Өкмөт «Курманжан даткадан» соӊ Шабдан баатыр тууралуу тасма тартууга 10 миллион сом бөлгөн. Бул фильмге баш-аягы 80 миллион сом бөлүнөрү пландалууда. Аны тартуу режиссёр Эрнест Абдыжапаровго тапшырылып, сценарий жазылган. Мына ошол сценарийдин тегерегиндеги талаш-тартыштар жаӊы күч менен от алды.

Эрнест Абдыжапаров: «Молдокасымов Шабдан саткын болгон деп макала жазган»
Талкуунун кайрадан от алышы режиссёр Эрнест Абдыжапаровдун 24.kg маалымат агенттигине берген маегинен башталды. Ал мындай дейт: «Мен бул ишке аралашууга чыгармачыл процесстен алыс адамдарга жол берилгенине өкүнөм. Буга чейин жазылган сценарийдин 5 версиясында теӊ Шабдан баатырды катынпоз, коркок, акылы кыска көрсөткөн эпизоддор жок. Мисалы, Кыяс Молдокасымов 10 жыл мурун «Шабдан кыргыз элинин саткыны болгон» деп макала жазган, а бүгүн бул тарыхчы баатырдын намысын коргоп жатат. Тарыхый киноэпопеяны жаратуу үчүн тарыхый булактарга кайрылуу жетишсиз».

ТАРЫХЧЫ РЕЖИССЁРГО КЕЧИРИМ СУРООГО БИР АПТА УБАКЫТ БЕРДИ
Жогорудагы Эрнест Абдыжапаровдун маегинен кийин тарыхчы Кыяс Молдокасымов интернеттеги баракчасына төмөндөгүдөй билдирүү илди:
«Эрнест мырза айтканын далилдей албаса, сот алдында жооп берет. Ал менин 10 жыл мурда Шабданды саткын деп айтканымды же жазганымды далилдеп бериши керек. Тескерисинче, айрым кесиптештеримдин Шабдан баатырды саткын, чыккынчы, орус тыӊчысы деп айтып, жазып келгендеринен коргоп келем. Бир жуманын ичинде кесиптик жана инсандык беделиме доо кетиргени үчүн Эрнест мырза кечирим сурабаса, чындыкты сот залынан далилдешип калабыз».
Андан ары тарыхчы «Шабдан баатыр» көркөм тасмасынын сценарийи эмнеликтен мынчалык талкууга алынып жатканына, тарыхчылар кийлигишпесе кандай орчундуу каталар орун аларына токтолгон.
«Талкуу, кийлигишүү болбосо, көркөм тасманын сценарийинде Алымбек датканы чыккынчы, башы жок чабандеске айландырганы үчүн анын урпактары түп көтөрүлө чыгышмак. Бугу менен сарыбагыштын ортосундагы кандуу окуяга Шабданды аралаштырып койгону үчүн Көлдүн эли толкуп чыкмак. Кыргызды кыргынга салган Кененсарынын батасын алып, көркөм тасмада баралына жеткен Шабдан үчүн Чүйдүн эли жөн жатмак эмес. Шабданды "ОБОНчу" аялдарга талатканы үчүн урпактары карап турат беле?
Бизге Шабдан баатырдын инсандык улуу сапаттарын даӊазалаган, кыргызды чабыштырбай бириктирген, рухун көтөргөн, азыркы эл башкарган мыктыларга сабак болгон, тарых бурмаланбаган тасма керек! Жүз жыл кыргызды кырып жок кыла албаган, чачыратып чабыштырган калмактардын идеологиясынан арылып, нукура кыргыз идеологиясына негизделген көркөм тасма керек!»- дейт Кыяс Молдокасымов.

Мирлан Өмүралиев
politika@super.kg