Соңку кездерде айдоочулар арасында коомдогу экономикалык шартка ылайык майды аз короткон унааларга басым жасалууда. Андыктан аларга карата баа да өсүп, айрымдарынын наркы өзүнөн жогорку класстагы унаалар менен дээрлик тең болуп калды. Өлкө ичинде кеңири тараган мини класстагы үнөмдүү унааларды мүнөздөп көрөлү.

ЫҢГАЙСЫЗ, БИРОК АРЗАН

Авто өндүргөн компаниялар адатта эконом класстагы унаалардын кузовун хэтчбек кылып чыгарууну туура көрүшөт. Мындай модель чакандыгы менен айдоого ыңгайлуу болуп, тыгын көп болгон шаарларда кыйынчылык жаратпайт. Биздин аймакта негизинен үнөмдүү унаалардын алдыңкы приводдогулары (алдыңкы дөңгөлөктү кыймылга келтирүүчү) кеңири таралган. Алардын кемчилиги катары тоо-ташка ыңгайсыз экени айтылат. Төмөндө үнөмдүү автоунаалардын 2002-2003-жылы чыккан моделдеринин Кыргызстандын базарындагы орточо баалары көрсөтүлгөн. Алардын баары орточо эсеп менен 100 чакырымга 5-7 литр күйүүчү май сарптайт.

HONDA FIT

Бул унаанын популярдуу экенин мындан билиңиз, эл арасында «Хонда Фит – Бишкекте хит», «Ош фиттеп кетти» деген сыяктуу тамашалуу сөздөр айтылып келет. Бул унааны базардан өзүн да, тетиктерин да арзан жана оңой сатып алуу мүмкүн. Ошондуктан жергиликтүү айдоочулар аны жеткиликтүүлүгү жагынан эч бир унааны алдыга салбайт дешет. Ал эми кемчилиги катары аны назик деп баалап, консерва банкасына салыштырышат. Ушул эле кузовдогу унаанын сол рулдуусу Honda Jazz деп аталып, Фитке салыштырмалуу баасы кымбатыраак болот.

• Кыймылдаткычынын көлөмү – 1339-1496 сантиметр куб
• Салмагы – 1100-1350 килограмм
• 100 чакырымга кеткен чыгым – 5 литр
• Баасы – абалына жана жылына жараша 3000-4500 $

TOYOTA IST

Бул унаа түрү 2002-жылы чыгып, дүйнөдө жана 2011-2012-жылдан тарта биздин рынокко келип, интерьери жана баасы жагынан элдин купулуна толуп, аз убакыттын ичинде суроо-талапка ээ болгон. Исттин бекемдигин, чыдамкайлыгын, салону кенен жана бийик болгонун, дөңгөлөктөрүнүн сыртындагы аркалар анын жол тандабасты элестеттирген дизайнын баалашат. Ошол эле учурда айдоочулар бул 5 эшиктүү хэтчбекти айдоодо катуулугу билинерин жана багажынын тардыгын кемчилик катары айтышат. Аталган авто өндүрүштө турганына 15 жыл эле болгондуктан, жалпысынан жылы жаңы жана дээрлик баары аз чакырым айдалганы менен айырмаланат. Истти жактыргандар каалоосуна жараша, кыймылдаткычынын көлөмү 1.3 же 1.5, алдыңкы же толук приводдо тандап ала алышат.

• Кыймылдаткычынын көлөмү – 1299, 1496 сантиметр куб
• Салмагы – 1200 килограмм
• Чыгым – 100 чакырым/5,5 литр
• Баасы – абалына жана жылына жараша 3600-5000 $

VOLKSWAGEN BEETLE (ЖУК)

3 эшиктүү бул автоунаанын сырткы келбети чындап коңузду элестетип, анын көпчүлүгү ачык түстө кездешет. Кызыктуу кузов дизайны менен өзүнө тарткан бул унаанын алгачкы моделдери 1938-жылы жарыкка чыгып, 2003-жылга чейин 21,5 миллион даана унаа сатылып компаниянын тарыхында рекорд койгон. Коңуз деген каймана ат менен белгилүү болгон бул авто эл арасында германиялык өндүрүш болгону үчүн, рулунун сол жакта экендиги жана бекемдиги менен бааланат. Бирок асты жапыз болгону дөңсөөлөрдөн өткөндө ыңгайсыздык жаратат. Ушул үлгүдөгү унааны Уругвай мамлекетинин мурдагы президенти Хосе Мухика да тандаган.

• Кыймылдаткычынын көлөмү – 1390 сантиметр куб
• Салмагы – 1650 килограмм
• Чыгым – 100 чакырым/6-7 литр
• Баасы – абалына жана жылына жараша 2600-3500$

NISSAN MARCH

Алгач бул модель 3, андан кийин 2002-жылы чыккан үлгүсүндө (5-муун) 5 эшиктүү хэтчбек болуп чыга баштаган. Өндүрүүчүлөр салон үчүн жогорку класстагы материалдар колдонулганын айтышып, кыймылдаткычынын сапаты япон унааларынын стандарттарына туура келет деп ишендиришет. Бул унаанын эмнеси жакшы, каалоочулар анын коробкасынын автоматын да, механикасын да кыйналбай таба алышат. Айдоочулар аны айдоого жеңил деп айтышканы менен, жүргүнчүлөр бул унаанын арткы орундуктары адамды түз эмес жолдордо катуу чайпап коёт дешет.

• Кыймылдаткычынын көлөмү – 1240 сантиметр куб
• Салмагы – 1475 килограмм
• Чыгым – 100 чакырым/5-6 литр
• Баасы – абалына жана жылына жараша 2000-3000$

MERCEDES A 160

Мерседес А 160ты үнөмдүү автосүйүүчүлөр Мерседестин продукциясы болгону үчүн тандашат. Алар бир эле учурда «жол падышасын» айдап, унаасы майды аз сарптоосун каалашат. Артыкчылыгы: ишенимдүү, бекем, чыйрак, сол рулдуу жана салону ыңгайлуу. Кемчилиги: тетиктери башка үнөмдүү унаалардан кымбатыраак жана айрым деталдары Кыргызстандын аймагында чанда кездешип, муктаждык жаралганда аларды атайын буюртма менен алдырууга туура келерин айтышат.

• Кыймылдаткычынын көлөмү – 1598 сантиметр куб
• Салмагы – 1500 килограмм
• Чыгым – 100 чакырым/7-8 литр
• Баасы – абалына жана жылына жараша 2700-4500$

Артыкчылыктары:

• Баалары башкаларга салыштырмалуу арзан;
• Күйүүчү майды аз коротот;
• Чакан болгондуктан, унаа токтотуу маселе жаратпайт;
• Кызмат көрсөтүүлөр кымбат эмес;
• Кыймылдаткычынын көлөмү аз болгондуктан, салыктын баасы да ага тиешелүү болот;
• Абаны азыраак булгайт;

Кемчиликтери:

• Салмагы жеңил болгондуктан, автокырсыкка туруктуу эмес;
• Үн өткөрбөөсү начар;
• Аз жүк батып, оор жүк көтөрө албайт;
• Дээрлик баары 5 кишилик деп аталганы менен, салон 4 кишиге ылайыкталган;
• Асфальтта гана жүрүүгө ыңгайлуу.

Алтынай Тынышова
koom@super.kg