Аптанын окуясы

11-январда Бишкек аскердик гарнизондук соту Исмаил Исаковду генерал-лейтенанттык чининен ажыратуу менен 8 жылга кесүү жана аны сот залында камакка алуу өкүмүн чыгарды.

Соттун чечими залдагы элдин нааразылыгын жаратты. Мурдатан даярдалган аскерлер Исмаил Исаковду сот залында камакка алышты. Ал эми мамлекеттик айыптоочулардын И.Исаковдун үй-мүлкүн конфискациялоо боюнча өтүнүчү сот тарабынан канааттандырылган жок. Исмаил Исаковдун адвокаты Азимбек Бекназаров Бишкек Гарнизондук сотунун чечимин жокко чыгаруу үчүн жогорку инстанцияларга кайрыларын билдирди.
12-январда Бириккен элдик кыймылдын жыйыны болуп, анда Исмаил Исаковду жана Петровка окуясы боюнча соттолуп жаткандарды коргоо комитети түзүлдү. Комитет төрагалыгына Топчубек Тургуналиев шайланып, ал 13-январдан тарта 9 адам мөөнөтсүз ачкачылык акциясын баштаганын билдирди.
Жыйында БЭК өлкө башчысы Курманбек Бакиевге Исмаил Исаковду бошотуу талабын коюп билдирүү таратты. Анда И.Исаков Коргоо министри кезинде армиянын ишин оңдогону, аскерлердин материалдык-техникалык муктаждыктарын чечкени белгиленген. Билдирүүдө “Исмаил Исаковго чыгарылган өкүм оппозицияны да, бийликтеги кызматкерлерди да коркутууга багытталган. Аны камоо менен саясий репрессиянын кезектеги этабы башталып, ал саясий террорго айланууда” деп белгиленет.
Исмаил Исаковдун камакка алынышы боюнча Бишкекте бул иштер болуп жатса, экс-Коргоо министринин Алай районундагы талапкерлери Сопу-Коргон кыштагынын кире беришине төрт боз үй тигип, 12-январда мөөнөтсүз нааразылык акцияларын баштаганын «Азаттык» радиосу маалымдады. Нааразылык билдиришкен Алайдын тургундары 12-январда президент Курманбек Бакиевге кайрылуу жолдошуп, И.Исаковду абактан бошотууну, сот ишин адилет, акыйкат жүргүзүүнү талап кылышкан. Нааразылык акциясына чыккандар менен жолугушкан Ош облусунун губернатору Мамасадык Бакиров алайлыктардын кайрылуусун президентке жолдогонун, Ак үйдөн жооп күтүп жатканын билдирген.

АКЦИЯНЫН КАТЫШУУЧУЛАРЫ ЭМНЕ ДЕЙТ?
ТОПЧУБЕК ТУРГУНАЛИЕВ, коомдук ишмер:
– Учурда экс-министр Исмаил Исаковдун камалышына нааразы болгон тогуз адам ачкачылык акциясын баштадык. Алардын ичинен үчөөбүз – эркектер, алтоо – айымдар. Биздин ачкачылык жарыялообуз саясий шоу эмес. Бүгүнкү күндөгү саясий шоуну бийликтегилер кылып жатышат. Биз бийликке «саясий куугунтугун токтотсун, жалган күнөө менен камакта отургандарды бошотсун!» деген талаптар менен ушул кадамдарга барып жатабыз. Мындай кадамдарды туура эле баштаган экенбиз. Себеп дегенде биздин бул кадамдарыбызды колдоп, кошулабыз дегендер арбын. Биз талаптарыбыз аткарылмайынча ачарчылыкты уланта бермекчибиз.

БОКУШЕВА ЖИБЕК, Жайыл районунун тургуну:
– Мен Исмаил мырзанын эч кимиси болбойм. Адамдын ат көтөргүс жакшылыктарын эстебей кылдан кыйкым издеп, эптеп эле түрмөгө тыгуу үчүн бийликтин жасаган аракеттерине баракелде!
“Ак ийилет, бирок сынбайт” деген сөз бар кыргызда, И.Исаков учурда ийилип турган кези, бирок сынбайт деп ишенебиз. Акыйкаттык болмоюнча мен ачкачылык акциясын уланта бермекчимин.

Кытайга жасаган иш сапары учурунда “Кыргызстан Кытай менен кызматташууну тереңдетүүгө кызыктар”,- деп билдирди Өнүктүрүү, инвестициялар жана инновациялар боюнча борбордук агенттиктин жетекчиси Максим Бакиев.

Максим Бакиев жетектеген делегация 12-январда Пекин шаарында Кытай Эл Республикасынын Өнүктүрүү иштери жана реформалар боюнча мамлекеттик комитетинин төрагасынын орун басары Чжан Сяоцян менен жолугушту. “Биз үчүн Кытайдын экономикалык өнүгүүсүндөгү тажрыйбасы абдан маанилүү жана баалуу болуп саналат. Кытай Азиядагы алдыңкы катардагы мамлекет”,- деп баса белгиледи Максим мырза. Өз кезегинде Чжан Сяоцян Кытай Кыргызстан менен кызматташтыкты өркүндөтүүгө кызыктар экенин айтты. Иш сапардын соңунда “Датка–Кемин” жогорку чыңалуудагы электр линиясын куруу үчүн атайын долбоорго кол коюлду. Долбоорго ылайык, аталган электр линиясын куруу үчүн 342 миллион доллар сарпталмакчы. Курулуш иштерин 2011-жылы баштоо боюнча макулдашылды.
Эскерте кетсек, ушул эле долбоорду Казакстан менен биргеликте куруу маселесин Нурсултан Назарбаев колдоого алгандыгын өкмөт башчы Данияр Үсөнов Казакстанга болгон иш сапарында айтып келген эле.

Бул тууралуу өкмөт башчы Данияр Үсөнов 11-январда президент Курманбек Бакиевдин кабыл алуусунда болгон учурда маалымдады.

Өкмөт башчынын айтуусун­да, быйыл көгүлтүр от үзгүлтүксүз берилет. Энергетика тармагына да 500дөн ашуун жаңы трансформаторлорду орнотуу жана 200дөн ашуун электр линияларын ремонттоо максаттары коюлганын билдирди. Өз кезегинде өлкө башчысы Курманбек Бакиев элди электр энергиясы менен үзгүлтүксүз камсыздоо үчүн бардык чараларды көрүүнү тапшырып, 2010-жылдын 1-апрелинен тартып өлкөнүн бардык аймактарында жарыкты чектөөнү токтотууну талап кылды.
Кыргызстан Өзбекстандан сатып алган көгүлтүр от үчүн өткөн жылы 1000 м³га 240 доллардан төлөп келген. Мурдагы жылы бул баа 145 доллар болчу. А бул жылы 1000 м³га 220 доллардан төлөй турган болду. Ал эми өкмөт газдын тарифтик баасын бул жылы арзандатары же кымбаттатары туурасында так маалымат берген жок.

“Кум-Төр” кенине кыргыз тараптан көзөмөл жүргүзгөн “Кыргыз алтын” ишканасы өкмөттүн колунан Өнүктүрүү, инвестиция жана инновация боюнча борбордук агенттикке өткөрүлүп, ишкананын жетекчиси Алмазбек Жакыпов кызматтан бошотулду.

“Кум-Төр” алтын кенин иштетип жаткан “Центерра голд инк” компаниясы өткөн жылдакы келишимге ылайык, “Кыргыз алтынга” 25 миллион 300 миң доллар баасындагы акциясын өткөрүп берди. Андан сырткары, “Центерра голд инк” компаниясынын 11 кишиден турган директорлор кеңешинин мүчөлүгүнөн “Кыргыз алтындын” жетекчиси Алмазбек Жакыпов бошотулду. Анын ордуна Кыргызстандын атынан Өнүктүрүү, инвестиция жана инновация боюнча борбордук агенттиктин төрагасынын орун басары Алексей Елисеев жана Украина жараны Юрий Косвин кирди.
Мындайда “Мамлекеттик маанидеги мындай орунга Кыргызстандын жараны табылбай калдыбы?” деген суроо туулбай койбойт.

2009-жылы 41 миң 269 кыргызстандык жаран Орусиянын жарандыгын алышкан.

Бул тууралуу Орусиянын Федералдык миграция кызматы маалымдады. Өткөн 2009-жылы 41 миң 269 кыргызстандык Орусиянын жарандыгын алышкан. Ал эми 2008-жылы болсо Кыргызстандын 42 миң 809 атуулу Орусиянын атуулу болуп катталышкан эле. Жалпысынан алганда, 2009-жылы 333 миң 474 чет элдиктер Орусиянын атуулдугун алышыптыр.

Ош шаарындагы коомдук жана саясий уюмдар электр жана жылуулук тарифтерине мораторий киргизүүнү суранып, өлкө башчысына кайрылуу жолдошту.

Анда алар баалардын кымбатташына мораторий жарыялап, өкмөттү таратууну өтүнүшкөн. Муну менен бирге “кризистик мезгилде министрлер кабинетин мамлекет башчысы өзү жетектесин” деген сунуш айтышкан.

“ТОКТОГУЛ” КАСКАДЫНДА СУУ АЗАЮУДА

11-январга карата “Токтогул” ГЭСинде суунун көлөмү 11,436 миллиард м³ду түздү.

Бул тууралуу “Электростанциялар” ишканасынын басма сөз кызматы билдирди. Маалыматка караганда, суунун азайышына аба ырайынын кургакчылдыгы себеп болууда. “Токтогул” ГЭСиндеги суунун көлөмү былтыр ушул күнгө салыштырмалуу 8,268 миллиард, 2008-жылы 10,820 миллиард, 2007-жылы 14,431 миллиард м³ду түзгөн.

Жалал-Абад облусунун Базар-Коргон районундагы Акман айылдык кеңешинин депутаттары доо арызын 11-январда Конституциялык сотко тапшырышты.

“Ата Мекен” партиясынын лидери Өмүрбек Текебаевдин маалыматына караганда, айылдык кеңештин депутаттары “президент Курманбек Бакиев Баш мыйзамга өзгөртүү киргизүү аркылуу бийликти өз колуна чогултуп алууда, ошондуктан президенттин талабы канааттандырылбасын” деп Конституциялык сотко талап коюшкан. Акман айылдык кеңештин депутаттары өкмөттүн отун-энергетикага болгон тариф саясатына да каршы пикир билдиришкен. Өкмөттүн бул кадамын элге каршы саясат катары баалап, элге кайрылуу жолдошкон.

Айбек Кочкоров, Амантур Султанкулов
politika@super.kg