8-июнь Чүй облусунун Ысык-Ата районуна караштуу Достук айылынын кичинекей тургуну, 6 жашар Милананын туулган күнү болчу. Ата-энеси кызынын өздүк майрамынын урматына келчү коноктордун камын көрүп жатканда, Милана бир туугандары менен дүкөнгө балмуздакка чуркаган. Ошол балмуздак көчөт кыздын өмүрүндөгү акыркы балмуздагы болот деп эч кимдин оюна келген эмес. Айдоочулук тажрыйбасы жок, 26 жаштагы Алмагүл аттуу айым башкарып бара жаткан унаасы менен 5 баланы тебелеп кетип, унаанын алдында калган 6 жаштагы Милана каза тапкан.

Жалынбек Каримов,
Милананын атасы:
“ОШОЛ КҮН КЫЗЫМДЫН ТУУЛГАН КҮНҮ БОЛЧУ”
– Мындан 6 жыл мурун Милана жарык дүйнөгө келип баарыбызды кубанткан. Кырсык болгон күнү үйгө коноктор келет деп камданып жатканбыз. Аӊгыча 12 жаштагы балдызым келип, “балдарды ээрчитип балмуздак алып келеличи” деп суранды. Балдызым, кичинекей кайним, анан Милана, дагы 1 кызым, уулум болуп бешөө дүкөнгө кетишкен. Окуя каш-кабактын ортосунда эле болуп кетти. Мен кырсыкты өз көзүм менен көргөн жокмун. Бирок окуя болгон жерде эшиктин алдында чай ичип отурган кошуналардын баары көрүшүптүр.
Бешөө келе жатышса күмүш түстүү жеӊил машина келип, түз эле балдарды көздөй айдаган экен. Кайним, балдызым, анан 5 жаштагы кызым бактыга жараша жаракат алышпаптыр. 2 жаш 9 айлык балам катуу жаракат алып, оор операцияны башынан өткөрдү. Ал эми ошол күнү 6 жашка жаӊы толгон кызым Милана ооруканадан каза тапты.
Бул ишти көзөмөлдөгөн бир да укук коргоо кызматкерин кезиктире албай келем. Милананы жерге берип, сөөк коюу каадасынан бошогуча күнөөлүүнү милиция кызматкерлери камап, тергөө жүргүзүп жатса керек деген ойдо жүргөнбүз. Бир күнү кошуналар “аныӊар эркиндикте эле басып жүрөт” деп калышты. Муну уккандан кийин прокуратурага арыз менен кайрылдым. Алар тергөөчүнү алмаштырып беришти. Кызымды тебелеп кеткенде ага илинип чыккан унаанын бамперинин сыныгын, балдардын окуя болгон жердеги калып калган бут кийимдерин таштандыга алып барып ыргытып жиберишиптир. Кийин аны да издеп таап келип тергөөчүгө тапшырдым. Эми кандай чара көрүлөт билбейм. Белгисиз бирөөлөр дарбазабыздын сыртына “колуӊардан эмне келет?” деген сыяктуу ыплас сөздөрдү жазып кетишиптир.

Назгүл Озконбаева,
окуянын күбөсү:

“МЕНИ “КАНЧА АКЧАГА ЖАЛДАНДЫҢ ЭЛЕ?” ДЕП КЕМСИНТТИ”
– Мен окуяга күбө болгондордун биримин. Ошол жерден баланын кыйналып жатканын, баласын жоготкон ата-эненин күйүтүн көрүп туруп унчукпай тура албайт экенсиӊ. Мен милиция бөлүмүнө суроолоруна жооп берейин деп барсам, күнөөлүү тараптын жактоочусу “Сага канча акча берди эле? Эмне калп айтып жатасыӊ?” деп кайра аброюма шек келтирип жатпайбы. Бул жерде адам, кенедей наристе өлүп жатат. Ал эмне, далил эмеспи?! Наристенин өлүмүн кайсы абийир менен жаап-жашырууну көздөп жатышат?
Ошол күнү биз эшиктин алдында чай ичип отурганбыз. Балдар жол чекеси менен келе жатышкан. Күмүш түстүү машинанын айдоочусу рулду башкара албай калдыбы, айтор, түз эле балдарды көздөй айдады. Биз отурган жерибизден чуркап бардык. 2 баланы дөӊгөлөктүн эки жагынан алып чыгышты. Ары жактан кошуна машинасы менен келе жатыптыр. Аны токтотуп, ичине жабыр тарткандарды сала баштадык. Тебелеп кеткен машинадан бир кыз чыгып эле ыйлап, ары-бери чуркап калды. Аӊгыча бир киши ошол унаадан түшүп келип кызды отургузду да, өзү рулга отуруп машинаны кайра айдап жөнөдү. Ошол маалда дөӊгөлөктүн алдынан бир кийим көрүнгөнүн байкап калдык. Көрсө, ал маркум кыз Милана экен. Биз кыйкыргыча эле дөӊгөлөк менен тебелетип туруп жолун улап кетти. Унаанын алдындагы бампердин сыныгына илинип артынан кыздын боз ала чаӊ болуп жерде жатканын көрдүк. Барсак кыз эсин жоготуп койгон экен. Аны да унаага салып, Чүй облустук ооруканасына алып жөнөдүк. Ал жактан эсине келип, атасына “папа, суусадым” деп сүйлөп жаткан дейт. 2 сааттан кийин үзүлүптүр.

Райхан Каримова,
Милананын апасы:

“ҮЙ КАМАГЫНА ЧЫГАРЫП БЕРГИЛЕ ДЕП ТУУГАНДАРЫ КЕЛИПТИР”
– Адамдар баарына кайдигер болуп эле баратабыз. Кызым каза болгону аз келгенсип, аз жерден кичүү уулуман да ажырап кала жаздадым. Дарыгерлер жалынып-жалбармайынча өз милдеттерин аткарбай калышканына мен да ынандым. Кичүү уулумду текшерүүдөн өткөрүп, “коркунуч жок, баары жайында” деп коюшкан. Бир маалда ал да эсин жоготуп, деми чыкпай калды. “Карап койгулачы” деп барсам, “балаӊ уктап жатат” деп коюшат. “Мен билем да балам уктап жатканда кандай болорун” деп жатып араӊ караттым. Көрсө, боору жарылып кетиптир. Операциядан соӊ комада көпкө жатты.
Уулум эми бир нече жылга чейин кенен басып, секирип ойной албайт. Бардык нерсеге режим кармап, балалык ойноок кези чектелип отурат. Кызымды жоготконум аз келгенсип, 2 жарым жаштагы баламдын ушунча кыйналып жатканын көрүп туруу эне үчүн эмне деген гана азап?! Бул ишке себепкерлер болсо жазасын албай эркиндикте жүрүшөт. Анан да туугандары “үй камагына чыгарып кетүүгө макулдугуӊарды бергиле” деп келишиптир.

Бул боюнча укук коргоо кызматкерлери эмне дейт, мыйзамдын негизинде кандай чаралар көрүлүп жатат? Чүй ОИИББинин маалымат кызматынын кызматкери Айбек Арзиматовго кайрылдык.

“АЙЫПТАЛУУЧУ УЧУРДА ООРУКАНАДА”
– Бул факт боюнча Кылмыш жана жаза кодексинин 281-беренесинин экинчи пункту (транспорт каражаттарынын кыймыл жана пайдалануу коопсуздугунун эрежелерин бузуунун негизинде жабырлануучунун өлүмүнө алып келүү же анын саламаттыгына оор жаракат келтирүү) боюнча кылмыш иши козголуп, тергөө жүрүп жатат. Учурда күнөөлүү делинип жаткан 26 жаштагы Алмагүл ооруканада дарыланууда. Анын ден соолугу тууралуу тергөө иштеринин кызыкчылыгы үчүн ашыкча маалымат бере албайбыз. Качан ал суроолорго толук кандуу жооп бере турган абалга келгенде тиешелүү органдарга өткөрүлүп берилет. Бул окуянын айланасындагы башка адамдар суракка жооп берип жатышат.

Күнөөлүү делген тараптан жооп алууга аракет кылып, бирок байланышууга мүмкүн болгон жок. Эгер байланыш түзүлүп калса алардын да ою менен кабардар кылмакчыбыз.
Көчөт кыздын убалы менен эненин көз жашы күнөөлүүлөрдү тынч койбосо керек. Кандай болгон күндө да тиешелүү органдар күнөөлүүнү аныктап, жабырлануучулардын көксөөсү сууйт деп үмүт кылып туралы.

Гүлжан Асанкожоева
koom@super.kg