кезинен бери билет. Аракетчил, акылдуу окуучусу катары жакшы көрөт.

– 12 жылдан бери тааныш экенсиңер, кыз-жигит болгонуңарга канча болду?
Чолпонай: – 6-7 жылдан бери кыз-жигит катары сүйлөшөбүз.

– 6-7 жыл оңой эмес. Бирок «кыз-жигит» деген сөздү жаныңарга такыр жуутчу эмес элеңер го...
Э.: – Себеби буга чейин үйлөнүү туурасында ойлонгон эмеспиз. Биринчиден, экөөбүз тең жаш элек. Экинчиден, иштеген ишибизден майнап чыгаралы, элге жыйынтыгын көрсөтөлү дегенбиз.

– Чолпонайга шакек салуу оңой эле болдубу? Айтчу сөзүңдү канча күн даярдадың?
– Сөздүн гүлүн терүүгө убакыт чын эле болгон жок. Мен үчүн концертти жогорку деңгээлде өткөрүү башкы планда болчу. Жадакалса концерттен чыгып караокеге баратканда кийинип-чечингенге убакыт болбой, машинада эле шапа-шуп кийинип алдым. Шакек салып жатканда аябай толкундандым, сүрдөдүм.

– Чолпонай, сенин ата-энең үчүн күтүлбөгөн жаңылык болуптур да, алар эмне дешти?
– Макул болушту. Бактылуу болсоң болду дешти.

– Экөөңөрдүн сүйүүңөргө ата-энең каршы деп уккам, чындыгы барбы?
Ч.: – Жок, андай болгон эмес.

– Шакекти тандоо, колунун өлчөмүн билүү кыйын болдубу?
Э.: – Концертти уюштурууда, шакек тандоодо, караокени жасалгалоодо досторум жардам беришти. Шакекке келгенде Назгүл Токтакунова Чолпонайга билгизбей колунун өлчөмүн билди, анан экөөлөп тандадык.

– Эми той качан?
Ч.: – Бул маселени ата-энелерибиз чечет. Алар жолугуп сүйлөшүшөт, анан кеңешип бир күндү белгилеп беришсе, биз качан болбосун макулбуз. Анткени «ата-эне ыраазы болмоюн балдар бактылуу болбойт» деп коюшат го.

– Чолпонай, Эрнест жүрөгүңдү эмнеси менен багындырды?
– «Ак шоола» балдар хорунда ырдап жүргөндө Гүлмира эже адамдын талантына карачу, биз да ошондой тарбияланганбыз. Ким таланттуу, ошол ырчы болот, алдыга чыгат деп түшүнчүбүз. Эрнест биздин хордун ырчысы болчу. Ал мени таланты менен арбап алды. Азыр кандай иш баштабасын, майын чыгарат, аны орто жерден таштабайт. Кыскасы, мен үчүн идеалдуу адам, таланттуу үй-бүлөнүн баласы. Ата-энеси Турдубек байке менен Гүлмира эже – белгилүү композиторлор, таятасы Шарыпкул Үсөнгулов – акын-жазуучу, драматург, композитор.

– Эрнест, «өмүрлүк жар, балдарымдын энеси болчу кыз ушул» деген чечимди эмнесине карап кабыл алдың?
– Сүйүүнүн көзү сокур. Сүйүү баарын жеңет. Ортодогу сезимдер биринчи орунга чыкты. Анан да Чолпонайдын эмгекчилдигин бааладым.

– Чолпонайды тийишкен жигиттерден кызганасыңбы?
– Чолпонай менин кызганышыма эч качан жол берген эмес. Ачуумдун кандай экенин билет. Бизде бири-бирибизге болгон ишеним күч. Ишеним болбосо, жакшы үй-бүлө курулбайт. Негизи, кызганчаак эмес, аябай кызганчаакмын.

– Бири-бириңерди биринчи жолу көргөн күн эсиңердеби?
Ч.: – Анда экөөбүз тең кичинекейбиз да. Мен «Ак шоолага» 2-классымда келгем. Бир аз убакыт даярдоо тайпасында жүрүп, анан негизги курамга киргем. 5-6-класстан тарта «Эка байке» деп артынан жүргөнүм, ар нерселерди сурай бергеним эсимде. Ага чейинки убакты эстей албайм. Биздин хордо тартип катуу эле. Бир жашка эле улуу болсо эже-байке деп сыйлачубуз. Элге аты чыгып калган Алмаз Адамалиев, Айбек Замиров деген ырчылар да биздин хордон чыгышкан. Азыр аларды атынан айтам. Алмаз тамашалап «сен мени байке деп айтчу элең го, кичинекей эле кыз элең» деп айта берет.
Э.: – «Ак шоолада» бактылуу балалыгыбыз өтүптүр. Топтогу балдар достон да жакын тууган болуп калыптырбыз. Шакек салгандан кийин хордо ырдаган Төрөкул деген иним менден ашып бактылуу болуп, «ушул окуяны көргөнүмө толкунданып жатам» деп ыйлап алыптыр.

– «Кылым» тобуна Чолпонайды «жактырган кызым» деп эле кошуп алсаң керек...
– «Кылым» тобун 19 жашымда түзгөм. Ушул топту түзүп, анан эстрада деген эмне экенин түшүндүк. Топ «Ак шооланын» таланттуу биринчи бүтүрүүчүлөрүнөн түзүлгөн. Чолпонай да алардын катарын толуктачу. Менин топ ачам деген оюмду апам колдоп берди. Ыр жаздырууга, форма тиктирүүгө да акчасын аяган жок.

– Эрнест, азыр такыр ырдабай калдың, эмнеге?
– Мен өзүмдү ырчылыктан эмес, сахнанын артынан таптым. Мага ырдагандан көрө аранжировка жасаган, кино тарткан көбүрөөк жагат. Ошондуктан мындан ары ырдабай эле коюуну чечтим. Бирок сагынам. Ошондуктан достор менен караокеде ырдап турам.

– Эми кепти Чолпонайдын концертине бурсак, өзүңөр ойлогондой эле өттүбү?
Ч.: – Концерт деп чуркап жүрүп катуу чарчаптырбыз, уйкудан да калган элек. Уйкунун планын жакшы эле толтурдук окшойт. Бирок баары бир чарчаганыбыз жазылган жок. Кылган ишибиз, анын жыйынтыгы мага аябай жакты.
Э.: – Мен каалаган нерсенин 60 пайызы аткарылды десем болот. Жетишкендигибиз, буга чейин мындай жасалганы эч бир ырчы колдонгон эмес, Алматыдан лазердик шоу алып келдик. Ата-энелерибиз, туугандарыбыз да «2 саатка созулганы менен, жарым саатта бүтүп калгандай болду. Тойбой калдык, концерт бир дем менен өттү» деп айтышты. Ал эми репетиция кылууга сахнаны бербей койгону бир топ аксатып койду. Концерттин жакшы болгонун келген ырчылар өздөрү да айтып жатышты.

Сүйүн Кулматова
star@super.kg