Экс-депутат Турсунбай Бакир уулу менен актриса Нуриза Бурханованын үй-бүлөсүндөгү араздашуу көпчүлүктүн көӊүл чордонунда экени жашыруун эмес. Бир эсе мындай көрүнүш экөөнүн теӊ коомго белгилүү адам болгондугуна байланыштуу болсо керек. Экс-депутат «эл ичинде ар кандайча талкууланып жаткан сөздөргө чекит коём» деп редакциябызга кайрылды.

– Турсунбай агай, акыркы убакта сиздин үй-бүлөӊүз тууралуу айрым маалыматтар коомчулукка жарыя болду. Жубайыӊыз Нуриза Бурханова сиз менен ажырашканын айтып чыккан эле. Сиз «шайлоо алдында атайын кылганбыз, Нуриза ролун мыкты аткарды» дедиӊиз. Бирок Нуриза айым «талак берип ажырашканбыз» деген жооп кайтарды...
– Өзүӊөргө маалым, үй-бүлөм жөнүндө эч нерсе айтчу эмесмин. Себеби үй-бүлө – бул жабык тема. Ал коомго көрсөтүлө турган кино эмес. Өзүм да башкалардын үйүндө эмне болуп жатат деп кызыккан эмесмин. Бирок бир жолу маек берилди, дагы бир жолу, дагы бир жолу... Анан ыраматылык апам айткандай, баканы басса да «бак» дейт экен. Жооп бергенге аргасыз болдум. Жооп бергенде да үй-бүлөнү сактап калайын деп аракет кылгам, ортодо балдарыбыз бар. Нуриза экөөбүз бул тема жабылат деп сүйлөшкөн элек. Түшүнүп жатам, бул жерде чоӊ ролду кайненем аткарып жатат.
Негизи, менин Нуризага үйлөнөйүн деген оюм жок эле. Аны өзү да билет. Бирок ал «кино жолуна, шайтан жолуна бекер туруп алыптырмын, ал жолдон кайтам» деди. Ал жакта романдары да болгон экен. Анан «хиджаб кием, намаз окуйм» деп 5 маал намаз окуй баштады. Мага турмушка чыгам дегенде, мен «өзүӊө ылайык теӊиӊди таап ал» деп айткам. Бирок ал «жок, мен бактым үчүн күрөшөм» деп үйүнөн чыгып кеткен. Мага агасы издеп келди. Мен «Нуриза кайда экенин билем, батирде жашап жатат. Батирдин акысын төлөп берип жатам» дедим. Анткени ага чейин окуусунун акысын да төлөп бергем. Акыры агасы, апасы болуп сүйлөштүк. «Эгер чындап кинодон кетсе, хиджаб кийип намаз окуса, мен да каршы эмесмин» деп айттым. Алар адегенде каршы болушту. Кыргызча, мусулманча салт менен калыӊ берип үйлөндүк. Башка аялдарыма 5-10 жыл дегенде унаа-үй алып берген болсом, Нуризага 2 айда үй алып бердим. Мурдагы кинодо жүргөндөрүн эстен чыгардым.
Кайненем үй-бүлөбүзгө кийлигише баштады. Ошондо үйдөн чыгып кеттим. Кийин өзү келип кечирим сурап, «Нуриза сизди аябай сүйөт экен, кайра жашагыла» деди. Мен «нике кыйып үйлөнгөндөн кийин сиздин кызыӊыз мага аманат, биздин үй-бүлөгө киришпеӊиз. Акырет күнү ал аманатка жооп берем» дедим. Жакшы эле жашап жатканбыз.
Былтыр Бильярд федерациясынын президенти катары демилге көтөрүп, президенттин колдоосу менен Ысык-Көлдүн жээгинде дүйнөлүк 2 чемпионат өткөрдүм. Ал жакка кайненем менен Нуризаны да алып бардым. Экинчи балабыз жаӊы төрөлгөн эле. Бир маалда кайненем Нуризаны ура баштады. Ал бала эмизип жаткан. Нуризага болуштум. Келген меймандарды жайгаштырайын деп чыгып кетсем, кайненем Нуризаны, балдарды алып түнү менен Бишкекке кетип калыптыр. Артынан барайын десем, маанилүү, милдетин өз моюнума алган 2 чемпионат турат. Иш-чаралар бүткөн соӊ сүйлөшсөм, кайненем «биз кулпуларды алмаштырып койдук» деп толтура жаман сөздөрдү айтты. Ал үйдү, машинаны алып алайын деген ой менен үйдөн азыркыга чейин чыкпай жатат. Түшүнөт да. Мен ажымын, барып жаӊжал чыгарбайм. Балдарыма да жолуга албай калдым. Акыры Нуриза экөөбүз көчөдөн, кафелерден жолугушуп калдык. Мейманканаларга барып жүрдүк. «Кайсы мейманканага барабыз?» деп жазган СМСтери азыр да бар. Ошондо «качанкыга чейин ушинтебиз, апаӊа айтпайсыӊбы жер тилкесин алып берейин. Уулу чоӊ жигит, үй салып алышсын, биздикинен чыгышсын» деп айткам. Өкүнүчтүүсү, макул болушкан жок. Шайлоонун алдында «сиз дагы бир үй алыӊыз, биз ошол жакка кетели. Агам менен апам бул үйдө кала беришсин» деди. Ачуум келди. «Акмакты тапкан экенсиӊер, алдап дагы бир үй алдырганы жатасыӊарбы?! Андай болбойт, кайненем үйдү бошотуп койсун!» деп айттым. Же мен миллионер болбосом. Ал үйдү да достордон карыз алып сатып алгам.
Өткөн жума күнү Нуриза «Супер-Инфого» интервьюм чыкты. Бирок ага апам мажбурлады, мени кечирип коюӊуз» деп СМС жазып жибериптир. Гезитти окуп, «Нуриза, эмнеге калп айтасыӊ?» десем, «кечириӊиз» дейт. «Анда чын эле талак алган аял катары менден эч нерсе сураба» дедим. «Мага өтүк алып бериӊиз», «айфон алып бериӊиз» деп жазган СМСтери толтура. Ушундай мамиле кылгандан кийин көӊүл да сууйт экен. Өкүнүчтүүсү, кайненем үйлүү болуп калайын деп кызынын жашоосун бузуп жатат. Нуриза азыр да кечирим сурап СМС жаза берет. Мен балдарым үчүн кечирет элем. Бирок кайненем кийлигишпейт деген кепилдик жок да. Нуриза да, кайненем да хиджаб кийишчү. Эми хиджабды чечип киного кетти.
– Экөөӊүздөр кантип таанышып калгансыздар? Ыйман жолуна түшөрүн сизге кандайча айтып калды?
– Мен интернетте көп отурам. «Эрк» партиясынын жаштар канатына каалоочулар келгиле!» деп интернетке чакыруу жазгам. Агасы экөө келишти. Берилген тапшырманы жакшы аткарчу. Кийин жактырып калганын, буга кошо ачуу чындыкты, башкача айтканда, кино тартып жүргөн, өзү да актёр жигит бузуп койгонун айтты. Муну айтпайын деген элем. Ал ыйман жолуна түшөйүн дегенинен ишенгем да.
– Сиздин «шайлоо алдында атайын жасалган» деген билдирүүӊүздөн улам сурагым келип турат. Кыргыз саясатында да ушундай резонанс жаратуу менен добуш топтосо болобу?
– Ал жерде башка мааниде айтылган эле. Көпчүлүккө Турсунбай Бакир уулу жаш кызды алдады деген сөз таркап кетиптир. Кыргыздардын менталитети ушундай да. Экинчи, үчүнчү аялды жаман көрүшөт эмеспи. Анан Нуриза экөөбүз ажырашканбыз деп интервью бере бер деп сүйлөшкөн элек. Анткени экинчи, үчүнчү аялды шайлоочулар жаман көрсө, ажырашты деп ойлосун дегенбиз.
– Турсунбай агай, коомчулукка таанымал кишисиз. Нуриза айым да кино жаатында белгилүү боло баштаган. Сиздердин үй-бүлөӊүздөр тууралуу коомчулукта талкуу болорун билгенсизби же мындай нерсеге даяр эмес белеӊиз?
– Коом каршы болот, өз теӊиӊди таап ал дегем. Үйүнөн чыгып кетиптир. Апасына барып «мен үйлөнбөйм десем, мага турмушка чыгам деп жатат» дегем. Не кылабыз дедим. Саясатчымын, мен го көнүп калгам деп айттым. Ал «сүйүүм үчүн күрөшөм» деди.
– Нуриза айымга «өз кызыкчылыгыӊды ойлосоӊ, ошондой жооп берүүгө туура келет» деген экенсиз. Мындан улам сизди аны менен жарашууга аракет кылып жатат го деген ой келет...
– Мен урушкан жокмун, урушуп кетсем жарашалы демекмин. Болгону кайсы жамандыгым үчүн ушуга барып жатасыӊар десем жооп бере албайт. Төрөгөндө жеке төрөтканада төрөдү. Чет жерге алып чыгып жаттым. Колумдан келишинче айтканын аткардым. Балдарым үчүн баарын кечирейин дегем. Бирок апасы тигинтип жатса жашоо болбойт. Айла жок балдарымдан кабар алуу гана керек. Башка кем-каржысын өзү табууга туура келет.
Бир жолу силердин гезитиӊер аркылуу «Дастан мага жаным деп жазат» деп мактаныптыр. Мага акча сурап чалды, «жаным дегендерден сурабайсыӊбы» деп айттым. «Сизди кызгандырайын деп ошентип койгом. Эч кимим жок» деп СМС жазып жибериптир.
– Үйүӊүздөр кимдин наамында?
– Жаман оюм жок Нуризанын шаарда каттоосу жок болгондуктан байкесине каттатып койгон элем. Үйдү балдарыма алып бергем. Кайненем да, кайнагам да кирип алды.
– Нуриза өзү жактырып калганын айттыӊыз, сизде жактыруу сезими болду беле?
– Албетте, кийин сезим пайда болду. Балдарымдын энеси катары жакшы көрдүм. Кызым төрөлгөндө жеӊил унаа алып бердим. Кийин «уул төрөп бердим, унаамды жаӊыртып бериӊиз» дегенинен чоӊураак унаа белек кылдым. Эми «дагы бала төрөп берем, дагы унаа алып бересизби?» дейт. «Көрөбүз, кайненем экөөбүздү жашатпай жатат» деп айттым. Ошон үчүн ойлонуп көрөм дедим. Азыр да балдарымдын апасы катары жакшы көрөм. Нуризага шайтан жолунан кайтсаӊ, хиджаб кийсеӊ жарашууга даярмын дегем.
– Балким, азыр өзүӊүз сыртка чыгаргыӊыз келип жаткан ойлор бардыр?
– Негизи, жашоодо ар кандай болот экен. Ыйман жолуна түштүм дегендерге ишенгиӊ келет. Көп жолу хиджабчан кыздар Кудай жолундагы жакшы адамдар деп коргоп келгем. Тилекке каршы, менин башыма келди. Турмушка чыгуу үчүн, үй алдырып, унаа саттырып алуу үчүн хиджаб кийип, кийин максатына жеткенде хиджабды чечип таштап кеткени жанагыдай айткандардын чырагына май тамызып отурат. Адашкандар бар экен. Бирок андайлар аз. Ошондуктан хиджабчан кыздардын дарегине сөз тийбесе дейм.
Кайненеме айткым келет. Өзүӊүз жашоону көргөнсүз, 2 балаӊыз менен кыйналып жүрдүӊүз. Ушул кызыӊыздын бактысы деп макулдугуӊузду берип туруп, эми материалдык байлык үчүн ушундайга барганыӊыз туура эмес деп эсептейм. Кудай алдында жооп берер күн бар. Балдарымды тирүүлөй жетим кылып жатканыӊыз чоӊ күнөө. Кезинде «актрисалардан жакшы аял чыкпайт» деп айткан сөзүӊүздү эсиӊизге салгым келет. Азыр болсо өзүӊүз кызыӊызды ошого түртүп жатасыз. Мен акыреттик күндөн корком. Сиздер да корккула демекчимин.
Интервью берүүгө аргасыз болдум. Жооп кайтарбаска айлам калбады. Бир чети кайненем окуп калса эсине келеби деген үмүт. «Балдарым үчүн кайра ыйман жолуна түшсөӊ кечирем. Анткени балдарым мен үчүн кымбат. Бирок апаӊ кайра эле кийлигише берсе, анда билгениӊерди кылгыла. Сенин бактыӊды ачып бергем. Азыр каякка барбагын, кайсы ММКга интервью алышпасын баары сени «Турсунбай Бакир уулунун экс-аялы» деп эски жашооӊду эстешпейт. Жолуӊду ачып бергем» деп Нуризага айттым. Ушуну менен биздин үй-бүлөнүн күнгөй-тескейи жалпыга маалымдоо каражаттарына чыкпай эле койсо деп суранып кетет элем.