9 ай омурткасы сыздап көтөргөн баласынан кайсы эне жамандык күтсүн? Ар бир эне өз канынан жаралган баладан жалаӊ гана жакшылыктарды үмүт кылып, ак сүтүн эмизет эмеспи. Тилекке каршы, айрымдар эненин ак сүтүн актагандын ордуна кайра ага ажал алып келген учурлар жок эмес. Өткөн аптада Бишкек шаарында 66 жаштагы эне өз уулунун колунан мыкаачылык менен каза тапкандыгы тууралуу кеп далайлардын жакасын карматты.

АПАСЫНЫН ӨЛҮМҮНӨ ШЕКТЕЛИП УУЛУ КАРМАЛДЫ
18-январь күнү саат 09:00 чамасында Бишкек шаардык Ленин РИИБинин нөөмөт бөлүмүнө борбор калаадагы Бах көчөсүндө жайгашкан үйлөрдүн биринен апасынын жансыз денеси табылгандыгы тууралуу айтып уулу телефон чалган. Окуя болгон жерге ИИМдин, Бишкек ШИИББинин жана Ленин РИИБинин ыкчам иликтөө кызматкерлери барышып, иликтөө иштерин башташкан. Маркумдун өздүгү такталып, ал 1949-жылы туулган Нарынбүбү Дүйшеева экендиги аныкталган. Иликтөө иштеринин натыйжасында бул кандуу окуяга шектелип маркумдун 45 жаштагы Дамир аттуу уулу кармалган.

«КЫЛМЫШЫМДЫ ЖАШЫРАЙЫН ДЕП ОЙЛОГОМ»
Тергөө маалында кылмышка шектүү Дамир Апасов кылган күнөөсүн толугу менен моюнуна алып, апасын кандайча өлтүргөнүн төмөндөгүчө айтып берген:
– Өзүм 2 бир туугандын улуусумун. Иним төрөлгөндөн эле 1-топтогу майып болгондуктан кыймылсыз үйдө жатат, азыр 34 жашта. Атам мындан 8 жыл мурун каза болуп калган. Апам болсо көп жылдан бери эсепчи болуп иштечү. Өзүмдүн үй-бүлөм, 3 балам бар. Борбордогу 170-маршруттук таксиде айдоочу болуп иштечүмүн. Унаам бузулуп убактылуу бош жүргөм.
Кээде апамдын үйүнө барып инимдин ал-абалын сурап турчумун. 17-январь күнү да таӊ эрте апамдыкына барып, иниме тамак жасап бергем. Андан соӊ уктап кетиптирмин. Уктап жатсам апам келип ойготуп: «Тур, эмне уктап жатасыӊ? Элдин сендей балдары иштеп үй-бүлөсүн багып жатат»,- деди. Кийиндим да эшикке чыгып ары-бери басып, андан соӊ мешке от жактым. Түшкү саат 2лерде курсагым ачканынан үйгө кирсем, апам ашканада пияз аарчып отуруптур. Мен столго отуруп тамак ичтим. Банктан алган насыям бар болчу, ошону төлөөгө акча керек болуп жаткан. Апам менен бир аз сүйлөшүп отурган соӊ акча сурадым. Ал ошол замат эле «сен же иштебесеӊ, же үй-бүлөӊдү тыӊ бага албасаӊ, кантип жер бетинде басып жүрөсүӊ?» деген сыяктуу сөздөрдү айтып, кыйкырып уруша баштады. Мен да каяша айтып жибердим окшойт, бир маалда ал колундагы бычагы менен мени көздөй шилтеп жиберди. Түшүнбөй калдым. Ачуум менен столдун үстүндө момпосуй салынган айнек идишти ала калып, аны менен башка чаап жибергенимди билем. Андан ары канча жолу урганым эсимде жок. Бир маалда карасам апам канжалап, кыймылсыз жатыптыр. Дароо эшикке чыгып, нес болуп 2 сааттай тамеки чегип, өзүмө келе албай отурдум.
Өзүмө келген соӊ үйдү сыртынан бекитип кетип калдым. Жолдо баратсам бажам чалып калды, бир кафеде куран окутуп жатыптыр. Ал жакка барып, андан соӊ кайнатам, бажам жана 2 кайнежем болуп менин үйүмө келдик. Эртеси кичүү кызымдын туулган күнү эле. Ошонун шылтоосу менен үйгө торт, арак алып алгам. Отуруп аны ичтик. Бирок эмнегедир апамды өлтүрүп салганым оюмдан чыкпай туруп алды. Кылмышымды кантип жашырсам деп ойлонуп отурдум. Аӊгыча башыма бир ой кылт этип көчөгө чыктым. Бир дүкөндөн 1000 сомго капюшону бар куртка сатып алып, аны кийип апамдыкына кайра бардым. Жанындагы дүкөндүн видеокөзөмөлдөөчү камерасы бар. Атайын ошого тартылып, ууру киргендей болуп дубалдан секирип түштүм да, үйдүн ичиндеги буюм-тайымдарды чачып, апамдын уюлдук телефонун, сумкасын өзүм менен кошо ала чыктым. Аларды Жал кичи районуна алып барып таштап, үйгө кетип калдым. Эртеси кайра апамдыкына барып, «келсем үйдө апам өлүп жатыптыр» деп туугандарыма, милиция кызматкерлерине телефон чалып чакырдым.

«КЫЛМЫШКА ШЕКТҮҮ АПАСЫ МЕНЕН АКЧАНЫН АЙЫНАН УРУШКАН»
Ал эми Бишкек шаарынын Ленин РИИБинин кылмыш иликтөө бөлүмүнүн жетекчиси Жеӊиш Абдылдаев окуя тууралуу буларга токтолду:
– Биз окуя болгон жерге барганда үйдүн ичинде болжол менен 60-65 жаштардагы аялдын өлүгү жаткан экен. Аны текшерүү учурунда башынан 3 жаракат алганы белгилүү болду. Биз бул кылмыштын бетин ачуу үчүн маркумдун коӊшу-колоӊ, туугандарынан, кесиптештеринен сурамжыладык. Эч кимиси аны ким, эмне себептен өлтүргөндүгү тууралуу илинчек айтып бере алышкан жок. Кесиптештери маркумдун көп жылдан бери эсепчи болуп иштегенин, жумушуна так жана чынчыл мамиле кылып келгендигин айтышты.
Маркум тапкан акчасын уулдарына жумшачу экен. Татыктуу билим алсын деп улуусун 2 жогорку окуу жайда окутуптур. Ден соолугунун мүмкүнчүлүгү чектелген кичүү уулун да жакшы караганын, үйүндө анчалык көп акча сакташы мүмкүн эместигин жакындары айтышты.
3 күн өткөн соӊ маркумдун 45 жаштагы уулун суракка алганыбызда ал апасын өлтүргөнүн моюнуна алып, бул ишке эмне себептен баргандыгын айтып берди. Ал апасы менен мурун да акча маселеси боюнча көп урушуп жүргөнүн, ошол күнкү уруш да акчанын айынан чыкканын айтты. Кылмышка шектүү мурда соттолгон эмес, иштебей убактылуу бош жүргөн. Апасын өлтүргөн маалда мас эмес, соо болгон. Окуя болгон маалда маркумдун майып уулу башка бөлмөдө болгондуктан ашканада эмне болуп жаткандыгын билген да эмес. Учурда бул кылмыш боюнча Кылмыш жана жаза кодексинин 97-беренеси (адам өлтүрүү) боюнча кылмыш иши козголуп, тергөө иштери жүрүп жатат. Ал эми маркумдун ден соолугунун мүмкүнчүлүгү чектелген уулун кылмышка шектүү Дамирдин мурунку никесинен төрөлгөн улуу кызы менен күйөө баласы багып жатышат.

«ЭЖЕ «БАЛДАРЫМ ҮЧҮН ЖАШАП ЖҮРӨМ» ДЕЧҮ ЭЛЕ»
Маркумдун туугандары бул окуя тууралуу айтуудан баш тартышты. Андан соӊ маркум 30 жылдан ашуун эмгектенип келген Айыл чарба министрлигинин алдындагы Мамлекеттик химиялаштыруу жана өсүмдүктөрдү коргоо департаментине барып, кесиптеши Арстанбек Акматовдон маркум тууралуу уктук:
– Нарынбүбү эже экөөбүз 1983-жылдан бери чогуу иштейбиз. Тажрыйбалуу, өз ишине так адам болчу. Ал кишинин ордун, баркын эми сезип жатабыз. Абдан талапчыл, аракетчил эле. Жанында иштеген жаш балдар-кыздарды үйрөтүп жатып, өзүнө окшогон жакшы адистерди даярдады. Эженин «балдарым үчүн гана жашап жүрөм» дегенин көп уккам. Оорукчан баласын жакшы карап, жанына тааныбаган адамдарды жолотчу эмес. Тилекке каршы, мындай жаман окуя болуп кетти. Баарыбыз баласы өлтүргөнүнө ишене албай жатабыз.

Асхат Субанбеков
koom@super.kg