Күн сайын кыргыз сахнасын багындырам деген жаштардын саны арбууда. Алардын бири жагымдуу үнү, корейликтерге түспөлдөш жүзү менен калкыбызга таанылып келе жаткан Айар аттуу ырчы жигит. Жаңыдан шоу-бизнестин даамын татып жаткан ырчыны окурмандар менен тааныштырабыз.

Туулган жылы, күнү – 1991-жыл, 8-декабрь
Туулган жери – Ысык-Көл облусу, Түп району, Сары-Дөбө айылы
Үй-бүлөдө – агасы жана 2 эжеси бар
Билими – К.Тыныстанов атындагы Ысык-Көл мамлекеттик университетинин экономика факультетин аяктаган
Репертуарындагы ырлары – “Ардагым”, “Карындашым”

– Айар, сеникиндей ысымды уга элек экем, бул өз атыңбы же псевдонимби?
– Айар – бул менин шоу-бизнестеги жеке брендим. Көптөр аны 3 тамга менен Аяр деп жазып коюшат. Негизи андай эмес, 4 тамга менен жазылган эң сонун ысым (күлүп).
– Сахна адамы болом деген ой сага качан келди эле?
– Апам аябай жакшы ырдайт. Ал жаштыгында ырчы болууну самаган экен. Бирок ойлогон ойду кыстаган турмуш жеңип, сахна адамы болбой калыптыр. Ошого апамдын тилегин орундатып мен ырчы болом деп чечкем. Бала кезден апамдын ырдаганын угуп чоңойдум. Биринчи жолу сахнага 9-класста чыктым. “Фрунзенин кечтери” деген ырды көлдөгү стадиондо болгон концертте аткаргам. Эки бутум калчылдап, ырдын сөздөрүн унутуп кала жаздагам. Ошондон тарта сахна уктасам түшүмдөн, ойлонсом оюмдан кетпей койду. 2013-жылга чейин түрдүү себептерден улам ырдап чыга албай жүрдүм. Ырчы болуу маңдайыма жазылган экен, эми минтип аз да болсо элге тааныла баштадым.
– Кесибиңдин сага эмнеси кызыктуу?
– Кыялымдын орундалып жатканынын өзү кызык. Ыр жаздыруу, клип тарттыруу, чыгармачыл инсандын жашоосун баштан өткөрүү, сахна артындагы турмушту кечирүү мен көптөн көп эңсеген нерсе да. Ошондуктан мен үчүн баары кызык.
– Продюсериң менен кандайча иштешип калдың эле?
– Бир убакта кафеде ырчы болуп иштеп жүргөм. Ошондо мени Арсен байке (ред. Мендебаев) экөөбүздүн тааныштарыбыз көрүп, ага мен тууралуу айтышыптыр. Кийин тааныштык, чогуу иштеше аларыбызга көзү жеткен соң Арсен байке продюсерлик кылуу сунушун киргизди.
– Клиптериңдеги чач жасалгаң, кийингениң англиялык мырзалардын образын эске салат. Бул образ өзгөрүп турабы?
– Стилимдин мындан ары өзгөрүп-өзгөрбөшү продюсерим экөөбүздүн фантазиябызга ылайык болот. Дайыма угармандарымды жаңы образдарым менен кызыктырып турууга аракет кылам.
– Ырчылык менин түбөлүктүү кесибим деп ишеничтүү айта аласыңбы?
– Бул чечим жети жолу эмес, жетимиш жолу өлчөнүп чыгарылган. Ошондуктан музыканы түбөлүктүү кесип катары тандап алдым. Кудай буюрса, келечегимди музыка менен гана байланыштырам.
– Сени көчө-белде таанып, кол тамга сурагандар болуп жатабы?
– Мен мурун көчөдө бейкапар, кенен, каалагандай басып жүрө берчүмүн. Сейил бактарда, базарда жүргөндө өзүмдү ыңгайсыз сезчү эмесмин. Азыр болсо адамдардын мага көзү түшүп жатканын байкап ыңгайсыз боло берем. Көпчүлүктүн сынына кабылат экенсиң. Өзүмдү татыктуу алып жүрүүм керектигин түшүндүм. Ошол жашоого өзүмдү акырындан тарбиялап, көнүп келе жатам. Азырынча артымдан чуркап кол тамга сурап, көз жаш кылган кыздар жок (күлүп).
– Айар аттуу өзгөчө ысымдын ээси баарын эле аяй берген өтө жумшак адам болсо керек?
– Чындыгында, ошондой. Атыма затым жарашат (күлүп). Бирөөнүн көңүлү оорубасын деп эле кыйнала берем. Ишээнчектик сапатым өзүмө жакпайт.
– Ишиңди ийгилик коштосун!

(Айардын "Ардагым" ырынын тексти 21-бетте).

Нуркыз Курманбек кызы
star@super.kg