• Өлкөдө 3 жаштан 5 жашка чейинки балдардын 80 пайызы БАЛА БАКЧАЛАРДЫН жетишсиздигинен улам ал жакка барбайт. Аталган маалыматты вице-премер-министр Чолпон Султанбекова билдирди.
  
  
• Жогорку Кеңештин экс-депутаты МАКСАТ КУНАКУНОВ 10 жылга эркинен ажыратылды. Бишкектин Биринчи Май райондук соту аны "куралды мыйзамсыз сактоо", "куралдуу кол салуу" беренелери боюнча күнөөлүү деп тапты. 
  
  
• Ветеринардык жана фитосанитардык коопсуздук боюнча инспекциянын башчысы Калысбек Жумакановдун айтымында, өлкөдө каттоодон өткөн МАЛДЫ СОЮУ боюнча 74 ишкана бар, бирок анын ичинен бирөө гана бардык талаптарга жооп берет.
  
  
• 2016-жылы Башкы прокуратура ЖАСАЛМА ПАСПОРТТОР боюнча 42, УКМК 66, ИИМ 71 кылмыш ишин козгогонун Жогорку Кеңештин депутаты Мирлан Жээнчороев билдирди.
  
  
• Бишкектеги Наркологиялык борбордун директору Руслан Токубаевдин айтымында, өлкөдө БАҢГИЗАТ колдонгондордун расмий саны 8 миңдей. Мурунку жылдарга караганда бул көрсөткүч 3 миңге кыскарган.
  
  
• 2016-жылы Кыргыз жерине келген ТУРИСТТЕРДИН саны 2015-жылга караганда 12 пайызга аз болгон. Экономика министри Арзыбек Кожошев: "Эгер II Дүйнөлүк көчмөндөр оюндары болбогондо, көрсөткүч мындан да төмөн болушу мүмкүн эле",- дейт.
  
  
• Өлкөдө учурда 245 миңдей ПЕНСИОНЕР жашоо үчүн керек болгон эң төмөн суммадан да аз пенсия алышат. Бул маалыматты Социалдык фонддун төрагасы Теңизбек Абжапаров айтты.
  
  
• ЭЛЬВИРА САРИЕВА президенттик аппараттын жетекчисинин орун басары болуп дайындалды. Ал буга чейин Билим берүү жана илим министрлигин, президенттик аппараттагы социалдык саясат бөлүмүн жетектеген.

Бектур Токтоноев   
politika@super.kg