«Супердин» тандоосу

Атактуулук адамга ар тараптан келет. Сахнадан, тасмадан, саясаттан, спорттон же байлыктан... Ошол атак-даңкты кармап, ага татыктуу болуп жүрүү да өзүнчө чоң түйшүк. Калың элге алынууда ыр-бий, жасаган эрдик, жумуш эле эмес, сырткы келбет, жүрүм-турум да маанилүү ролду ойнойт. Ушундай эле мүнөздөмөлөрдүн катарында сексуалдуулук да бар. «Супер-Инфонун» www.super.kg сайтында сурамжылоо жүргүзүп көрсөк, төмөнкү мырзалар сексуалдуулук боюнча сап башына чыгышты.

Өмүрбек мырза 1-вице-премьер-министрлик кызматтан кеткен соң саясатка киришпей, бизнеси менен алек болорун жарыялаган эле. Ошентип, экрандан, гезиттерден түшпөй калган мырза ак үйдөн кеткени калың калкка көрүнбөй кетти. Ошентсе да кыргыздын кыз-келиндеринин сүймөнчүгү боюнча калыптыр. Мунусу сурамжылоодо күйүп-жанып турган жапжаш жигиттерди артка калтырганынан эле байкалып турбайбы?

Азамат Байматов

Азаматтын бардык сыры узун боюнда, топту дарбазага жакындатпай коргогонунда, анан да от болуп күйгөн көздөрүндө эле жатпайбы. Азырынча жаш, үйлөнүү тууралуу маселеге баш оорутуп да көрө элек бул жигитке чет элдик футбол клубдарынын кызыгуусу артууда. Өткөн жылы бир жыл бою Латвияда ойноп келсе, эми Англиянын клубдарынын бирине ижарага кетет имиш деген кептер айтылууда. Чет элдик футбол клубдары кызыга берсин дечи, эми балээ басып чет элдик кыздар кызыгып, сыймыктуу жигитибизди илип кетпесе болгону.

---

Самат Дөөлөтбаков

Самат мырза ырдоо жагынан ырчылар арасында атаандаш күтүшү мүмкүн, бирок, сексуалдуулук жагынан алдына эч бирин салчудай эмес. Дегеним, былтыркы жылдагы сурамжылоодо да алдыңкы орунга чыккан. Саматтын колундагы нике шакеги, үйүндө тамагын белендеп күтүп алчу келинчеги, бал ширин кызы да кыздардын сүйүүсүнө тоскоол боло албайт көрүнөт.

Өмүкебиз “аялзаты кырк бешинде кулпурса, мырзалар элүүсүндө жигит болот” деген кептин далили. Кары-жашына карабай жоон топ саясатчыларды артка калтырып, мындай тандоодон да ат чабым алдыга чыкты. Кыргыздын кыз-келиндери анын мыкты оратордук, лидерлик сапаттарын гана баалабай, көз күйдүргөн мырза катары да баа беришет тура.

---

Султан Садыралиев

Кыргыз-казак канынан жаралган бул жигиттин шаңшыган үнүндө да, карагаттай көзүндө да кыздарды өзүнө тартар магнит бар белем. Кайсы концерт болбосун Султандын аты аталганда зал бир дүркүрөп, кыздар дуулдай орундарынан козголо түшөт. Ошондой күйөрмандары бул тандоодо да жарыша добуш беришип, Султанды сексуалдуу мырзалардын арасында алдыңкы ондукка чыгарышты.

---

Чыңгыз Мырзаев,

Күн сайын таң эрте сергек үн салып, таттуу уйкудан көзүн ачалбай жаткандарды ойготууну адат кылган бул жигит далай кыздын жүрөк дарты. Күйөрмандары “Кыргызстан Обондорунун” эшигин жыртып, атүгүл бизге чейин келип калышат, “катымды, белегимди берет элем” деп. Мындай кыздар жүдөтүштүбү же турмуш кыстадыбы, айтор, ырчы, ди-джей Чыңгыз далай кызды ыйлатып “жакында үйлөнөм” деп калды. Эмне демек элек, бактылуу болсун!

---

Канатбек Бегалиев,

Таптаттуу эки кыздын атасы, Айперидей татына айымдын жан шериги болгонуна карабай кыргыздын бул балбанына кызыккан кыздардын саны көп. Бек байкеси менен сахнада үн созгондо кыздар тимеле алакан кызарганча кол чабышат. Дагы жакшы ырчы болуп калбаган. Андай болсо “точно” Саматтан орун талашмак.

---

Урмат Усенов,

Шуриктин Нинасы студент, комсомол, спортчу, анан жөн эле сулуу эмеспи. Ушул эле мактоону Урматтын дарегине жолдосок болчудай. Ырчы, сүрөтчү, журналист, анча-мынча актёрлук да жайы бар, камкор ата, Неляга күйүмдүү күйөө, анан жөн эле мачо. Урматтын бул сапаттары кыздардын көңүлүнөн тыш калбаганы анын сексуалдуу мырзалардын алдыңкы катарына илингендигинен эле көрүнүп турбайбы?

---

Эрмек Нурбаев,

Позитивдүү энергиянын, анан күлкүнүн түгөнбөс булагы болгон Эрмек да сексуалдуу мырзалардын алдыңкы ондугунан өз ордун алды. “Сонун, татынакай” деген сөздөрдү өлө жакшы көргөн Эрмекти кыздар да “сонун жигит” деп жактырышарын телеалпаруучу билет болду бекен?

---

Темир Назаров

“Ээ-эй, туулган жер!” деп ырдап, сахнада так секире бийлеп жүргөн кезинде Темир Кыргызстанда күйөрман кыздары жагынан алдыңкы орунда болчу. Анан эле ордолуу Ошту сагындыбы же дагы башка себептер болдубу, айтор, Канат байкеси менен таарынышып, биротоло Ошту көздөй кетти да калды. Күйөрмандары баш калаанын сахналарынан сыйпалап издеп таппай эле калышты. Эми Темирдин жандана баштаганына кубанган кыздар андан добуш аяшкан жок.

Шаиста Шатманова
star@super.kg
Сүрөттөр «Супер-Инфонун» архивинен алынды.