Мезгил үнү

Кандуу шаршембиден кийин Бишкектин көчөлөрүн бир сыйра айланып, кандай кейипте экенине көз чаптырдык.

САПЫРЫЛГАН СООДА ТҮЙҮНДӨР
“Гоин” соода борбору менен “Народный” дүкөн­дөрүнүн бир тобу таланып-тонолуптур.
Мурунку “Vefa”, азыркы “Beta Stores” соода борборунан да кабар алдык. Сыртынан караганда тышкы эшик-терезеси гана талкалангандай көрүнгөнү менен, талап-тоноочулар дубалды тешип кирип, түнү бою ичиндеги товарды ташып кеткенге үлгүрүшүптүр. Бутиктердин кожоюндары ызасын, күчүн, дүкөндү көргөнү келгендерден чыгарып, жарданган элди сөгүп, кубалап жүрүшөт.

КАЗЫЛГАН БАЛАТЫЛАР
Бакиевдин үйү делинген Жибек Жолу көчөсүндөгү келишкен чоң сарайга бет алдык. Барганыбызда топтошкон эл Бакиевди болушунча сөгүп, жерден таш ала өрттөнгөн үйгө ыргытып да жүрүшүптүр. Үйдүн ичиндеги эмеректери талкаланып, дубалдарына чейин өрттөлгөн. Эл эшик-терезелерди чыгарып, унитазынан өйдө көтөрүп кетип жатышты. Бирөө темир дарбазаны жула качса, экинчиси балатыларды тамыры менен казып, көчүрүп бара жатты.

ОНТОГОНДОРГО ТОЛГОН ООРУКАНАЛАР
Жолдон Улуттук хирургия борборуна баш багып, борбордун директору Мамбет Мамакеевди кепке тарттык.
– 83 жашка чыгып, 58 жыл хирург болуп иштеген өмүрүмдө мен мындай шумдук окуяны башымдан өткөрө элек болчумун. 7-апрелде түшкө чукул эле ок жеп жарадар болгондорду биринин артынан бирин алып келе башташты. Бизде 7 операция бөлмөсү бар. Алардын баары түнү бою тынымсыз иштеп чыкты. Кыргыздын бир жакшы касиети бар эмеспи, жамандык болгондо тикеден-тик турмай. Хирургдардан баштап санитаркаларга чейин көз ирмебей иштешти. 71 адам ок жаракаты менен түштү. 7 баланын өмүрүн сактай албадык. 4 адам бизге жетпей жолдон мерт кетиптир. Каза тапкандардын баары жаш жигиттер. Карап туруп жүрөгүң ооруйт. Туш келди атылган ок эмес, адамдын өмүрүнө кооптуу жерлерди мээлеп атышыптыр. Жарадарлардын баары эле жүрөк, баш, моюн тушка ок жеп келишти. Жашоого 5 пайыз мүмкүнчүлүгү болсо да, операцияга киргизип жаттык. Булардын өмүрүн сактап калабыз деп айта алам. Кээ бирлеринин ата-энеси балдарынын каза болгонун уга элек. Элге каршы ким аткыла деп буйрук берсе да, адам деген атка татыктуу эмес. Өз элин аткан мыкаачыларды соттоп отурбай эле асып салыш керек.

БООРУКЕР ЭЛИБИЗДЕН АЙЛАНСАК БОЛОТ
Демонстрациядан жабыр тарткандарга түнү бою өз эрки менен келип, кан тапшырган кайрымдуу адамдар да чыкпай койгон жок. Эртең менен Республикалык кан борборуна барганыбызда кан тапшыруу үчүн кезекте турган адамдар аябай көп экен. Кан алуучулар алгач каалоочулардын ден соолугун текшерип жатышты. Документтер керектигин билбей келип алып, аны алып келүү үчүн үйлөрүнө шашып бараткандар мындан көп.

Азамат, 22 жашта
– Мен борбордук аянттан үйгө кетейин деп Киев көчөсүнө чыгып калганда тарсылдатып элди ата башташты. Бир маалда көкүрөк тушум “тыз” дей түштү. Жанымдагылар “ок тийдиби?” деп курткамдын сыдырмасын ачканда канжалай түшүптүрмүн. Ок жүрөккө бир аз эле жетпей калыптыр. Учурда окту алыша элек. Дагы бир топ убакыт күтүү керек экен.

Тимур, 48 жашта
– Мен Сокулуктан келгем. Аянтта алдыңкы катарда жүргөм. Бир маалда снайперлер ак үйдүн үстүнөн элге ок чыгара башташты. Жөн эле коркутуп резина октор менен атып жатышат десек, кадимки ок менен атып жатышыптыр. Элге карай ок атылганда ого бетер жинибиз кайнап, алга жулундук. Ошентип, колумдан жарадар болдум.

Руслан, 27 жашта
– Менин бутумду БТР тебелеп кетти. 1941-жылкы согуштай кылып эле танк менен качырып сала беришкенде чалынып кетип, бир бутум дөңгөлөк алдында калды. Чынын айтсам, адамдарды чымчык аткылагандай эле кылышты.

Бахияна Сатылганова, Сүйүн Кулматова
politika@super.kg