15-октябрь, 2014-жыл. Бул күндү 15 жашар өспүрүм көрбөй калды. Нөөмөт бөлүмгө түшкөн маалымат боюнча окуя болгон жерге барган Сокулук РИИБинин кызматкерлери мыкаачылык менен өлтүрүлүп, андан соң өрттөлгөн адамдын денесине күбө болушат. Анын өздүгүн тактоо аракети көрүлүп, ошол эле күнү баласын издеп арыз жазган Тотугүл айымдын үйүнө келишет.

«БАЛАМДЫН ӨЛГӨНҮН ЖОЛДОН УГУЗУШТУ»
15 жаштагы баласынын өлүмүнө эмдигиче ишене албай жаткан эне көзүнөн жашы сызылып, окулган куранга алаканын жайып бата кылды да, сөзүн баштады. Анын айтымында, уулу Айбек кичинесинен тарта ден соолугунан мүмкүнчүлүгү чектелип, сүйлөй алчу эмес.
– Балам абдан жароокер, кабагым-кашым дебеген жан болчу. Сүйлөй албаган пенде кантип анан бирөөгө жамандык кылсын? Уулум 14-октябрда сыртка чыккан. Кошунабыздын бири келип, «балаңар Школьный көчөсү жакта жалгыз жүрөт» деп калды. Эшикке чыгып эле таппай калдык. Түнү менен издедик, издебеген жерибиз калган жок. Эртеси эртең менен милицияга кайрылып, арыз жаздым.
Каргаша ошол күнү кечинде эшик какпай кирип келди. Милиция кызматкерлери келип, «Эже, «Манас» аэропорту жактан бир адам табылды. Сиз анын өздүгүн тактоого жардам бериңиз. Балаңыз болушу мүмкүн. Арыз менен кайрылган үчүн сизге келдик» дешти. Жолдо катар табылган баланын кийим-кечесин, кийген байпагына чейин менин баламдыкындай кылып сүрөттөп айтып беришти. «Ооба, менин балам. Дал ошондой кийимдери менен чыккан, деги тирүүбү?» десем, «сабыр кылыңыз, каза болуп калыптыр» дешти. Окуя болгон жерге барып ошол көрүнүштү карап тургуча көзүм сокур болуп калбай эмне дедим. Өлүмдүн адамга ушундай келишин биринчи көрүшүм. Анан калса бул мыкаачылык адам колунан келгенине ишене албай турдум. Башы жарылып, көзү жок. Күлгөндө күрүчтөй тизилип көрүнө калчу тиштеринин бири жок. Анан калса белинен өйдө өрттөп жиберишиптир. Боздоп кала бердим. Уулумду жерге бергенден 3 күн өткөндөн кийин тергөөчү кылмышка шектүү эки бала колго түшүрүлгөнүн айтты. «Баламды өлтүргөн эки зөөкүрдү көрсөткүлөчү. Мындай мыкаачылык кимдин колунан келди?» деп сурандым. Солкулдаган жапжаш балдар экен, бири 18де, бири 21де. Адам өлтүрөт деп ойлочудай немелер болсочу.

«СҮРӨТТӨРДӨГҮ ЭЛЕСИ ГАНА КАЛДЫ»
– Угушума караганда, ошол күнү менин уулумду өлтүрдү деп кармалгандардын бири биз тарапка келип, кайра кетип бара жатса алдынан Айбек жолугуп калыптыр. Аны шакаба чеккенби же башкабы, айтор, «сыра ич» деп жетелеп кетиптир. Жолдон досуна жолугуп, баламды үйдөн алыс токой тарапка алып барган экен. Өлүгү ошол жерден табылды, себептери белгисиз, өзүм окуя тууралуу эч нерсе дей албайм.
Балам өз алдынча бир нерсе кылчу эмес. «апа, нан жейм, чай ичем, ачкамын», ушул сыяктуу керектүү нерселерин айтып түшүндүрө алчу. Азыр «апа, тамак ичем» деп эшикти ачып кирип келчүдөй сезилип, анын өлүмүнө ишене албай жатам. Сүрөтүн тиктеп, төрөлгөндөн беркисин элестетсем, дайым күлүп гана жүрчү экен. Азыр бассам-турсам сүрөтүн колума алып, уктасам жаныма коюп жаткан адатым болуп калды. Жашоо улана берет тура. Аза күтүп кичүү уулум менен ушинтип үйдө калам. Жайкысын талаада жер иштетип, кышкысын болсо тигүү цехтеринде иштейм.

КЫЛМЫШТЫН СЕБЕПТЕРИ АНЫКТАЛЫП ЖАТАТ
Тестиер баланын колдун тактары түшүп, кирдеп, бырышып калган сүрөтүн кармалап отурган энени көрүп боор ачыйт. Эненин башына түшкөн оор кайгынын эң ачуусу – анын баласынын өлүмү тура. Тотугүл айымга сабыр тилеп кайттык. Күнөөсүз баланын мынча мыкаачылык менен өлтүрүлгөнүнө эмне себеп болгонун билүү максатында Чүй ОИИББинин басма сөз кызматынын кызматкери АЙБЕК АРЗИМАТОВго кайрылдык:
– Сокулук районуна караштуу токой тилкесинде жайгашкан «Суу» дачасынын түндүк тарабында белгисиз адамдын сөөгү табылгандыгы тууралуу маалымат келип түшкөн. Окуя болгон жерге барып, анын ошол районго караштуу Раздольный айылынын тургуну 15 жаштагы М.Айбек аттуу бала экени аныкталды. Кылмыш болгон жерде отундун күйүктөрү, бөтөлкө сыныктары, кан болгон жана өрттөлгөн кийимдер табылган. Кылмышка шектелип аталган айылга жакын Манас авиашаарчасынын 18 жана 21 жаштагы 2 тургуну кармалды. Тиешелүү соттук-медициналык экспертизалар дайындалып, учурда тергөө иштери жүрүп жатат. Эмне үчүн өлтүрүшкөндөрү аныкталып жатат.

Гүлжан Асанкожоева
koom@super.kg