«Большие люди» теледолбоорундагы Бема, Айка деген сулууларды көпчүлүк таанып калышпады беле. Аты аталган кыздардын дайыны чыкпай калган соң алардын да ордун баскандар табылган. «Жаңы кыргыздар» долбоорунда МАИчи кыз Жиканын ролун жараткан, ага чейин «Тамашоудо» «Бир туугандар» командасында ойногон, «До+Фа» тасмасында да көрөрмандардын көңүлүн бурган тамашөкөй кыз Бегимай менен жакындан тааныштырабыз.

Аты-жөнү – Бегимай Турарбекова
Туулган жылы, айы – 1990-жыл, 18-август
Туулган жери – Бишкек шаары
Канча бир тууган – 3 бир туугандын улуусу
Үй-бүлөлүк абалы – Үй-бүлөлүү

– Бегимай, чыгармачылыктагы карьераң кайда, кантип башталды?
– Чыгармачылыктын пайдубалын мектептен эле куйгам десем болчудай. Борбордо 4-класска чейин окуп, анан Ысык-Ата районунун Чолпон айылына көчүп кеттик. Ыр-бийге жакын өстүм. Спектаклдерде аяз кыз, жез кемпир сыяктуу каармандарды ойночумун. Окууну аяктагандан кийин Бишкек гуманитардык университетинин филология факультетине тапшырдым. Мына ошондон баштап менин карьерам башталды. Бош убактымды ораторлук искусстводон, вокалдан сабак алууга жумшадым. 1-курстан эле «Relax» деген команда түзүп, факультеттер аралык КВНге катыша баштадык. Ошол эле жылы БГУдагы командалар ичинде 1-орунду алдык. Калыстар тобунда Нурлан Мамакеев, Элдияр Кененсаров сыяктуу элге таанымал адамдар отурушчу. Ушул адамдар талантымды байкап, анан мени ар кандай долбоорлорго чакыра башташты. Элдияр байке «Большие люди» долбооруна чакырды. Айка, Бема менен чогуу ойнодум.

– «Тамашоудо» да ойноп жүрдүң беле?
– «Relax» командасы жалаң кыздардан түзүлгөн. Кыздар кеңешип «Тамашоуго» катышмай болдук. Мен деле жыргатып кыргызча сүйлөбөйм, жанымдагылар менден жаман кыйналышчу. Калыстар тобу биз чыккандан кийин «аракетиңер жакшы» деп гана өтүп кетишчү. Спорт Ордосунда 1-2 жолу ойногон соң тарап кеттик. Андан кийин «Бир туугандар» командасы менен чыгып калдым. Бул команда айылдык кеңештин депутаттарынан, үй-бүлөлүү адамдардан түзүлгөн эле. «Тамашоудо» биринчи оюн көрсөткөндө мен МАИчи кыздын образын жараткам. Ошондо эле калыстар тобу мага «мыкты оюнчу» деген диплом ыйгарышты. Долбоордун фонариктери болгон Азамат Исмаилов сыяктуулар ошондон тарта мени атаандаш катары карап жатышкандай туюлду.

– «Кыргызчадан жакшы эмесмин» деп жатпайсыңбы, андай болсо кыргызча долбоордон мыкты деген наамды кантип алдың?
– Мен ойноп жатканда кыргызчадан көп кыйналбайм. Эң негизгиси тамашадагы юморду түшүнүп алышым керек. Кайсы жерин кандай аткарсам күлкү жаратам, ошону сезе алам. Дайыма сценарийден чыгып ойнойм, аны менен чектелсем «кайсы жери кандай эле» деп ойлонуп бузуп алам. Юморго жараша көзүмдү кысып, ар түрдүү кыймыл-аракетти кошо берем. Мени «Тамашоудон» калыстар тобунда отурган Эрнест Абдыжапаров байкап калып «До+Фа» фильмине чакырган. Доорон ачка болуп жыгылып калганда «каза болду» деп жатаканага жайган кыздын образын жаратуу мен үчүн бир топ кыйын болду. Камеранын алдында иштеп көнгөнүм менен киного тартылуу бир кыйла татаал экен. Бир нече дубль менен араң эптегем.

– Качан турмушка чыктың эле?
– Турмушка 4-курстун аягында чыктым. Артымдан чуркап жүргөн жигиттин туулган күнү болуп кафеге барып калдык. Ошондо Гүлнур Сатылганованын ырларынан ырдагам, аны мага сөз айтып жүргөн жигит телефонуна тартып алып, видеону досуна көрсөтүптүр. Ал ырдаганымды жактырып, телефон номеримди алат. 1-2 айдай телефондон сүйлөшүп, СМС жазышып жүрүп жолугууга өттүк. Жарым жылдан кийин үйлөндүк. Азыр «мени досуңдан тартып алгансың» деп тамашалап калам. Жолдошум – Максатбек Өзгөндөн болот, укук коргоо тармагында иштейт. Турмушка чыккандан кийин киного тартылдым, «Жаңы кыргыздарда» МАИчи кыздын ролун ойнодум. МАИчи кыздар токтоо, ишин так аткарган адамдар келишет эмеспи. А мен, тескерисинче, ойсоктогон, дайыма боёнгон, чоюлган кызматкермин. Айдоочуларга тийишип эле басып жүрөм. Ай-күнүмө жакындап калгандыктан азыр бул иштерден четтедим. Жолдошум чыгармачыл чөйрөдөн болбогону менен мени туура түшүнөт, съёмка болсо өзү жеткирип коёт.

– Кайын-журт бар дегендей, алар сенин кош бойлуу экениңе карабай роль жаратканыңа кандай карашты?
– Алар мени менен сыймыктанышат. Чектен ашкан роль болсо албетте баш тартам, биздин менталитетке да туура келбейт эмеспи. Бирок жигиттин сүйлөшкөн кызынын ролун ойной берем.

– Рахмат маегиңе, аман-эсен көз жарып ал!

Сүйүн Кулматова
star@super.kg